RDC: Amerika(USA) n’Uburayi bafite impungenge ko «Uburusiya» bushobora kwigarurira RD Congo!

Ku italiki ya 15 kugera ku ya 18 Kanama uyu mwaka, Ministre w’ingabo w’igihugu cya Repubulika Iharanira Demokarasi ya Congo akaba n’inkeragutabara «Bwana Gilbert Kabanda Kurhenga» yakoreye uruzinduko mu gihugu cy’Uburusiya. Muri urwo ruzinduko, Ministre Gilbert Kabanda yitabiriye ibiganiro byabereye i Moscou ku nshuro ya 10 byigaga ku ngingo yo kubungabunga umutekano ku isi. Muri urwo rugendo kandi, Ministre Gilbert Kabanda yaboneyeho umwanya wo kugirana ibiganiro na ministre w’ingabo wungirije w’igihugu cy’Uburusiya «Alexander Fomin» ; abo ba ministre bombi bakaba baraganiriye ku ngingo yerekeranye n’uburyo igihugu cy’Uburusiya gishobora guha RD Congo intwaro n’ibikoresho bya gisilikare bigezweho muri gahunda yo kongera ubushobozi bw’ingabo za Congo FARDC , kugirango zishobore guhangana n’imitwe yitwaje intwaro ifashwa n’ibihugu by’amahanga mu guhungabanya umutekano mu burairazuba bw’icyo gihugu.

Mu biganiro bagiranye, Ministre Gilbert Kabanda yibukije amasezerano y’ubufatanye mu bya gisilikare ari hagati ya Repubulika Iharanira Demokarasi ya Congo n’Uburusiya yashyizweho umukono n’ibihugu byombi mu mwaka w’2018. Igihugu cya Congo kikaba gifite intego yo kuzamura ubushobozi bw’ingabo zayo FARDC kugirango zishobore kubungabunga umutekano w’igihugu cyose mu buryo bworoshye kandi bwihuse. Umuyobozi ushinzwe iterambere n’ubufatanye w’Uburusiya mu karere k’ibiyaga bigari by’Afurika «Bwana Anatoly Punchuk» yijeje ministre Gilbert Kabanda ko igihugu cye cy’Uburusiya kiteguye guha ingabo za Congo FARDC ibikoresho bya gisilikare bigezweho ndetse zigahabwa n’amahugurwa yo kongera ubumenye n’ubushobozi bizazifasha gusohoza inshingano zazo. Bwana Anatoly Punchuk yavuze ko ubutwererane n’umubano w’Uburusiya na RD Congo ufite imizi kuva Congo yabona ubwigenge mu gihe hariho Repubulika y’Abasoviyeti.

Ministre w’ingabo za RDC Bwana Gilbert Kabanda yagiye gusura isoko ry’intwaro z’Uburusiya i Moscou muri Kanama 2022

Uruzinduko rwa ministre w’ingabo wa Congo Gilbert Kabanda i Moscou, rwashimangiye kuburyo budasubirwaho ubushake n’ubushobozi igihugu cy’Uburusiya gifite mu rwego rwo gufasha RD Congo muri ibi bihe ihanganye bikomeye ku rugamba n’umutwe w’iterabwoba wa M23 uterwa inkunga na leta y’u Rwanda ndetse ni iya Uganda. Umujyanama mukuru muri ambasade y’Uburusiya i Kinshasa «Bwana Viktor Tokmakov» akaba yaragaragarije kenshi mu ruhame abagize guverinema ya Congo n’abajyanama ba perezida Félix Tshisekedi ko igihugu cy’Uburusiya kiteguye gutanga inkunga yose ishoboka kugirango igisilikare cya Congo FARDC kigire ibikoresho bya gisilikare bigezweho n’ubumenyi buhagije, bizatuma Congo ishobora kugarura umutekano mu gihugu cyose ndetse no mu karere kose k’ibiyaga bigari.

Mu kwezi kwa gatandatu uyu mwaka, Bwana Viktor Tokmakov uvuga neza ururimi rw’igifaransa,  yongeye gushimangira inkunga y’Uburusiya ku ngabo za Congo FARDC ubwo yagiranaga ibiganiro na Ministre w’Ububanyi n’amahanga wa RD Congo «Bwana Christophe Lutundula», ibi akaba ari ikimenyetso kigaragaza ko Uburusiya bwiyemeje gushinga ibirindiro byabwo muri Repubulika Iharanira Demokarasi ya Congo. Mbere yo kugirwa umujyanama mukuru muri ambasade y’Uburusiya i Kinshasa mu mwaka w’2021, Bwana Victor Tokmakov yari avuye muri ambasade y’Uburusiya i Bangui mu gihugu cya Centrafrique aho yari afite nabwo umwanya w’umujyanama mukuru muri iyo ambasade. Uyu Victor Tokmakov akaba azwiho kuba yaragize uruhare rukomeye mu kuzana umutwe wigenga w’abasilikare b’Abarusiya wa «Wagner» muri Centrafrique.

