Abadepite 29 b’Ubufaransa barasa perezida Emmanuel MACRON gushyigikira ishyirwaho ry’urukiko mpuzamahanga rwo kubaranisha abicanyi bo mu karere k’ibiyaga bigari by’Afurika !

Abadepite 29 b’inteko ishingamategeko y’igihugu cy’Ubufaransa bandikiye perezida w’icyo gihugu Emmanuel Macron ibaruwa isaba ko leta  y’Ubufaransa igomba gushyigikira ku buryo bukomeye ishyirwaho ry’urukiko mpuzamahanga mpanabyaha rwa Congo rugomba kuburanisha ibyaha by’ubwicanyi ndengakamere buvugwa muri Raporo Mapping ya Loni.

Izo ntumwa za rubanda zo mu nteko ishingamategeko y’Ubufaransa zikaba zarandikiye iyo baruwa perezida w’Ubufaransa ku italiki y 25 Ugushyingo uyu mwaka. Muri iyo baruwa izo ntumwa za rubanda zivugako hashize imyaka myinshi akarere k’ibiyaga bigari by’Afurika kibasiwe n’intambara n’amakimbirane adashira bihitana ubuzima bw’abantu benshi. Muri izo ntambara hakaba hakoreshwa uburyo bwo gusambanya abagore ku ngufu no kwangiza imyanya ndangagitsina yabo, ibyo bikaba bikoreshwa nk’intwaro y’intambara mu gihugu cya Repubulka Iharanira Demokarasi ya Congo. Ubwo bugome bukabije bwo kwica abaturage urubozo bukaba bwarakwiriye igihugu cyose cya Congo kandi bukaba bwibasira abagore, abana b’abakobwa, impinja ndetse n’abana b’abahungu. Muri iyo baruwa abo badepite baragira bati :

«Niba nyuma y’itsembabwoko riteye ubwoba ryabaye mu Rwanda mu mwaka w’1994, harabayeho igikorwa cyo kwibuka, hagashyirwaho ubutabera no kuzirikana amateka y’ibyabaye; ntabwo byakwihanganirwa ko mu izina ryo kwirinda kugereranya abakorewe ibyaha, ko ibyaha ndengakamere biri gukorwa muri iki gihe bitagomba gushyirwamo imbaraga zo kubihana nk’uko izo mbaraga zakoreshejwe mu guhana abakoze ibyaha nk’ibyo byakozwe mbere yabyo».  

Abo badepite b’Abafaransa barasabako hajyaho urukiko rwo kuburanisha ibyaha bivugwa muri Raporo Mappingi ya ONU yashyizwe ahagaragara mu mwaka w’2010 nk’uko  bisabwa na Muganga Denis Mukwege. Muri iyo baruwa abo badepite baragira bati :

«Bwana Perezida wa Repubulika, hakurikijwe ibikorwa n’ubunyangamugayo bya muganga Mukwege, twebwe abashyize umukono kuri iyi baruwa turabasaba ko mushyigikira, nk’uko inteko y’abadepite b’ubumwe bw’Uburayi yabisabye, ishyirwaho ry’urukiko mpuzamahanga mpanabyaha, rugomba kuburanisha ibyaha byagaragajwe mu ihohoterwa ry’uburenganzira bw’ikiremwamuntu byakozwe mbere y’umwaka w’2002 bikorewe mukarere k’ibiyaga bigari; icyo akaba ari igikorwa cy’ingenzi nk’uko muganga Mukwege abisaba, ubutabera bukaba bugomba gutangwa kugirango abaturage ba Congo bashobore gutekereza iterambere ry’ejo hazaza».

Abo badepite kandi basabye Perezida w’Ubufaransa ko agomba gutanga amabwiriza yo kugirango ubwicanyi bwose bwabereye mu karere k’ibiyaga bigari ko bugomba kwigishwa mu mashuri kandi bugakorwaho ubushakashatsi nk’uko bikorwa kuri jenoside yabaye mu Rwanda mu mwaka w’1994. Muri iyo baruwa kandi, abo badepite basabye perezida w’Ubufaransa kutazongera kwakira ku butaka bw’Ubufaransa abakuru b’ibihugu bijanditse mu bwicanyi bwo mu karere k’ibiyaga bigari, baragira bati :

