Centrafrique: Inkotanyi zananiwe gufungura umuhanda uva muri Cameroun!

Ibintu bikomeje kugenda nabi mu gihugu cya Centrafrique nyuma y’amatora yabaye muri icyo gihugu! Kuri uyu wa gatandatu taliki ya 09/01/2021 ubwoba bwinshi bwatashye abagize guverinema ya Centrafrique bitewe n’uko intambara itangiye gusatira umurwa mu kuru w’icyo gihugu ariwo Bangui. Muri gahunda yo guhumuriza abaturage batuye muri uwo mujyi, perezida w’icyo gihugu Faustin Touadera yasabye leta y’Ubufaransa guhagurutsa indege z’intambara zayo kugirango zizenguruke ikirere cy’umurwa mukuru, bityo abaturage babone ko barinzwe ku buryo bukomeye!

Muri aka kanya twandika iyi nkuru , izo ndege z’intambara z’abafaransa ziri kuzenguruka umurwa mukuru wa Centrafrique, nubwo bimeze gutyo ariko umutima w’abaturage ntabwo uri mu gitereko cyane ko umurwa mukuru wa Centrafrique utangiye kugira ibibazo byo kutagemurirwa ibicuruzwa kuko imitwe yitwaje intwaro igenzura igice kinini cya Centrafrique ; iyo mitwe ikaba yarafunze imihanda yose inyuzwamo ibicuruzwa bigemurwa mu murwa mukuru wa Bangui. Ubwo Perezida wa Centrafrique yagiranaga amasezerano y’ibanga na Paul Kagame , bumvikanye ko amwoherereza abacancuro b’inkotanyi bagomba kurwanya inyeshyamba zafunze umuhanda munini kandi w’ingirakamaro cyane uhuza umurwa mukuru wa Centrafrique Bangui n’igihugu cya Cameroun.

Uko ibintu bihagaze ubu , ni uko inkotanyi ziri kurwana ikinyumanyuma zisubira mu murwa mukuru wa Centrafrique naho inyeshyamba zikaba ziri kugenda zisatira Bangui.  Hafi y’umurwamukuru wa Centrafrique hakaba hatangiye gushingwa inkambi nyinshi z’impunzi z’abaturage bari kuva mu byabo kubera imirwano. Bamwe mu bayobozi ba Centrafrique bari muri leta ya Faustin Touadera batangiye kwibaza niba leta yabo irakomeza guhemba abacancuro ba RDF Kagame kandi ikiraka bahawe cyo kurwanya inyeshyamba gikomeje kubananira! Iyi ntambara kandi iri kubera muri Centrafrique irimo amayeri menshi cyane, urugero rutari kure ni uburyo igihugu cy’Ubufaransa cyohereje indege z’intambara zikomeye muri Centrafrique mu gufasha leta iriho kurwanya inyeshyamba kandi mu byukuri izo nyeshyamba zidakoresha indege!

Ese abacancuro b’abarusiya bo bakora iki? Abakurikiranira hafi ibibera muri Centrafrique , bemeza ko ibihugu bikomeye bibeshya ko bishyigikiye leta iriho muri icyo gihugu aribyo bishyigikiye inyeshyamba zirwanya iyo leta kuko ari nazo zigenzura ibirombe byinshi bicukurwamo amabuye y’agaciro! Abakurikiranira hafi ibibera muri Centrafrique bakaba babona intambara zaho zitazarangira mu bihe byavuba. Ikibazo gisigaye ni ukumenya niba ingabo z’abacancuro zahawe ikiraka muri Centrafrique zizahaguma igihe kirekire mu gihe inyeshyamba zikomeje gusatira umurwa mukuru w’icyo gihugu!

Veritasinfo.

Veritas

2 Comments

  1. Ba mpatsibihugu ntibagikoresha intambara zo ku butaka kuko zica abasilikare ( nbiyo yaba umwe!)kandi Leta zigomba gusobanura impanvu z izo mpfu z’ abenegihugu b abasilikare! Gukoresha abacancuro rero ni andi andi mayeli ngo badatakaza ababo.

Leave a Reply