Leta ya RD Congo yafatiye ibyemezo bikomeye u Rwanda kubera inkunga ruha M23!

Bikomeje kugaragara ko Leta ya Paul Kagame ikomeje  gukwiza iterabwoba mu karere k’ibiyaga bigari mu izina ry’umutwe wa M23! Nk’uko byagenze mu mwaka w’2013 , mu mirwano yabereye mu ntara ya Kivu y’amajyaruguru muri iki cyumweru gishize, ingabo za RDF  mu izina rya M23 zongeye gutakaza intwaro nyinshi kandi zikomeye mu mirwano yabereye mu karere ka Rutshuru muri Kivu y’amajyaruguru.

Mu mashusho yashyizwe ahagaragara na  Radiyo mpuzamahanga y’Abanyamerika VOA,  kuri uyu wa gatatu taliki ya 25/05/2022.; ingabo za Congo FARDC zifatanyije n’ingabo za Monusco  (ONU) ziri muri Congo, zasenye intwaro zikomeye z’ingabo z’u Rwanda zirimo: imbunda zihanura indege, imbunda zirasa ibisasu bya muzinga (Chars) ndetse n’ububiko bw’amasasu menshi, hafatwa n’abasilikare benshi ba RDF biyita abarwanyi ba M23.

M23 iba mu Rwanda, yakurahe ubushobozi bwo kubona intwaro nk’iyi niba atarirwo rutera Congo?

Kubera ibyo bikorwa byo guteza umutekano mucye muri Congo bikozwe n’u Rwanda, Inama nkuru ishinzwe umutekano ya  Repubulika Iharannira Demokarasi ya Congo yarateranye kuri uyu wa gatanu taliki ya 27/05/2022 maze ifatira u Rwanda ibyemezo bikomeye. Mu itangazo ryashyizwe ahagaragara n’umuvugizi w’iyo nama yagize ati:

[« Ibimenyetso duhabwa n’ingabo zacu FARDC ziri ku rugamba,  amafoto n’amashusho y’ibibera ku rugamba yafashwe n’ izo ngabo ndetse n’ubuhamya bunyuranye butangwa n’abaturage bari mu karere kaberamo imirwano, biduha ibimenyetso bihagije byerekana ko umutwe wa M23 ushyigikiwe n’ingabo z’u Rwanda RDF.

Iyo myitwarire mibi y’u Rwanda ikaba igamije kuburizamo ingamba zose  Leta ya Repubulika Iharanira Demokarasi ya Congo yafashe zo gushyira mu bikorwa ibyemezo byo kugarura amahoro byumvikanyweho mu biganiro biri kubera i Nairobi (Kenya). Kubera iyo mpamvu, « Inama nkuru y’igihugu ishinzwe umutekano » ifashe ibyemezo bikurikira:

1)Umutwe wa M23 wemejwe nk’umutwe w’iterabwoba kandi ukaba ugobwa gufatwa gutyo; bityo uwo mutwe ukaba utagomba kwemerwa mu biganiro biri kubera i Nairobi.

2)Kwiyama no kwihaniza Leta y’u Rwanda kubera imyitwarire yarwo yo kuburizamo ibiganiro by’amahoro biri kubera i Nairobi, aho imitwe yose yitwaje intwaro uretse M23 iri kuganira ku bikorwa byo kugarura amahoro n’umutekano. 

3)Ku buryo bw’agateganyo, byemejwe ko ibikorwa bya sosiyete y’indege ya RwandAir bihagritswe ku butaka bwa Repubulika Iharanira Demokarasi ya Congo.

4)Hafashwe kandi icyemezo cyo guhamagaza ambasaderi  uhagarariye u Rwanda muri RD Congo  uri i Kinshasa, kugirango amenyeshwe ibyemezo bya leta ya Congo byamagana imyitwarire mibi y’u Rwanda . »]

Veritasinfo