«Turabasaba gushyigikira icyifuzo  cya Dr.Mukwege yatanze ubwo yahabwaga igihembo cy’Amahoro ku isi taliki ya 10 Ukuboza 2018, ikifuzo  cyo kutazongera kwakira mu cyubahiro abo bayobozi bategurirwa umukeka utukura (tapis rouge) kandi bakomoka mu bihugu bikoresha ihohotera ry’igitsinagore nk’intwaro yo kubageza ku butegetsi ; ahubwo hakaba hagomba gucibwa umurongo utukura kuri abo bayoboyobozi bakoresha mu ntambara intwaro yo gusambanya abagore ku ngufu, uwo murongo utukura kandi ukaba ugomba kuba ikimenyetso cyo gufatirwa ibihano kw’abo bayobozi mu rwego rw’ubukungu, urwa politiki no kugezwa imbere y’ubutabera ».

Mu ibaruwa yabo, abo ba depite batunze agatoki Paul Kagame ko ariwe utera ubwicanyi mu karere kose k’ibiyaga bigari cyane cyane mu burasirazuba bwa Congo aho yashinze imitwe myinshi yitwaje intwaro mu guhungabanya umutekano wa Congo kuva mu mwaka w’1996. Abo badepite baragira bati :

«Bwana Prezida wa Repubulika, ntabwo tuzareka kwamagana ubwicanyi buteye ubwoba bwakozwe muri jenoside yabaye mu Rwanda mu Mpeshyi yo mu w’1994 bwibasiye abatutsi. Tuzi kandi imigenderanire myiza iri hagati y’Ubufaransa na Perezida Paul Kagame, n’uruhare rwe mu bibera mu karere. Uko biri kose, nta bubanyi n’amahanga bushoboka mu gihe buba bushaka ko abantu baceceka bakanibagirwa ibibi biba bikorerwa ibihumbi by’abantu kimwe n’ubugome bukomeje gukorwa  kugera n’uyu munsi bukaba budahagarara. Mu gihe muzaba mushyize mubikorwa ibyo tubasaba, muzaba mukoze igikorwa gikomeye cyo guhagarika ubwo bugome ».

Iyi baruwa y’abadepite b’inteko ishingamategeko y’igihugu cy’Ubufaransa ije ishimangira umwanzuro wafashwe n’inteko ishingamategeko y’umuryango w’Ubumwe bw’Uburayi yasabye ko hagomba gushyirwaho urukiko mpuzamahanga rwa Congo rwo kuburanisha abicanyi bose bo mu karere k’ibiyaga bigari. Igihugu cy’Ubufaransa gifite ikicaro gihoraho mu kanama gashinzwe umutekano ku isi no muri ONU, icyo gihugu gisabye ko uru rukiko rujyaho ntabwo byasaba igihe kinini kugirango rutangire imirimo yarwo.

Abanyepolitiki muri Congo, mu Rwanda no mu Burundi bagomba gushyigikira iki cyifuzo cyo gushyiraho uru rukiko kugirango amahano y’ubwicanyi ashobore gucika muri kariya karere k’Afurika kandi ibyo bikaba bigomba gukorwa vuba kuko abicanyi bashobora gutoroka ubutabera kubera urupfu !

Courrier Députés au Pdt Macron 25 Novembre 2020

Mushobora gufungura ikiganiro kiri hasi aha kugirango mwumve ubuhamya Ndikubwimana Jean Bosco yatanze bwerekeranye n’ubwicanyi bukomeye inkotanyi zakoreye muri Komine ya Butaro !  Ese koko ubwicanyi nk’ubu buzagenda gutyo gusa ?

Courrier Députés au Pdt Macron 25 Novembre 2020

Subscribe
Notify of
guest
2 Comments
Oldest
Newest Most Voted
Inline Feedbacks
View all comments
NYONINYINSHI
NYONINYINSHI
4 December 2020 1 h 12 min

Ibyiza “FPR INYENZI INKOTANYI zavanye mu gihugu cy’ ” BUSAGYA” , ni: KWICA, KWIBA, KUROGA, KUBESHYA ukongeraho n’UBUSAMBANYI ndenga kamere. ” Nibyo twabonye bavanye mu “BUSAGYA”. kwa “Papa wabo “KAGUTA Yoweri M7”.

kalisa
kalisa
4 December 2020 15 h 35 min

Buhoro buhoro FPR iragenda itahurwa. Le mensonge prend l’ascenseur mais la vérité prend l’escalier et finit par arriver.