France-Rwanda: Urukiko rw’ubujurire rwa Paris rwemeje ko iperereza ku ihanurwa ry’indege ya Habyarimana rihagarara burundu!

Mu gitondo cyo kuri uyu wa gatanu taliki ya 3 Nyakanga 2020, urukiko rw’ubujurire  rw’igihugu cy’Ubufaransa ruherereye i Paris, rwemeje ko iperereza ryo kumenya abantu bagize uruhare mu ihanurwa ry’indege yarimo perezida Juvénal Habyarimana w’u Rwanda na Cyprien Ntaryamira w’Uburundi ku italiki ya 6 Mata 1994 i Kigali,  rihagarara burundu nk’uko byasabwe n’ubushinjacyaha bw’Ubufaransa.

Ihanurwa ry’iyo ndege ni ryo ryabaye imbarutso ya jenoside mu Rwanda mu mwaka w’1994. Umwe mu bakobwa b’umupilote w’umufaransa waguye muri iyo ndege niwe wa mbere watanze ikirego mu rukiko rw’Ubufaransa mu mwaka w’1997 cyo kumenya abantu bagize uruhare mu ihanurwa ry’iriya ndege. Mu kwezi kwa Gatatu mu mwaka w’1998, ubugenzacyaha bw’Ubufaransa niho bwatangiye iperereza ryo kumenya abangize uruhare mu ihanurwa ry’iyo ndege.

Taliki ya 22/11/2006, umucamanza w’umufaransa Jean Louis Bruguière wari uyoboye iryo perereza yatanze impapuro zo guta muri yombi abasilikare ba FPR inkotanyi bashinjwa kugira uruhare mu ihanurwa ry’indege ya Habyarimana. Icyo cyemezo cyarakaje Kagame cyane maze ahita ahagarika umubano w’u Rwanda n’Ubufaransa, ndetse ashinja abayobozi bakuru b’Ubufaransa n’ingabo z’icyo gihugu gukora jenoside y’abatutsi mu Rwanda.

Perezida w’Ubufaransa Nicolas Sarkozy yagerageje kumvikana na Kagame maze yirukana umucamanza Bruguière ashyiraho abandi bacamanza bo gutekinika iriya dosiye y’indege yashinjaga Kagame n’inkotanyi ugira uruhare mu ihanurwa ryayo; umubano hagati ya Kagame na Sarkozy ukaba waratumye ambasaderi w’Ubufaransa asubira i Kigali.

Perezida François Hollande yasimbuye Sarkozy, ubucamanza bw’Ubufaransa bwongera gufungura dosiye y’iperereza ryo kumenya abahanuye indege ya Habyarimana, ibyo bikaba byararakaje Kagame maze yanga kwakira ambasaderi mushya Ubufaransa bwari bwohereje mu Rwanda. Kuva mu mwaka w’2015, Ubufaransa bukaba budafite ambasaderi i Kigali.

Perezida Emmanuel Macro amaze gutorerwa kuyobora Ubufaransa yahise aba inshuti magara ya Paul Kagame, maze bumvikana ko iperereza ryo kumenya abahanuye indege ya Habyarimana rifungwa burundu kugirango umubano hagati y’abo bakuru b’ibihugu bombi urusheho gusagamba, icyo cyemezo cyabo ba perezida akaba aricyo cyashyizwe mu bikorwa kuri uyu wa gatanu taliki ya 3 Nyakanga 2020 n’ubucamanza bw’Ubufaransa.

Nubwo ariko urukiko rw’Ubujurire rw’i Paris rwemeje ko iryo perereza ryahagaritswe, abunganizi b’imiryango yabuze ababo baguye muri iyo ndege bahise batangaza ko bajuririye icyo cyemezo mu rukiko rusesa imanza rw’Ubufaransa, bityo dosiye yo kumenya abahanuye indege ya Habyarima ikaba ikomeje!

Icyemezo cyafashwe n’urukiko rw’ubujurire rw’i Paris cyo guhagarika iperereza ryo kumenya abahanuye indege ya Habyarimana, cyakuruye urwicyekwe rwinshi mu bafaransa banyuranye bavuga ko ubucamanza bw’igihugu cyabo butigenga nk’uko babyibwiraga! Ikindi giteye urujijo ni uko Kagame yishimira ihagarikwa ry’iperereza ryo kumenya abakomye imbarutso ya jenoside y’abatutsi mu Rwanda kandi akunze kuvuga ko ari umucunguzi wabo kandi ko atariwe wahanuye iriya ndege.

Niba ari uko bimeze, ni iyihe mpamvu ituma Kagame adashaka ko abakomye imbarutso ya jenoside y’abatutsi batamenyekana kandi ngo babiryozwe?

Amateka niyo azaduha igisubizo.

Veritasinfo 

S’abonner
Notifier de
guest
0 Commentaires
Inline Feedbacks
View all comments