M23 ishyize mu kaga ubutegetsi bwa Paul Kagame! Ubwongereza bugaharitse inkunga bwateraga u Rwanda.

Umwami w'Ubwongereza Charles ari kumwe na Paul Kagame mu nama ya CHOGM muri kamena 2022 i Kigali

Inkuru yanditswe n’ikinyamakuru cya «tempête des tropiques» ikaba yananditswe n’ikinyamakuru cya «Jeune Afrique» mu nkuru zanditse icyo kinyamakuru kigenera abafatabuguzi bacyo, iyo nkuru iramenyesha ko leta y’Ubwami bw’abongereza (Royaume Uni) bugizwe n’igihugu cy’Ubwongereza na Irlande ya ruguru yafashe icyemezo cyo guhagarika inkunga Ubwami bw’Ubwongereza bwahaga u Rwanda; iyo nkunga ikaba  ingana na miliyoni 21 z’amafarango yo mu Bwongereza, ihwanye na 29.934.840.000 z’amafaranga y’u Rwanda.

Icyemezo cyo guhagarika iyo nkunga ku Rwanda kikaba cyarafashwe mu kwezi kwa cumi na biri 2022. Ubwami bw’Ubwongereza bukaba bwemeza ko bwafashe icyo cyemezo bitewe n’uko akanama k’Umuryango w’Abibumbye ONU, gashinzwe amahoro ku isi kemeje ku buryo budasubirwaho ko leta y’u Rwanda itera inkunga ku mugaragaro umutwe w’ibyihebe bya M23 mu guhungabanya umutekano mu gice cy’Uburasirazuba bwa Repubulika iharanira Demokarasi ya Congo ndetse u Rwanda rukaba rwarohereje abasilikare barwo muri uwo mutwe.

Mu gihe Ubwami bw’Ubwongereza bwahagarikaga inkunga bwateraga u Rwanda, bwahise bufata icyemezo cyo guha leta ya Repubulika iharanira demokarasi ya Congo inkunga ihwanye na miliyoni 18 z’amafaranga akoreshwa mu Bwongereza kugirango bugoboke abaturage barenga ibihumbi 600 bakuwe mu byabo muri Kivu y’amajyaruguru n’ibyihebe bya M23. Iyi nkuru mbi yo guhagarika inkunga ku Rwanda niyo yatumye kuri uyu wa mbere taliki ya 11/01/2023 Paul Kagame yaravuze ijambo ryuzuye uburakari ari imbere y’inteko y’abadepite be aho yemeje ko agiye kwirukana impunzi z’abakongomani ziri mu Rwanda ngo bitewe n’uko arembejwe n’ibitutsi by’amahanga!

Mu ijambo rye imbere y’abadepite, Paul Kagame yagize ati : «…Ducumbikiye izi mpunzi zavuye muri RDC mu gihe kirenga imyaka 20, ndetse Perezida wa Congo uriho ubu ubwo twari tukiganira, iki kibazo nakimugejejeho ubwo yageraga ku butegetsi ndetse mubwira inkuru ndende y’ibi byose irimo n’ibyo twagiye tugerageza gukora mu gukemura iki kibazo. Namubwiye ko ndetse twanatekereje kuba twakwakira aba bantu tukabagira abaturage bacu kugira ngo baruhuke nk’uburyo bwo gukemura ikibazo ariko nanamubwiye ikibazo cyari kuba muri iyo gahunda.»

Birazwi neza ko guhera mu mwaka w’1990, Paul Kagame na FPR bagiye kureba Abatutsi bo muri Congo kugirango babafashe urugamba rwo kubohoza u Rwanda; FPR yamara gufata ubutegetsi nabo ikazabafasha gufata ubutegetsi muri Congo (Zaïre)! Nyuma yo kubohoza Congo n’u Rwanda, ntabwo Abatutsi bo muri Congo babonye ibyo Kagame na FPR babijeje. Kagame yahisemo kuzana abo Batutsi b’abakongomani mu nkambi mu Rwanda ahitamo ku baha mu kivunge ubwenegihugu bw’u Rwanda! Iryo banga ry’uko Abatutsi bo muri Congo bahawe ubwenegihugu bw’ubunyarwanda Kagame yarimeneye perezida wa Congo Félix Tshisekedi, ahita amenyako Abatutsi bo muri Congo ari Abanyarwanda kurusha uko ari Abacongomani!

Uko iminsi igenda ishira, niko ikibazo cy’Abatutsi bo muri Congo Kagame yahaye ubwenegihugu bw’ubunyarwanda kiri kugenda kimukomerana! Abo batutsi bo muri Congo barasaba Kagame kubahiriza amasezerano bagiranye guhera mu w’1990 ubwo barwaniraga FPR maze akabageza ku butegetsi muri Congo. Kagame yananiwe kubahiriza ayo masezerano none atangiye kuvugako abo Batutsi bo muri Congo yahaye ubwenegihugu bw’u Rwanda agiye kubirukana mu Rwanda! Birumvikana ko Kagame nanirwa kubahiriza amasezerano yagiranye n’aba Batutsi bo muri Congo yakuye mu byabo, akabateranya n’Abacongomani, hashobora kuvuka intambara ikomeye hagati y’Abatutsi bo muri Congo na Kagame?

Kuba Kagame yaremereye perezida wa Congo ko Abatutsi bo muri Congo yabahaye ubwenegihugu bw’u Rwanda, bishimangira imvugo y’abaturage ba Congo yemezako Abatutsi baba muri Congo ari Abanyarwanda. Irindi kosa rikomeye Kagame yakoze ni uko yita Abatutsi bo muri Congo bari mu Rwanda impunzi kandi azi neza ko izo mpunzi yazihaye ubwenegihugu! Iyo impunzi ihawe ubwenegihugu n’igihugu yahungiyemo ihita iba umuturage w’icyo gihugu ntabwo iba ikitwa impunzi! Kuba Kagame yariyemereye ubwe ko yahaye ubwenegihugu bw’ubunyarwanda Abatutsi bo muri Congo bahungiye mu Rwanda , bihita bishimangirako ibyihehe byo mu mutwe wa M23 ari Abanyarwanda buzuye kuko bahawe ubwenegihugu bw’u Rwanda!

Iri jambo Kagame yavuze ku kibazo cyo kwirukana abakongomani baba mu Rwanda, umuvugizi wa leta ya Congo yagize icyo akivugaho kuri radiyo mpuzamahanga y’Ubwongereza BBC. Bwana Muyaya yavuze ko atumva uburyo Kagame yakwakira impunzi zivuye mu Bwongereza kuko buzamuha amafaranga menshi (gucuruza impunzi) ariko akirukana zivuye muri Congo! Muyaya yavuze kandi ko impunzi z’ Abacongomani zahungiye mu Rwanda mu gihe ikirunga cya Nyiragongo cyarukaga zifuje guhita zisubira muri Congo. Muyaya asanga ikibazo cy’impunzi muri Congo giterwa n’intambara Kagame ahora ashoza kuri icyo gihugu , akaba asanga Kagame adashobora gukomeza gushyira imbere ikibazo cyo kurengera abantu b’ubwoko bumwe yica abandi. (fungura amajwi hasi aha).

Veritasinfo