Burundi: Evariste Ndayishimiye yatsinze n’amajwi 68%, Rwasa agiye kurega!

Evariste Ndayishimiye n'umuryango we mu gihe cyo kwiyamamaza

Komisiyo y’igihugu y’amatora mu Burundi imaze gutangaza by’agateganyo ibyavuye mu matora y’umukuru w’igihugu aho Evariste Ndayishimiye w’ishyaka CNDD-FDD riri ku butegetsi yaje imbere n’amajwi 68,72%.

Iyi komisiyo y’amatora yatangaje ko hiyandikishije gutora abantu bagera kuri miliyoni 5,115, 418 naho abatoye bakaba ari 87% byabo. Urutonde rw’uko abakandida barindwi bakurikiranye mu majwi yatangajwe:

  • Evariste Ndayishimiye (CNDD-FDD) – 68,72%
  • Agathon Rwasa (CNL) – 24,19%
  • Gaston Sindimwo (UPRONA) – 1,64%
  • Domitien Ndayizeye (Kira Burundi) – 0,57%
  • Léonce Ngendakumana (FRODEBU) – 0,47%
  • Nahimana Dieudonné – 0,42%
  • Francis Rohero – 0,20%

Mu matora y’abadepite ishyaka CNDD-FDD naho ryagize imyanya myinshi kuko ryagize amajwi 68% rikurikirwa na CNL ryagize 22%, UPRONA igira 2%, abandi bakandida bigenga n’amashyaka bagira amajwi atageze kuri 1%. Niba nta gihindutse, Evariste Ndayishimiye ni we utorewe kuba Perezida wa cyenda wa repubulika y’u Burundi muri manda y’imyaka irindwi iri imbere.

Ku ngengabihe y’amatora biteganyijwe ko ibyavuye mu matora ku buryo bwa burundu bitangazwa tariki 04/06/2020, naho perezida mushya watowe akarahira tariki 20/08/2020.

Rwasa agiye kurega

Agathon Rwasa avuga ko bazaregera urukiko mu gihe giteganywa n’amategeko

Agathon Rwasa wagize amajwi ya kabiri muri aya matora y’umukuru w’igihugu yabwiye BBC ko atemera ibyavuye mu matora ndetse bazarega mu nkiko. BBC yagerageje kuvugana n’uruhande rwa CNDD-FDD ku byavuye mu matora ariko kugeza ubu ntibirashoboka.

Iri shyaka ariko ryatangaje kuri Twitter ko “Abarundi bose inyuma ya Ndayishimiye bagiye kwandika urupapuro rushya rw’ubuzima bw’Abarundi n’u Burundi“. Amategeko ateganya ko utemera ibyavuye mu matora atanga ikirego mu gihe kitarenze amasaha 48.

Bwana Rwasa yagize ati: “Twanze ibyavuye mu matora, kandi tuzageza ikirego cyacu mu rukiko…urukiko mu Burundi nirutaturenganura tuzajya mu rukiko rwa Afurika y’iburasirazuba.Muri aya matora twarahohotewe, twarakubiswe bamwe barafungwa abandi baranicwa, ibyo byose ni ibimenyetso byerekanaga ko ibi bivuye mu matora ari byo bashakaga“. Rwasa avuga ko mu myaka 15 ishize ubutegetsi bwa CNDD-FDD bwaranzwe no guhohotera abatabona ibintu kimwe nabwo muri politiki.

Ati: “Ni ubutegetsi bwazambije ubukungu, bwazambije ibintu byose n’imibanire n’ibindi bihugu, Abarundi ni nkaho turi twenyine, ibyo Abarundi barabirambiwe. “Muri aya matora Abarundi bari berekanye amahitamo yabo, ni yo mpamvu dusaba ko uguhitamo kwabo kubahirizwa“.

Bwana Rwasa avuga ko atabona ko Evariste Ndayishimiye ari umuntu witeguye gukorana n’abatavuga rumwe n’ubutegetsi. Gusa agira ati: “Ariko nabona ko Abarundi bose ari bamwe tuzakorana naho nakomeza inzira barimo ntabwo bizoroha”.

Kanda kuri iyi nteruro usome iyi nkuru yose ku buryo burambuye ku rubuga rwa BBC Gahuzamiryango

Subscribe
Notify of
guest
0 Comments
Inline Feedbacks
View all comments