Abanyaburayi bakaba batinya cyane Victor Tokmakov kuko yashoboye kwegera imitwe myinshi yitwaje intwaro muri Centrafrique kugirango ishobore gukorana na leta y’icyo  gihugu ndetse n’abakuru b’iyo mitwe bakaba barashoboye gukorana neza na Wagner muri Centrafrique, ibyo bikaba byaratumye Centrafrique yigobotora ubuhake bw’Abanyaburayi cyane cyane ingabo z’Abafaransa. Nk’uko byemezwa n’ikinyamakuru cya «Jeune Afrique», Victor Tokmakov ni  umwe mufatanyabikorwa ba Wagner kuva mu mwaka w’2018 aho yafatanyije n’uwo mutwe mu gushinga isosiyete ya «Lobaye Invest» ikora ibikorwa by’ubucukuzi bw’amabuye y’agaciro muri Centrafrique. Kubera imikorere ya Viktor Tokmakov muri Centrafrique n’umwanya afite mu mutwe wa Wagner, byateye ubwoba Abanyaburayi kuva aho yoherejwe muri ambasade y’Uburusiya i Kinshasa kuko babona byanze bikunze agiye kwirukana Abanyaburayi muri RD Congo  nk’uko yabikoze muri Centrafrique!

Abarwanyi ba Wagner biteguye gushinga ibirindiro byabo muri RD Congo

Abanyaburayi babona kandi Viktor Tokmakov azashobora gucengeza amatwara y’Uburusiya mu karere k’ibiyaga bigari abihereye ku bikorwa by’umutekano mucye uri mu burasirazuba bwa RDC uterwa na M23 ; ndetse akanabihera k’uburakari abayobozi bakuru ba guverinema ya Congo bafitiye abanyaburayi bitewe n’uburyo bakomeje kujenjekera ikibazo cy’umutekano mucye muri Congo ahubwo bakaba inshuti z’ibihugu biwuhungabanya. Viktor Tokmakov kandi ahera k’uburakari abacongomani bafitiye ingabo za ONU (Monusco) zananiwe kurwanya imitwe ihungabanya umutekano muri Congo, mu kugaragaza isura nziza y’Uburusiya muri RD Congo no mu karere k’ibiyaga bigari; Ibyo byose bikaba bizatuma umutwe wa Wagner ushobora gushinga ibirindiro muri RD Congo mu buryo bworoshye ndetse n’igihugu cy’Uburusiya kikigarurira akarere kose mu gihe gito!

Muri iki gihe umutwe wa M23 wongeye kubyutsa imirwano, abajyanama ba perezida wa Congo Félix Tshisekedi bakomeje kwinubira uburyo Uburayi n’Amerika byitwako ari inshuti za Congo bananiwe kugira icyo bakora ngo bafashe RD Congo kurwanya M23 n’ibihugu biyishyigikiye ! Uburakari bw’abakongomani bwarushijeho kwiyongera, ubwo mu kwezi kwa Gatandatu uyu mwaka, ibihugu bya Leta zunze Ubumwe z’Amerika, Ubufaransa n’Ubwongereza byakomezaga gushyigikira icyemezo gisaba RD Congo gutanga raporo muri ONU y’ubwoko n’umubare w’intwaro icyo gihugu cyifuza kugura!  RD Congo ikaba isanga icyo cyemezo kiyibangamiye cyane kandi kikaba ari kimwe mu bintu bituma ingabo za RD Congo FARDC zidafite ubushobozi bwo kurangiza inshingano zayo. Mu gihe hatorwaga uwo mwanzuro wo kugura intwaro ku gihugu cya RD Congo, igihugu cy’Uburusiya kikaba cyarifashe kuko gisanga igihugu cya Congo kiri kubangamirwa mu burenganzira bwacyo.

