Kuri iki cyumweru taliki ya 15/08/2021, umukuru w’igihugu cy’Afuganistani Bwana Ashraf Ghani yafashe inzira y’ubuhungiro kubera ko abarwanyi b’umutwe w’ibyihebe by’Abatalibani bari bamaze gusesekara mu murwa mu kuru w’igihugu cya Afuganistani wa Kabulu (Kaboul). Ayo makuru y’ihunga rya perezida w’Afuganistani akaba yatangajwe na Visi perezida w’icyo gihugu Bwana Abdullah Abdullah wemeje ko perezida Ashraf Ghani yahungiye mu gihugu cya Tajijkistani (Tadjikistan) aho azava yerekeza mu kindi gihugu atatangaje izina.
Nyuma y’iminsi 10 gusa, abarwanyi b’Abatalibani bari bamaze gufata imijyi ikomeye irenga 15 mbere yo kwinjira mu murwa mukuru w’icyo gihugu. Abatalibani bakaba barubuye imirwano yo kwigarurira igihugu cy’Afuganistani guheramu kwezi kwa Gatanu 2021 nyuma y’aho perezida wa Leta Zunze Ubumwe z’Amerika Bwana Joe Biden atangarije ko ingabo z’Amerika zizaba zavuye muri Afuganistani bitarenze ukwezi kwa Nzeri uyu mwaka. Kuba perezida w’Afuganistani yahunze igihugu, bihise biha uburyo bwiza Abatalibani bwo gufata leta y’icyo gihugu nta mirwano ibereye mu murwa mu kuru wa Kaboul.
Mu kwezi k’Ukuboza 2001 nibwo ingabo za Leta Zunze Ubumwe z’Amerika zifatanyije n’umuryango wo gutabarana w’ibihugu by’iburengeraziba (OTAN/NATO) hamwe n’ingabo z’igihugu cy’Ubufaransa, ubwongereza, Canada ndetse n’ibindi bihugu by’Uburayi binyuranye birukanye Abatalibani ku butegetsi. Leta y’Abatalibani ikaba yarashinjwaga icyaha cyo gushyigikira no guha ubuhungiro Oussama Bin Laden n’umutwe w’Al-Qaïda bishinjwa gukora ibyaha by’iterabwoba ku gihugu cya Leta Zunze Ubumwe z’Amerika ubwo ibyihebe byahanuraga amazu maremare cyane yo muri icyo gihugu taliki ya 11/09/2001.
Nyuma yo kwirukana Abatalibani ku butegetsi mu mwaka w’2001, Amerika yonyine yohereje muri Afuganistani abasilikare barenga ibihumbi 100 ndetse hiyongeraho n’abandi basilikare ibihumbi byinshi by’ingabo zivuye mu bihugu by’Uburayi kugirango bakumire Abatalibani bari batangiye intambara ya kinyeshyamba. Nubwo hakorejwe imbaraga zidasanzwe mu kurwanya Abatalibani, bakomeje umutsi none kuri iyi taliki ya 15/08/2021 bongeye kugaruka ku butegetsi batsinze ingabo zose z’ibihugu by’amahanga zabarwanyaga ndetse hiyongereyeho ingabo z’Afuganistani zirenga ibihumbi 150 zifite intaro zikomeye zahawe n’Amerika! Abanyamerika n’Abanyaburayi bari muri Afuganistani bari kwiruka « kibuno mpa amaguru » bahunga Abatalibani!
Amerika n’ibihugu by’Uburayi byakwije inkuru ku isi yose y’uko Abatalibani ari ibyihebe bigomba kurwanywa ku isi yose; iyo mvugo y’ibyihebe ikaba yarakiriwe neza n’ibihugu byinshi birwanya abatavuga rumwe n’ubutegetsi ko ari ibyihebe bigomba kurwanywa! None se ko Afuganistani iyobowe n’ibyihebe isi yose izabyifatamo ite? Ese abayobozi bitwaza impamvu yo kurwanya iterabwoba bazakomeza kwishingikiriza iyo nyito mu kurwanya abo batavuga rumwe nabo? Ese Afuganistani izirukanwa muri ONU?
Uko byagenda kose intsinzi y’Abatalibani irazana impinduka nyinshi mu mitekerereze no mu mikorere ya kurwanya ubutegetsi bw’igitugu buri mu bihugu byinshi bigaragara cyane ku mugabane w’Afurika.
Veritasinfo.
Poster un Commentaire