RD Congo : Nyuma y’amasaha 6 ahatwa ibibazo, byarangiye Vital Kamerhe afunzwe!

Vital Kamerhe , umuyobozi w'ibiro bya perezida wa Congo

Bwana Vital Kamerhe umujyanama wa Perezida wa Repubulika Iharanira demokarasi ya Congo Félix Tshisekedi (Gisekeramwanzi) yatawe muri yombi kuri uyu wa gatatu taliki ya 8 Mata 2020, akaba acumbikiwe ku buryo bw’agateganyo muri gereza ya Makala. Mbere yo koherezwa muri gereza, Vital Kamerhe akaba yamaze amasaha 6 ari guhatwa ibibazo n’ubushinjacyaha bwa Congo ku cyaha ashinjwa cyo kunyereza umutungo w’icyo gihugu .

Ku isaha ya saa saba z’amanywa ku isaha ya Kinshasa nibwo Vital Kamerhe yitabye Ubushinjacyaha bwa Congo aherekejwe n’abunganizi be babiri mu byerekeraye n’amategeko (avocats) ndetse n’abayoboke benshi bo mu ishyaka rye. Ubushinjacyaha bwa Congo bukaba bwahase ibibazo Vital Kamerhe mu gihe kingana n’amasaha 6 aho yagombaga gusobanura imicungire mibi n’inyerezwa ry’amafaranga yari agenewe imishinga yagombaga gushyirwa mu bikorwa mu minsi 100 nyuma y’aho Félix Tshisekedi yari amaze kugabirwa umwanya wa Perezida wa Repubulika kandi Kamerhe ubwe akaba ariwe wari ushinzwe imicungire ya buri munsi y’amafaranga yari agenewe iyo minshinga!

Kuba Vital Kamerhe yatawe muri yombi kandi ariwe muyobozi mukuru w’ibiro bya Perezida wa Repubulika ya Congo ni uko imiryango itera inkunga (ONG) yakomeje gutunga agatoki Umuyobozi w’ibiro bya perezida wa Repubulika ariwe Vital Kamerhe ko ariwe wacungaga ikigega cy’imari yahariwe imishinga yemejwe na Tshisekedi mu kwezi kwa Werurwe 2019. Nyuma yo kubona amakuru yavuye mubugenzacyaha, umunyamakuru wa radiyo mpuzamahanga y’abafaransa RFI yagize ati : “Muri ayo masaha yose yahatwaga ibibazo kuri iyo micungire mibi y’icyo kigega, ntabwo Vital Kamerhe yashoboye gutanga ibimenyetso bifatika by’imicungire y’imali yari igenewe iyo mishinga kandi ibisobanuro bye bikaba bitashoboye kunyura abagenzuzi b’imali ya leta bamubaza!“.

Abayoboke b’ishyaka rya Vital Kamerhe UNC bafite impungenge z’amakuru atangwa ku birego bishinjwa umuyobozi waryo ( Vital Kamerhe) kuburyo babona ari uburyo bwateguwe bwo kuburizamo amasezerano yagiranye na Félix Tshisekedi i Nairobi muri Kenya yerekeranye n’uko bari bumvikanye ko mu mwaka w’2023 Félix Tshisekedi azamuharira umwanya akaba ariwe wiyamamaza ku mwanya wa perezida wa Repubulika iharanira Demokarasi ya Congo! Mbere yo kumwinjiza muri gereza, abapolisi babanje gutatanya abayoboke b’ishyaka rye bari bateraniye kuri parike, igipolisi kikaba cyabanyanyagijemo imyuka iryana mu maso, kibabwira ko muri ibi bihe byo kwirinda coronavirus abantu barenze 20 batagomba kwegerana!

Abakongomani batangiye gukeka amababa Vital Kamerhe ubwo yari avuye mu bukwe bw’umwana wa Kabarebe i Kigali, akaba yari amaze kwemera ko azaha inka 30 umuryango we kubera ko yashoboye kwica abakongomani benshi !! Ese aho umwaku w’i Kigali siwo wakomeje kumukurikirana?

Ni ukubitega amaso.

S’abonner
Notifier de
guest
0 Commentaires
Inline Feedbacks
View all comments