Ari i Kigali, Antony Blinken yagaragaje «impungenge zikomeye ku kibazo cy’uburenganzira bwa muntu» mu Rwanda!

Kuri uyu wa kane, tariki ya 11 Kanama, umunyamabanga wa Leta zunze ubumwe z’Amerika, Antony Blinken, yatangaje ko afite impungenge zikomeye ku kibazo cy’uburenganzira bwa muntu mu Rwanda, ubwo yaganiraga na Perezida Paul Kagame i Kigali ku  munsi wa nyuma w’uruzinduko rwe muri Afurika.

Mu kiganiro n’abanyamakuru, Antony Blinken yagize ati: «Nkuko nabibwiye Perezida Kagame, twemera ko abantu bo mu bihugu byose bagomba kugira uburenganzira bwo gutanga ibitekerezo byabo badatinya ko bakorerwaho iterabwoba, gufungwa, gukorerwa urugomo cyangwa ubundi buryo bwo gukandamizwa. Turabizi neza ko u Rwanda rwakoze byinshi byiza mu iterambere ariko mu gihe rudahaye umwanya ubwisanzure bwa muntu, byose biba impfabusa; ibi simbivugira ku Rwanda gusa n’ahandi ndabibabwira.»

Antony Blinken yavuze kandi ko yaganiriye na Paul Kagame ku rubanza rwa Paul Rusesabagina, wakatiwe igifungo cy’imyaka 25 kuva umwaka ushize. Rusesabagina akaba afite uburenganzira bwo gutura ku buryo buhoraho muri Amerika. Mu kiganiro n’abanyamakuru, Antony Blinken yagize ati : «nagaragaje ikibazo cya Paul Rusesabagina kandi nshimangira impungenge dufite z’uko ntakigaragaza ko yahawe ubutabera bukwiye; nagaragaje ko duhangayikishijwe n’uburyo yaburanishijwe ndetse n’uburyo yakatiwe cyane cyane ibirebana no kwizezwa ubutabera butabogamye. Dukomeje gusaba leta y’u Rwanda gutekereza kuri izo mpungenge dufite cyane cyane kubijyanye n’ubufasha mu mategeko. Nabivuganyeho na perezida Kagame kandi tuzakomeza kubivuganaho, ikindi ni uko navuganye n’umuryango wa Rusesabagina mu minsi ishize kandi tuzakomeza kuvugana nawo.»

Nubwo Blinken atavuze igisubizo Kagame yamuhaye kuri icyo kibazo cya Rusesabagina, Ministre w’ububanyi n’amahanga mu Rwanda, Vincent Biruta wari kumwe nawe mu kiganiro n’abanyamakuru yakuriye inzira ku murima Bwana Antony Blinken, Biruta yagize ati : «Paul Rusesabagina ni umunyarwanda wakoze ibyaha bizwi by’iterabwoba. Kuri twebwe rero urubanza rwararangiye, rwaraciwe burundu arafunze, azarangiza igihano cye ; gutekereza ko hari igitutu kizatuma Abanyarwanda babyuka mu gitondo bakumva ngo hari umuntu wafunguwe kubera igitutu cy’amahanga, ntabirihoEse Vincent Biruta ashobora kuvuguruza Paul Kagame ? Cyangwa Biruta niwe usigaye ufata ibyemezo mu mwanya wa Kagame?

Ntabwo Biruta yashoboye gusobanurira abanyamakuru niba iki gitekerezo yatanze kuri Rusesabagina aricyo gisubizo Paul Kagame yahaye Antony Blinken mu gihe baganiraga.  Bwana Antony Blinken akaba yagiriye uruzinduko rugufi mu Rwanda, nyuma ya Afurika y’Epfo na Repubulika Iharanira Demokarasi ya Kongo (DRC).

Abantu benshi bakaba biteze ibyemezo bishya bizafatwa mu bubanyi n’amahanga na Leta Zunze ubumwe z’Amerika nyuma y’uru ruziko Antony Blinken yakoreye muri ibi bihugu 3 by’Afurika.

Veritasinfo