RDC-M23: Ese u Rwanda rufite imbaraga zo guhangana na SADC mu ntambara rudashyigikiwe n’Amerika?

Inama ya SADC i Kinshasa

Kuri uyu wa gatatu taliki ya 17/08/2022, i Kinshasa, mu mu rwa mukuru wa Repubulika Iharanira Demokarasi ya Congo (RDC), hateraniye inama ya 42 ihuje ibihugu 16 bihuriye mu muryango Uharanira iterambere ry’Afurika y’amajyepfo ariwo SADC. Perezida Félix Antoine Tshilombo Tshisekedi wa RDC akaba ariwe watorewe kuyobora SADC asimbuye perezida wa Malawi «Lazarus McCarthy Chakwera». Mu ijambo ritangiza iyo nama , Félix Tshisekedi , perezida wa Congo (RDC) yagaragaje ikibazo nyamukuru iyo nama igomba gusuzuma kijyanye n’inkunga igihugu cy’u Rwanda giha umutwe wa M23 uri mu bikorwa byo guhungabanya umutekano wa Congo n’akarere kose!

Umunyamabanga wa Leta muri Amerika (USA) ushinzwe ububanyi n’amahanga «Bwana Antony Blinken»  yakoreye uruzinduko mu bihugu 3 by’Afurika aribyo: Afurika y’epfo, RDC n’u Rwanda, mu ntangiriro z’ukwezi kwa Kanama 2022 . Antony Blinken akaba yaratangiriye urwo ruzinduko mu gihugu cy’Afurika y’epfo. Ubwo yari muri icyo gihugu yabajijwe ikibazo cy’ukuntu Amerika ivangura ibihugu, aho irwanya igihugu cy’Uburusiya kuko cyavogereye ubusugire bwa Ukraine ariko byagera ku Rwanda rwavongereye Congo (RDC), Amerika igaceceka! Mu gusubiza icyo kibazo, Antony Blinken yavuze ko yemeranywa n’Afurika y’epfo ku ihame ry’uko ibihugu bigomba kubahiriza ubusugire bw’ibindi bihugu nk’uko bisabwa na ONU. Ku kibazo cy’u Rwanda na Congo (RDC), Antony Blinken yavuze ko afite amakuru y’uko u Rwanda rutera inkunga umutwe wa M23, ariko ku rundi ruhande akaba afite amakuru yemeza ko ingabo za Congo FARDC zikorana bya hafi na FDLR.

Blinken akaba yarumvikanye n’Afurika y’epfo ko bagomba guha amahirwe ibiganiro by’i Nairobi biyobowe na Kenyatta, byaba byanze SADC igakemura ikibazo cy’umutekano mucye muri Congo no mu karere k’ibiyaga bigari ku buryo budasubirwaho. Icyo gitekerezo cy’uburyo umutekano mucye muri Congo wavaho, nicyo gitekerezo umunyamabanga wa Leta muri Amerika Antony Blinken yagejeje ku bayobozi b’igihugu bya Congo (RDC) n’u Rwanda. Bamwe mu ba diplomate bakorera i Kinshasa, bemeza ko Blinken yanze gukoresha uburyo bw’intwaro y’ibihano cyangwa intambara mu kwirukana umutwe wa M23 muri Congo (RDC) kuko yari yizeye ko icyo kibazo azagishyira ku meza y’ibiganiro yari kugirana n’abayobozi b’u Rwanda kugirango bashobore gufungura Paul Rusesabagina!

Blinken yaje i Kigali afite amakuru yuzuye y’uko atari bwakirwe neza ariko akaba yari yizeye ko leta ya Kigali izashobora kumva inyungu nyinshi izaba ifite mu gukemura ikibazo cya M23 binyuze mu biganiro aho gukoresha ibihano n’intambara nk’uko Afurika y’epfo na RDC babyifuza, mu gihe Kigali yaba ishoboye kurekura Rusesabagina! Abo ba diplomate bavugako mu byukuri nta biganiro Antony Blinken yashoboye kugirana n’abayobozi b’u Rwanda. Blinken yashoboye kubonana na Kagame ariko ntibashobora kumvikana. Kagame ntiyashoboye gutega amatwi Blinken ngo yumve icyo ashaka, Biruta nawe yakoresheje imvugo zo kumwishongoraho no guhangana!

