Burundi : Lieutenant Général Gervais Ndirakobuca yagizwe ministre w’intebe

Bwana Gervais Ndirakobuca bita Ndakugarika yagizwe ministre w'intebe w'Uburundi

Nkuko byasabwe n’umukuru w’igihugu cy’Uburundi Evariste Ndayishimiye, kuri uyu wa gatatu taliki ya 7 Nzeri 2022, Inteko ishingamategeko y’igihugu cy’Uburundi (imitwe yombi) yateraniye mu ngoro yayo iri mu Kigobe ; nyuma yo gusuzuma icyifuzo cy’umukuru w’igihugu, iyo nteko yemeje ko Bwana Gervais Ndirakobuca abaye Ministre w’intebe w’Uburundi.

Iyo nteko y’abadepite b’imitwe yombi ikaba yakoresheje itora mu kwemeza ko Ndirakobuca aba ministre w’intebe, bityo, akaba yatowe ku majwi 113 kuri 113 y’abatoye bose, ni ukuvuga ko yatowe n’amajwi 100% , nta numwe wifashe ; nk’uko bitangazwa na Radiyo na Televiziyo y’Uburundi (RNTB). Bwana Gervais Ndirakobuca akaba yari asanzwe ari ministre w’Ubutegetsi bw’igihugu mu Burundi kandi akaba afite ipeti rya lieutenant général de police mu rwego rw’umutekano w’Uburundi.

Bwana Gervais Ndirakobuca asimbuye ku mwanya wa ministre w’intebe Bwana Alain Guillaume Bunyoni, ibyo bikaba bibaye nyuma y’iminsi micye perezida w’Uburundi atangaje ko hari « abategetsi bibwira ko ari ibitangaza kandi bafite umugambi wo gusenya inzego z’ubutegetsi bw’igihugu zashyizweho na demokarasi, abo bategetsi bakaba birirwa basenya ibikorwa by’umukuru w’igihugumu mu rwego rwo kumuca intege ; perezida Ndayishimiye yavuzeko abo bose agiye kubahagurukira kandi bakazagezwa imbere y’ubutabera » !

Hari hamaze iminsi hagaragara guterana amagambo hagati ya Bunyoni n’umukuru w’igihugu

Bwana Gervais Ndirakobuca ni umwe mu bayoboke b’ikubitiro b’ishyaka rya CNDD-FDD witabiriye ibikorwa by’urugamba rwo kurwanya leta ya Petero Buyoya ; yagaragaye cyane mu bikorwa byinshi byo guhosha imvururu no kurwanya abanzi ba CNDD-FDD kuburyo byatumye ahabwa izina ry’irihimbano rya «Ndakugarika». Nyuma y’imvururu zatewe n’igikorwa cyo gushaka guhirika ubutegetsi bwa Petero Nkurunziza mu mwaka w’2015, Bwana Gervais Ndirakobuca yafatiwe ibihano na leta Zunze Ubumwe z’Amerika (USA) ndetse n’Umuryango w’Ubumwe bw’Uburayi (UE), ariko ibyo ntibimubujije kuba agizwe ministre w’intebe w’igihugu cye cy’Uburundi!

Nk’uko ingingo y’130 y’Itegeko Nshinga ry’Uburundi ibivuga, ministre w’intebe ashyirwaho na perezida wa repubulika ariko akemezwa n’inteko ishingamategeko imitwe yombi iteranye. Ministre w’intebe w’Uburundi agomba kuba afite ubwenegihugu bumwe gusa bw’Uburundi. Bitegeanyijwe ko Ministre w’intebe mushya Gervais Ndirakobuca arahirira imirimo ye mishya uyu munsi ku isaha ya saa cyenda n’igice ku isaha y’i Bujumbura! Umukuru w’igihugu cy’Uburundi kandi ashyize umukono ku itegeko teka rigira Colonel SINDAYIHEBURA Aloys, umukuru w’ibiro by’umukuru w’igihugu.

Veritasinfo