France-Rwanda: Twizereko Emmanuel Macron azasimbuka umwaku wa Paul Kagame!

Kuri iki cyumweru taliki ya 24/04/2022, Abafaransa barazindukira mu matora y’ikiciro cya kabiri yo gutora uzaba umukuru w’igihugu mu gihe cy’imyaka 5 iri imbere hagati ya Emmanuel Macron na Madame Marine Le Pen. Kubera igihagararo n’amateka igihugu cy’Ububafaransa gifite ku isi, amatora y’Ubufaransa akurikiranwa n’isi yose. Aya matora ahanganishije ku nshuro ya kabiri Emmanuel Macron na Marine Le Pen ateye amatsiko yo kumenya uko azitabirwa bitewe n’uko Abafaransa benshi batifuzaga ko aba bakandida bombi bongera guhurira mu cyiciro cya nyuma cy’amatora, kuburyo hari impungenge ko Abafaransa benshi bazifata ntibajye gutora!

Nubwo aba bakandida bombi badashimishije Abafaransa benhsi, abantu banyuranye barimo n’abayobozi b’ibihugu bari hirya no hino ku isi bari gukurikiranira hafi aya matora yo mu Bufaransa, kuko aba kandida bombi bahanganye bafite gahunda zitandukanye cyane z’uburyo bazayobora Ubufaransa kuri buri wese aramutse atorewe uwo mwanya! Abakuru b’ibihugu benshi bifuzako Emmanuel Macron yakongera gutorerwa uwo mwanya wo kuba perezida w’Ubufaransa mu ri iyi myaka 5 iri imbere . Muri abo bakuru b’ibihugu bashyigikiye itorwa rya Emmanuel Macron harimo na mushuti we Paul Kagame!

Nk’uko byatangajwe n’ikinyamakuru « igihe« , Paul Kagame yavuze ko Madame Marine Le Pen aramutse atowe byaba ari ikibazo gikomeye ku Rwanda no ku Bufaransa! Kagame yagize ati : « Ku bijyanye no kuba wenda mu gihe gito kiri imbere habaho Perezida Le Pen, icya mbere ntekereza ko byaba ikibazo gikomeye ku Bufaransa kurusha ku Rwanda, kubera ko uwaba perezida wese, tubana na bo uko dukwiye kubana na bo ku buryo nta kiduhungabanya. Rero, ntekereza ko urebye ahahise he, ibyo abantu bamuvugaho n’ibyo yivugaho ubwe, ashobora kuba ikibazo ku Bufaransa, ku Rwanda, kuri Afurika, ndetse wenda no ku bandi Banyaburayi, ariko nanone ntabwo ari njye ugena uba Perezida w’igihugu icyo aricyo cyose, uretse n’u Bufaransa. »

Izi mpungenge za Paul Kagame zifite ishingiro, Madame Marine Le Pen aramutse atorewe umwanya wo kuba umukuru w’igihugu cy’Ubufaransa, ibinyoma byose Macron na Kagame babeshye Abafaransa ku nyungu zabo bwite yabitera ishoti kandi akabishyira ahagaragara! Ntabwo Madame Marine Le Pen ashobora kwemera ko Ubufaransa bwagize uruhare urwo arirwo rwose muri génocide yabaye mu Rwanda kandi nta nubwo ashobora guhishira ubwicanyi ndengakamera Paul Kagame na FPR bakoze kandi bakomeje gukorera Abanyarwanda n’Abacongomani ku nyungu iyo ariyo yose! Aha akaba ariho gahunda ya Madame Le Pen ifitiye imbaraga nyinshi ku bafaransa bemera ibitekerezo bye ku buryo mu itora ryo kuri iki cyumweru ashobora gutungura benshi agatorerwa umwanya wo kuba umukuru w’igihugu cy’Ubufaransa.

Kuva Paul Kagame yabohoza igihugu cy’u Rwanda, abayobozi b’inshuti ze bakoze mu biganza bye bagiye mu matora barayatsinzwe kandi n’abatarayagiyemo bagiye bava ku buyobozi mu buryo bubi cyane! Abafaransa ntibazibagirwa Nicolas Sarkozy wabaye inshuti y’akadasohoka ya Paul Kagame akimara gutorerwa kuba Perezida w’Ubufaransa, ariko yakongera kwiyamamariza uwo mwanya agatsindwa na François Hollande mu mwaka w’2012. Sarkozy ntiyashizwe kuko mu mwaka w’2017 nabwo yongeye gushaka kwiyamamariza umwanya w’umukuru w’igihugu cy’Ubufaransa ariko ntiyarenga umutaru kuko yahise atsindwa mu matora yakozwe n’ishyaka rye ry’Aba Républicains, aho niho hagaragariye ko umwaku wa Paul Kagame ari umuranduranzuzi! Macron nawe akimara gutorwa nka Perezida w’Ubufaransa yishyize mu maboko ya Paul Kagame, none ubu arashaka kongera gutorerwa indi manda, naramuka ashoboye gutorwa bizaba bigaragaye ko Paul Kagame yajyanye n’umwaku we, Kagame mushya alias David Ndahiro akaba adatera umwaku!

Ibyo aribyo byose amahitamo ya Paul Kagame mu matora y’Ubufaransa yiciye ijisho Abafaransa bafite inkomoko mu Rwanda no mu karere k’ibiyaga bigari yo kubona neza uwo bazahundagazaho amajwi yabo hagati ya Emmanuel Macron na Madame Marine Le Pen!  Twifurije Abafaransa kugira amatora meza azira itekinika.

Veritasinfo.