RDC: Izina ry’utera umutekano mucye mu karere k’ibiyaga bigari yitwa «u Rwanda» (Perezida Félix Tshisekedi).

Kuwa kabiri taliki ya 17/01/202, mu nama ngarukamwaka mpuzamahanga yiga ku iterambere ry’ubukungu ku isi iri kubera i Davos mu Busuwisi,  nyuma y’ikiganiro kibanze ku bikorwa –remezo bikoresha ingufu zitangiza ikirere, perezida wa RD.Congo Bwana Félix Tshisekedi yasubije ikibazo yabajijwe n’umunyarwandakazi Clare Akamanzi uhagarariye Paul Kagame muri iyo nama. Uwo munyarwandakazi yasabye perezida wa Congo gushyira imbaraga zihagije mu gukemura ikibazo cy’umutekano mucye uri mu karere k’ibiyaga bigari no kwemera kwakira inkunga yose yamufasha gukemura icyo kibazo !

Clare Akamanzi ni umwe mu bayobozi ba komeye ba leta ya Kigali, akaba ashinzwe  urwego rw’igihugu rw’iterambere  RDB, uwo mwanya  mwiza afite mu buyobozi bwa leta ya FPR ukaba umufasha kumenya neza impamvu zitera umutekano mucye mu karere k’ibiyaga bigari. Impunguke z’umuryango w’Abibumbye ONU kimwe n’ibihugu bikomeye birimo Leta zunze ubumwe z’Amerika (USA), Umuryango w’Ubumwe bw’Uburayi (UE), umuryango w’Ubumwe bw’Afurika (UA) na leta ya RD Congo, bose bemezako impamvu y’umutekano mucye mu Burasirazuba bwa Congo iterwa n’igihugu cy’u Rwanda giha inkunga ibyihebe byo mu mutwe wa M23 mu guhungabanya uwo mutekano. Clare Akamanzi akaba yarirengagije nkana uko kuri azi maze abaza perezida wa RD Congo ikibazo gisa n’icyo abafarizayi babajije Yezu kugirango bamute mu mutego! Clara Akamanzi yagize ati :

«Bwana perezida, niba ikibazo cy’umutekano mucye kuri mwe kibahangayikishije, iyaba mwari mufite ubushobozi bwo kugikemura ubwanyu muba mwarabikoze cyera. Ndashaka kubabaza impamvu mudashaka gufatanya n’abandi mu nzira yatanzwe n’ibiganiro byabereye i Nairobi n’i Luanda, mu kubonera igisubizo kirambye icyo kibazo cy’umutekano mucye ? Ndatekerezako igisubizo kiri mu maboko yanyu, ni ngombwa gukorana n’abafite ubushake bwo kubafasha gukemura ibibazo byanyu. Ndi umunyarwandakazi, ndemeza ko umutekano ari ingenzi kugirango duteze imbere ibikorwa by’ishoramari mu bukerarugendo bwo mu karere. Nimukoreshe ubushake bwanyu mu gukemura icyo kibazo».

Mu gusubiza Clare Akamanzi, Perezida wa RD.Congo Félix Tshisekedi yatanze igisubizo kitanyuze ku ruhande maze avuga mu izina nyirabayazana w’umutekano mucye mu karere k’ibiyaga bigari; Perezida wa RD Congo ntiyariye iminwa ,yavuze yeruye ko « u Rwanda » arirwo rutera ikibazo cy’umutekano mucye mu karere kose ; ibyo Félix Tshisekedi yabivuze  muri aya magambo, yagize ati :

«Niba uri umunyarwandakazi, wagombye kumenya ko mu kwezi kwa Cumi na kumwe, habaye impaka zageze ku mwanzuro wo gushyiraho ingamba zigomba gukurikizwa kugirango dushobore kuva muri icyo kibazo. Iyo nama yabereye i Luanda muri Angola, yateraniyemo ibihugu byinshi ndetse by’umwihariko harimo n’intumwa z’ibihugu birebwa n’iki kibazo by’umwihariko aribyo u Rwanda na Repubulika iharanira Demokarasi ya Congo. Muri iyo nama hemejwe ingamba zirimo guhagarika imirwano, gusaba M23 ishyigikiwe n’u Rwanda kuva mu duce twa Congo yafashe vuba na bwangu uhereye ku italiki ya 25/11/2022, ku buryo ku italiki ya 15/01/2023 icyo gikorwa cyagombaga kuba cyarangiye.

