Igihugu cya Danemariki kizajya cyohereza mu Rwanda no muri Eritreya impunzi zigihungiyemo!

Kuri uyu wa kane taliki ya 03/06/2021, inteko ishingamategeko y’igihugu cya Danemariki yatoye itegeko ryemeza ko umunyamahanga wese ukojeje ikirenge muri icyo gihugu afite umugambi wo kugisabamo ubuhungiro azajya yurizwa indege ku ngufu, akajyanwa mu gihugu kiri hanze y’umugabane w’Uburayi !

Kwirukana abasaba ubuhungiro mu bihugu byo ku mugabane w’Uburayi, ni icyifuzo gishyizwe imbere cyane n’amashyaka y’abahezanguni atsimbaraye ku byacyera ari mu bihugu byinshi byo kumugabane w’Uburayi. Ishyaka riharanira imibereho myiza na demokarasi riyobowe na Mette Frederiksen riri ku butegetsi mu gihugu cya Danemariki akaba ariryo rishoboye kugera kuri iyo ntego yo gukumira impunzi ku mugabane w’Uburayi.

Iryo tegeko ryatowe n’abadepite ba Danemariki rivigako umuntu wese usaba ubuhungiro uzakandagiza ikirenge ku butaka bw’icyo gihugu azahita yurizwa indege akoherezwa mu Rwanda, muri Eritereya cyangwa se mu kindi gihugu cyose kitari ku mugabane w’uburayi kizemera kwakira impunzi Danemariki izajya icyoherezamo. Iryo tegeko ryemeza ko ibihugu Danemariki izajya yoherezamo impunzi bizajya bihabwa amafaranga atubutse !

Impunzi z’abanyafurika zishaka kujya mu burayi zigurishwa ku isoko nk’amatungo mu gihugu cya libiya

Mu gihe izo mpunzi zizaba zimaze kugezwa muri ibyo bihugu, Danemariki izubakamo inkambi , ishyiremo n’ibiro bigomba gusuzuma amadosiye y’abasaba ubuhungiro muri Danemariki . Impunzi zizahabwa ubuhungiro zizajya zikurwa muri ibyo bihugu zijyanwe muri Danemariki, naho izitazahabwa ubuhungiro zizajya zirukanwa ku butaka bw’ibihugu byazakiriye bikozwe na leta z’ibyo bihugu.

Amashyirahamwe arengera uburenganzira bw’ikiremwamuntu muri Danimariki afite impungenge z’uko iryo tegeko ryatowe rigiye kwambura abantu uburenganzira bwo guhunga (droit d’aile) mu gihe n’ibindi bihugu byo k’umugabane w’Uburayi byaramuka nabyo byemeje iryo tegeko rikumira ubuhunzi ku mugabane w’Uburayi. Ayo mashyirahamwe kandi abona ntacyo iryo tegeko rizahindura ku mubare w’impunzi zijya ku mugabane w’Uburayi kuko umwaka ushize wonyine igihugu cya Danemariki cyakiriye abanyamahanga basaba ubuhunzi 1500 gusa !

Ikindi giteye impungenge kurushaho ni uko ibihugu Danemariki yatoranyije byo koherezamo impunzi ziyihungiyemo biri ku rutonde rwa nyuma rw’ibihugu bihungabanya uburenganzira bwa muntu ku isi ! Ese aho amasomo ibihugu byo kumugabane w’Uburayi biha isi yose yo kurengera uburenganzira bwa muntu ntiyaba ari baringa ? Kohereza impunzi zivuye mu bihugu by’Afurika zifuza kujya mu Burayi, zikoherezwa mu Rwanda no muri Eritreya kugirango ibyo bihugu bihabwe amafaranga,  bizafatwa nko gucuruza Abanyafurika nk’uko byahoze mu gihe cy’ubucakara!

Veritasinfo

Soyez le premier à commenter

Poster un Commentaire

Votre adresse de messagerie ne sera pas publiée.