Mu mpera z’ukwezi kwa karindwi, intumwa idasanzwe ya perezida wa RD Congo «Bwana Serge Tshibangu» yagiranye ibiganiro byihariye n’intumwa z’Amerika (USA), Ubufaransa n’Ubwongereza i Kinshasa, kugirango ibyo bihugu byisubireho maze bikureho uriya mwanzuro ubangamiye RD Congo mu kugura intwaroyifuza nta nkomyi. Muri ibyo biganiro Serge Tshibangu akaba yarasobanuriye abahagarariye ibyo bihugu umwuka mubi uri mu baturage, bifuzako igihugu cyabo cya RD Congo cyagirana umubano wihariye n’Uburusiya kugirango bubafashe kugarura umutekano muri RD Congo no mu karere kose k’ibiyaga bigari. Ariko abahagarariye ibyo bihugu ntibahaye agaciro ibyo iyo ntumwa ya Tshisekedi yabasabaga! Uko ibintu bihagaze muri iki gihe i Kinshasa, ni uko Abacongomani benshi ndetse na bamwe mu bagize guverinema ya RD Congo bifuza kugirana umubano usesuye n’Uburusiya, bagashyira Abanyamerika n’Abanyaburayi ku ruhande.

Nubwo bimeze gutyo ariko, perezida wa RD Congo «Félix Tshisekedi» atsimbaraye ku cyifuzo cye cyo gukomeza kugirana umubano mwiza ndetse n’ubufatanye n’igihugu cy’Amerika (USA) ndetse n’Uburayi. Bwana Félix Tshisekedi yakuriye i Burayi, akaba afite ubwenegihugu bw’ububiligi, kwishyira mu maboko y’Uburusiya akibagirwa Uburayi n’Amerika kandi ibyo bice byombi bihanganye asanga atabishobora ! Bamwe mu bajyanama ba perezida wa RD Congo, bavuga ko perezida w’icyo gihugu ari gukora ibishoboka byose kugirango Amerika n’Uburayi bakore ibishoboka byose bagarure umutekano muri RD Congo no mukarere k’ibiyaga bigari Nk’uko yabibwiye umunyamabanga wa Leta muri Amerika ushinzwe ububanyi n’amahanga Antony Blinken. Félix Tshisekedi abona Uburayi n’Amerika birangaye gato, Uburusiya bwakwigarurira akarere kose k’ibiyaga bigari.

Antony Blinken aganira na Félix Tshisekedi i Kinshasa ku kibazo cy’umutwe wa M23

Bamwe mu banyepolitiki bakomeye muri Amerika no mu Burayi bakaba babona ibintu kimwe na Félix Tshisekedi ku buryo mu minsi micye iri imbere Amerika n’Uburayi bagiye gufata ibyemezo bikomeye byo guhindura politiki yabyo mu karere k’ibiyaga bigari. Amerika n’Uburayi barateganya gushyira ibihano bikomeye kuri leta zifasha umutwe wa M23 kugirango ibyo bihugu bikure ingabo zabyo muri Congo kandi bihagarike ubufasha baha imitwe ihungabanya umutekano mu burasirazuba bwa Congo. Hari bamwe mu banyepolitiki bo muri Amerika n’Uburayi bifuzako leta  z’ibihugu byabo zafunga amaso maze zikemerera RD Congo kugirana ubufatanye n’Uburusiya mu byerekeranye n’igisilikare, kugirango ikibazo cy’umutekano mucye muri RD Congo no mu karere k’ibiyaga bigari kirangire burundu.

Nubwo hari amakuru menshi yemeza ko Uburusiya bugiye kohereza intwaro muri RD Congo, ibyo ntibirashoboka mu gihe Félix Tshisekedi  kamwe n’inshuti ze z’Abanyamerika n’Abanyaburayi batarafata icyemezo ndakuka kuri icyo kibazo cy’ubufatanye n’Uburusiya. Impaka zikaba zikomeje kugibwa kuri icyo kibazo ariko mu minsi micye cyane ibintu bikazaba bimaze gusobanuka ! Kugirango RD Congo ishobore gukorana n’Uburusiya n’Abanyaburayi, leta ya Tshisekedi itangiye guhindura imvugo ku kibazo cya Ukraine, RDC ikaba iri kubwira Uburusiya ko ntaho ibogamiye ku kibazo cya Ukraine mu gihe muri ONU, RDC yari yatoye umwanzuro wo kwamagana Uburusiya kubera intambara bwashoye kuri Ukraine. Ubushake bw’Uburusiya n’ubwabacongomani bifuza  gushyigikira ingabo za Congo FARDC  mu kugarura umutekano mu burasirazuba bwa Congo burahari ariko butegereje ijambo rya nyuma rya Félix Tshisekedi !

Ese azabyemera cyangwa ntazabyemera ? Iminsi iri imbere niyo izaduha igisubizo.

Veritasinfo.