Inkuru zikomeje kuvugwa cyane ku isi mu karere k’ibiyaga bigari ni : amatora y’umukuru w’igihugu, abashingamateka n’abayobozi b’amakomine mu Burundi n’itabwa muri yombi ry’umunyemari Kabuga Félecien mu gihugu cy’Ubufaransa.
Itora ryo mu Burundi rikaba ryarabaye kuri uyu wa gatatu taliki ya 20/05/2020, muri rusange iryo tora ryabaye mu mutuzo uretse abantu bacye batawe muri yombi kubera kwitwara nabi, ariko abenshi muri abo batawe muri yombi bakaba bararekuwe nyuma bakajya gutora, abandi bagashyikirizwa ubutabera. Igihugu cya Leta Zunze Ubumwe z’Amerika ndetse n’Ububiligi bikaba byarashimye uburyo itora mu Burundi ryabaye mu mutuzo, ibyo bihugu byombi bikaba byizeye ko ibarura ry’amajwi naryo rirakorwa mu mutuzo kandi abakandida bakemera ibyavuye muri ayo matora.
Uyu munsi wo kuwa kane taliki ya 21/05/2020, abarundi bakaba biriwe mu gikorwa cyo kubarura amajwi ku biro by’amatora. Umuyobozi wa komisiyo y’amatora mu Burundi akaba yabwiye radiyo mpuzamahanga y’abongereza BBC-Gahuzamiryango ko muri gahunda yo gukorera ku mugaragaro no kwirinda urwicyekwe: amajwi yose yabaruwe mu biro by’amatora arakusanyirizwa hamwe mu rwego rwa komine, noneho umuyobozi wa komisiyo y’amatora muri komine akaba ariwe ugomba gutangaza ku mugaragaro amajwi abakandida babonye mu rwego rwa komine kandi n’itangazamakuru rikaba rifite uburenganzira bwo guhita ritangaza ayo majwi yavuye muri komine.
Amajwi yavuye mu makomine azoherezwa ku rwego rw’intara, naho hakorwe igiteranyo kizoherezwa mu rwego rw’igihugu muri komisiyo ishinzwe amatora. Biteganyijwe ko amajwi y’agateganyo mu rwego rw’igihugu mu Burundi azatangazwa kuwa mbere cyangwa kuwa kabiri w’icyumweru gitaha. Kuba amajwi azatangarizwa muri buri komine biragaragara ko uburyo bwo kwiba amajwi buzaba busa n’ubudashoboka kuko amakomine yose atarangirije kubarurira amajwi rimwe kuburyo yakumvikana k’uburyo yakwibira umukandida runaka amajwi; kandi nabwo mu rwego rw’igihugu nta busuma bushobora kubonekamo kuko amajwi azaba yabaruriwe hasi mu makomine buri mukandida afite umubare w’amajwi yabonye.
Ubwo twandika iyi nkuru , “Veritasinfo” yari imaze kubona amajwi yabonetse mu makomini amwe namwe yarangije kubarura, ayo majwi akaba yatangajwe ku mugaragaro. Dore amakomine twamaze kubona amajwi yaho, turabagezaho abakandida 2 ba mbere muri buri komine:
1)Komine Giheta mu ntara ya Gitega : E.Ndayishimye 85%; A.Rwasa 7%
2)Komine Buraza mu ntara ya Gitega: E.Ndayishimye 93%, A.Rwasa 1%
3)Komine Gishubi mu ntara ya Gitega : E.Ndayishimye 87%; A.Rwasa 8%
4)Komine Rutegama mu ntara ya Muramvya: E.Ndayishimye 86%; A.Rwasa 11%
5)Komine Bukeye mu ntara ya Muramvya: E.Ndayishimye 28293 ; A.Rwasa 5722
6)Komine Matongo mu ntara ya Kayanza: E.Ndayishimye 76%; A.Rwasa 17%
7)Komine Gasogwe mu ntara ya Muyinga: E.Ndayishimye 35472: A.Rwasa 4346
8)Komine Cendajuru mu ntara ya Cankuzo: E.Ndayishimiye 13500; A.Rwasa 3900
9)Komine Rango mu ntara ya Kayanza :E.Ndayishimye 84%; A.Rwasa 9%
10)Komine Gahombo mu ntara ya Kayanza: E.Ndayishimiye 70%; A.Rwasa 25%
11)Komine Muruta mu ntara ya Kayanza: E.Ndayishimiye 78%; A.Rwanda 15%
12)Komine Itaba mu ntara ya Gitega: E.Ndayishimiye 25233; A.Rwasa 3119
13)Komine Kabezi mu ntara ya Bujumbura: E.Ndayishimye 73.9%; A.Rwasa 24.6%
15)Komine Mutambu mu ntara ya Bujumbura : E.Ndayishimye 14444; A.Rwasa 8003
16)Komine Nyamurenza mu ntara ya Ngozi: E.ndayishimye 70% ; A. Rwasa 18%
Igihugu cy’Uburundi gifite amakomine 119. Ibarura ry’amajwi rirakomeje mu makomine kandi uko komine irangije kubarura amajwi ari guhita ashyirwa ahagaragara. Iyi mibare y’amajwi tuyikesha komisiyo y’amatora muri buri komine (CENI) n’itangazamakuru ryigenga ry’i Burundi.
Veritasinfo.