ONU yemeza ko leta zimwe zakoresheje icyorezo cya Covid-19 nk’intwaro yo kurwanya abatavuga rumwe nazo!

Umunyamabanga Nshingwabikorwa w'ishyaka RDI-Rwanda Rwiza Ambasaderi Mbonimpa Jean Marie yifatanyije na bamwe mu Banyarwanda bari mu Busuwisi mu kugeza ikibazo cya Madame Yvonne Idamange mu ishami rya ONU rishinzwe uburenganzira bwa muntu CDH.

Kuri uyu wa mbere taliki ya 22/02/2021, Umunyamabanga Mukuru wa ONU Bwana Antonio Guterres, yatangaje ko yababajwe n’uko leta z’ibihugu bimwe atavuze amazina yabyo, zagize urwitwazo icyorezo cya Covid-19,  izo leta zikaba zikoresha uburyo bwo kwirinda icyo cyorezo nk’intwaro yo kurwanya abatavuga rumwe nazo ndetse no gucecekesha itangazamakuru.

Mu ijambo ry’Umunyamabanga Mukuru wa ONU rifungura inama ya 46 y’ishami rya ONU rishinzwe uburenganzira bw’ikiremwamuntu CDH (Conseil de Droit de l’Homme) yagize ati: « Mu gushyira imbere icyorezo cya Coronavirus byafashwe nk’urwitwazo, bituma abategetsi b’ibihugu bimwe bafata ibyemezo bikakaye byo gukaza umutekano ndetse bafata n’ingamba zihutiweho zo gucecekesha abantu banenga ubuyobozi bwabo. Abayobozi b’ibyo bihugu bihutiye kubuza ababituye uburenganzira bwabo bw’ibanze, bacecekesha itangazamakuru ndetse babangamira n’imikorere y’imiryango idashamikiye kuri leta. »

Iyo nama rusange ya 46 y’ishami rya ONU rishinzwe Uburenganzira bwa muntu iri gukorwa hifashishijwe uburyo bw’ikoranabuhanga mu itumanaho kubera icyorezo cya Covid-19, ibyo akaba aribwo bwa mbere bibayeho mu mateka y’uwo mu ryango. Nubwo bimeze gutyo ariko , iyi nama ya 46 ya CDH nibwo yitabiriwe n’ababakuru b’ibihugu byinshi nk’uko byemejwe n’ambasaderi w’igihugu cy’Ubusuwisi muri ONU Jürg Lauber. Iyi nama ikaba iri kubera ku cyicaro cy’umuryango wa ONU ushinzwe uburenganzira bwa muntu CDH mu gihugu cy’Ubusuwisi; bikaba biteganyijwe ko izarangiza imirimo yayo ku italiki ya 23/03/2021.

Mu ijambo Umuyobozi mukuru w’ishami rya ONU rishinzwe Uburenganzira bwa muntu  (La Haute -Commissaire de l’ONU aux Droits de l’Homme) Madame Michelle Bachelet yavugiye muri iyo nama, yagize ati « gukoresha imbaraga ntabwo aribyo bizahagarika icyorezo, gufunga abanenga ubutegetsi ntibikuraho icyorezo cya Covid-19« . Iyi nama iteranye hashize iminsi micye cyane  bamwe mu Banyarwanda batuye mu gihugu cy’Ubusuwisi bakoreye imyigaragambyo ku cyicaro cya CDH kiri i Genève mu Busuwisi aho basabaga ifungurwa rya Madame Yvonne Idamange Iryamugwiza, washyizwe mu nzu y’imbohe n’ubutegetsi bwa Paul Kagame na FPR Inkotanyi kuko yatinyutse kuvuga ko ubutegetsi bw’inkotanyi bukoresha Coronavirus nk’iturufu ryo gukanda Abanyarwanda ngo baceceke ku karengane bakorerwa.

Madame Yvonne Idamange Iryamugwiza amaze iminsi 6 atawe muri yombi kandi kugeza ubu akaba ataragezwa imbere y’ubutabera kandi amategeko ya leta ya Kagame na FPR Inkotanyi ategeka Ubugenzacyaha kutarenza iminsi 5 butarageza imbere y’ubucamanza umuntu buba bwarafashe! Ibi byerekana ko igihugu cy’u Rwanda gikurikiza amategeko ameze nk’ay’ishyamba!

Veritasinfo

Soyez le premier à commenter

Poster un Commentaire

Votre adresse de messagerie ne sera pas publiée.