Antony Blinken akaba yarabwiye abayobozi b’u Rwanda  ijambo rimwe gusa , yarababwiye ati :«mu gomba gukura ingabo zanyu ziri ku butaka bwa Congo mu mutwe wa M23 vuba na bwangu kandi mugafungura Paul Rusesabagina nta mananiza ijuru ritarabagwa hejuru, mu bitekerezoho neza muzatugezeho igisubizo mu bihe bya vuba». Nta byifuzo abayobozi b’u Rwanda bagejeje kuri Blinken bashobora gusaba Amerika, nta nubwo bashoboye kugaragaza ko ibyo Blinken babwiwe bazabishyira mu bikorwa, iyo myitwarire y’abayobozi ba Kigali yatumye Blinken atarara mu Rwanda kuko yahise afata indege asubira mu gihugu cye! Aba diplomate bari i Kinshasa bemeza ko kuva aho Blinken aviriye mu Rwanda yahinduye imvugo y’uburyo ikibazo cya M23 kigomba gukemuka. 

Blinken akaba asanga ikibazo cya M23 kigomba gukemurwa na SADC ibifashijwemo n’Afurika y’epfo, asanga ibiganiro by’i Nairobi ntacyo bishobora kugeraho kandi akaba adashyigikiye ko ingabo za EAC zoherezwa muri Congo. Mu ijambo rifungura inama SADC i Kinshasa, Félix Tshisekedi akaba yaragize ati: «…Ndabasaba kumfasha gushimira umuryango wa SADC kubera ubufatanye utahwemye kugaragariza abaturage ba Congo muri iki gihe igihugu cyabo cyagabweho igitero giteye isoni kandi kirangwa n’ibikorwa by’ubunyamaswa gikozwe n’igihugu k’igituranyi cy’u Rwanda. Ndashimira by’umwihariko igihugu cy’Afurika y’epfo, Malawi n’igihugu cya Tanzaniya, aho abasilikare b’ibyo bihugu biyemeje gutanga ikiguzi kitagereranywa cy’ubuzima bwabo mu kwifatanya n’abasilikare bacu kugirango umutekano ugaruke mu burasirazuba bwa Congo».

Tshisekedi ari muwe na Samia Suhulu Hassan uyobora Tanzaniya i Kinshasa

Ijambo rya Tshisekedi ryarushijeho kumvikana nyuma yaho perezida wa Zambiya «Hakainde Hichilema», afatiye ijambo muri iyo nama ya SADC agasaba ko ibihugu byose bigize uwo muryango bigomba gushyigikira igihugu cya Congo mu ntambara kirimo kugirango umutekano urambye ugaruke mu burasirazuba bwa Congo; Bwana Hakainde Hichilema yagize ati: «Inshuro nyinshi, umuryango wa SADC ushyira ikibazo cy’umutekano mucye uri mu Burasirazuba bwa Congo ku ngingo ya kabiri, ibyo bigomba guhinduka icyo kibazo kikajya ku ngingo ya mbere. Icyo kibazo kigomba gukemuka byihutirwa kugirango dushobore gutera imbere kimwe mu muryango wa SADC. Icyo kibazo nigikemuka nibwo umuryango uzashobora gutera imbere.»

Abadiplomate bari mu nama ya 42 ya SADC i Kinshasa bemeza ko abakuru b’ibihugu barenga 10 bari muri iyo nama , mu mwiherero basabye ibisobanuro ubuyobozi bwa Congo kubyerekeranye n’ukuntu icyo gihugu cyagiye kwitabaza abasilikare ba EAC mu kugarura umutekano mu burasirazuba bwa Congo mu gihe muri uwo muryango havugwamo ibihugu bihungabanya uwo mutekano! Abayobozi ba RDC bagaragarije abagize umuryango wa SADC ko bawufitiye ikizere cyuzuye ndetse barahirira kuzafatanya nawo 100% mu gukemura ikibazo cy’intambara iri mu burasirazuba bwa RDC burundu. Byanze bikunze intambara yo kwirukana M23 mu Burasirazuba bwa Congo bakayigeza i Kigali, izaba!

Si ubwa mbere u Rwanda ruhangana n’umuryango wa SADC muri Congo ariko muri ibyo bihe byose u Rwanda rwaterwaga inkunga ikomeye na Leta Zunze Ubumwe z’Amerika muri byose. Amerika nicyo gihugu kiyoboye isi, iyo cyakwibasiye n’ibindi bihugu bikuvaho, none se u Rwanda rufite imbaraga zo guhangana na SADC rudashyigikiwe n’Amerika? Amateka niyo azaduha igisubizo.

Veritasinfo.