Centrafrique: Umurwa mukuru “Bangui” wagoswe n’ingabo z’inyeshyamba!

Uwahoze ari ministre w’intebe muri Centrafrique Bwana Martin Ziguélé yatangaje ko ingabo z’imitwe yishyize hamwe irwanya leta ya Centrafrique (RCA) zagose umurwa mukuru w’icyo gihugu Bangui kuri iki cyumweru taliki ya 31 Mutarama 2021!

Bwana Ziguélé yavuze ko imirwano iri kuba mu gihugu cyose cya Centrafrique kandi ko we ubwe adashobora gusohoka mu nzu ye iri mu murwa mukuru wa Bangui adaherekejwe n’abasilikare kubera imirwano iri kuwuberamo.

Abarwanyi b’imitwe 6 irwanya ubutegetsi muri RCA bishyize hamwe maze biyemeza gukuraho ubutegetsi buriho. Abigiriwemo inama na ONU, Perezida wa RCA  Bwana Faustin Archange Touadéra yiyambaje ingabo z’Uburusiya ndetse n’inkotanyi za Paul Kagame kugirango zimufashe kubohoza igice kinini k’igihugu kigenzurwa n’abarwanyi bo mu mitwe imurwanya! Aho kugirango izo ngabo yiyambaje zigaruze ibice by’igihugu byafashwe n’inyeshyamaba, ahubwo zagiye zirwana ikinyumanyuma kuburyo imirwano igeze mu murwa mukuru wa Bangui!

Kubera ingabo z’Uburusiya n’inkotanyi zatabaye Faustin Archange Touadéra, byatumye akoresha amatora y’umukuru w’igihugu  ya nyirarureshwa  kugirango agume ku butegetsi byitwako yatowe n’abaturage! Ibyo byatumye ashyira ku ruhande umukandida François Bozizé wigeze kuyobora icyo gihugu , bituma nawe yifatanya n’inyeshyamba ubu zigiye gufata igihugu cyose kandi byitwa ko hari ingabo zo Loni zirenga ibihumbi 12!

Abaturage bavuye mu byabo bari mu makambi ari hafi y’umurwa mukuru wa Bangui

Centrafrique ni kimwe mu bihugu binini kandi bikize ku mabuye y’agaciro menshi nka Diyama na Iraniyumu ku isi ariko akaba ari nacyo gihugu gifite abaturage babakene ku isi! Umubare munini w’abaturage ba RCA ubeshejweho n’imfashanyo z’ibiribwa bahabwa n’Umuryango w’Abibumbye ONU!

Imitwe irwanya ubutegetsi muri RCA ivugako itagambiriye kurwanya ingabo za Loni ko ahubwo yaje kwirukana abacancuro b’Inkotanyi n’Abarusiya bavogereye igihugu cyabo. Abakuru b’ibihugu by’Afurika y’ibiyaga bigari barasaba ko izo nyeshyamba zishyira intwaro hasi ariko birasa naho icyo cyifuzo cyabo gisa no guca umugani ku manywa kuko igihugu cyose kigiye gufatwa nazo!

Veritasinfo

Veritas

Leave a Reply