Urabibona nawe Madame, umutwe w’ibyihebe wa M23 ushyigikiwe n’u Rwanda, uracyari mu bice bimwe nabimwe bya RD Congo wafashe, nubwo hari igitutu cy’amahanga gishyirwa kuri uwo mutwe, ntibyawubujije kuguma mu birindiro byawo. Ubona uwo mutwe ukora ibikorwa byo kujijisha werekana ko uri kugenda uva mu duce wafashe, ahubwo ukagenda wizengukaho ukatugarukamo. Nakwibutsako hari ubwicanyi bwakozwe mu gace ka Kishishe bwahitanye inzirakarengane z’abantu barenga ijana bukozwe n’uwo mutwe kugirango utere ubwoba  abo baturage maze bahunge akarere batuyemo kuko karimo amabuye y’agaciro menshi.

Ngicyo ikibazo gikomeye dufite, kuko ntushobora gushora imari mu bikorwa by’iterambere ,noneho ngo usubire inyuma ubone andi mafaranga menshi ushora mu bikorwa bya gisilikare kugirango urinde umutekano w’igihugu ngo bikunde. Iyaba twese twari dufite imyumvire imwe nk’uko nabigaragaje nkimara gutorerwa umwanya w’umukuru w’igihugu, nagiye kureba abayobozi b’ibihugu 9 duhana imbibi, mbagezaho umushinga w’iterambere ushobora gutuma ubukungu bw’ibihugu byacu butera imbere, kugirango abaturage bacu bagire imibereho myiza. Nagejeje kubakuru b’ibyo bihugu umushinga wagombaga guteza imbere ubucuruzi n’ubuhahirane hagati y’ibihugu byacu kandi bikazana n’amahoro mu karere, ariko ibyo ntibyagezweho bitewe n’abaturanyi bacu bafite kamere y’ubushotoranyi. Madame, mbabajwe no kukumenyeshako ikibazo cy’umutekano mucye mu karere k’ibiyaga bigari giterwa n’umuntu ufite izina ryitwa u Rwanda»!

Ntacyo Tshisekedi atahaye Kagame ariko aranga aramunanira!

Kuva mu nmwaka w’1996 ubwo FPR yatangiraga kugaba ibitero ku gihugu cya Congo  (yitwaga Zaïre icyo gihe), nta mu perezida wicyo gihugu watinyutse kuvuga ko Kagame n’u Rwanda aribo nyirabayazana w’umutekano mucye mu karere k’ibiyaga bigari uretse Félix Tshisekedi wenyine wabitinyutse! Mu ntangiriro z’ubutegetsi bwe, Tshisekedi yakundanye cyane na Paul Kagame ku buryo abantu benshi bemezaga ko yaguye mu bishuko byo kuvugana n’umwanzi wa Congo, ariko ikimaze kugaragara ni uko Tshisekedi yiyegereje Kagame kugirango arusheho kumumenya neza! Tshisekedi ahubwo akaba ariwe watuye Paul Kagame mu mutego w’ikizere maze akagera n’aho amumenera ibanga ry’uko abakongomani bari mu Rwanda yabahaye ubwenegihugu bw’u Rwanda none gusobanura ko M23 ari abakongomani bikaba byaramunaniye; ibyo bikaba byaratumye Tshisekedi atsinda Kagame igitego cy’umutwe ku kibazo cya M23!

Abanyarwanda bavugako iyo ukubise umurozi wakurogaga ibisazi, iyo agiye kongera bikoroga bya bisazi bigira ubwoba bwo kugufata kuko biba bizi ko wakubise shebuja ;ahubwo birahindukira bigafata uwabituma! Kuba rero Tshisekedi yaratinyutse akavuga kumugaragaro izina ry’umurozi w’akarere kose, ntabwo uwo murozi ashobora kuzongera ku muroga ahubwo ibisazi byitwa M23 yatumaga bizahindukira abe ariwe bifata! None se niba Tshisekedi yaranze kuvugana na M23 ahubwo akavugana na Kagame uyohereza kurwana kandi Kagame akaba yaratsinzwe na Tshisekedi, ubwo yaba akivuganye iki na M23?

Amaherezo ya M23 na Kagame aduhishiye amabanga menshi!