RDC: Muri uyu mwaka w’2020, ibihugu 6 bimaze kohereza abasilikare babyo ku butaka bwa Congo

Igihugu cya Repubulika Iharanira Demokarasi ya Congo kimaze guhinduka agatobero! Abanyepolitiki b’icyo gihugu, imiryango idaharanira inyungu kimwe n’ibigo bikora ubushakashatsi bose batanga amakuru buri munsi yemeza ko ingabo z’ibihugu bihana umupaka na Congo biri kohereza abasilikare babyo ku butaka bwa Congo!

Kuva mu ntangiriro z’uyu mwaka w’2020, nibura abasilikare bavuye mu bihugu 6 bihana umupaka na Congo bigaruriye ubutaka bw’icyo gihugu! Umwaka ushize Perezida wa Congo Tshisekedi akaba yarahamagariye ibihugu byo mu karere gushyiraho ubuyobozi bw’ingabo zihuriweho n’ibihugu bimwe byo mu karere k’ibiyaga bigari izo ngabo zigakorera ku butaka bwa Congo ariko leta y’icyo gihugu (gouvernement) ikaba itavuga icyo gikorwa ku mugaragaro. Kugirango ibihugu byohereje abasilikare babyo ku butaka bwa Congo bishobore kuzikuraho, leta ya Tshisekedi ibona igomba kwitabaza ibikorwa by’ububanyi n’amahanga (diplomatie)!

Igihugu cya mbere cyohereje abasilikare bacyo ku butaka bwa Congo uyu mwaka ni u Rwanda. Ni ubwo amakuru menshi yemeza ko abasilikare ba RDF bari ku butaka bwa Congo, ntibyabujije Paul Kagame kubihakana ku mugaragaro mu kiganiro yagiranye n’abanyamakuru mu kwezi kwa Mata 2020! Leta ya Congo ikaba yaratanze ikirego mu muryango ushinzwe kurinda ubusugire bw’ibihugu by”akarere k’ibiyaga bigari (CIRGL). Congo ikaba irega muri uwo mu ryango leta ya Paul Kagame kuko abasilikare bayo bigaruriye agace k’ubutaka bwa  Congo.

Mu ibaruwa yanditswe taliki ya 22 Mata uyu mwaka, umugaba mukuru w’ingabo za Congo FARDC  yamagana ingabo zirwanira mu mazi z’igihugu cya Uganda kuko zigaruriye igice cy’amazi ya Congo aherereye mu kiyaga cy’Albert ibihugu byombi bihuriyeho. Congo kandi yemeza ko ingabo z’igihugu cy’Uburundi zigaruriye ubutaka bwayo buherereye mu kibaya cya Rusizi muri Kivu y’amajyepfo. Mu kwezi kwa Gatandutu , umugaba mukuru w’ingabo za Congo FARDC akaba yaramenyesheje inteko ishingamategeko ya Congo  ko ingabo z’Uburundi zigaruriye ubutaka bwayo.

Imbere y’inteko ishinga mategeko ya Congo, umugaba mukuru w’ingabo z’icyo gihugu yamenyesheje ko n’ingabo z’igihugu cya Zambiya nazo zigaruriye agace k’ubutaka bwa Congo; akaba yaramenyesheje abadepite b’icyo gihugu ko leta ya Congo iri mu biganiro na Zambiya kugirango bumvikane uburyo yakura ingabo zayo ku butaka bwa Congo!

Mu burengerazuba bwa Congo naho ntabwo ibintu byoroshye kuko ingabo z’igihugu cya Angola zikunze gucengera ku butaka bwa Congo. Mu cyumweru gishize ingabo za Congo zikaba zararasanye n’ingabo za Angola zacengeye ku butaka bwayo, umusilikare w’Angola ahasiga ubuzima. Leta ya Congo ikaba yarashoboye gushyikiriza igihugu cy’Angola umurambo w’umusilikare wayo waguye muri uko kurasana!

Igihugu cya 6 gishinjwa kohereza abasilikare bacyo ku butaka bwa Congo ni Sudani y’Amajyepfo, ingabo z’icyo gihugu nazo zikunze gucengera ku butaka bwa Congo! Kubera ibyo bikorwa byose byo kuvogera ubutaka bwa Congo, amashyaka atavuga rumwe n’ubutegetsi bwa Congo yemeza ko ibyo bikorwa bihishe umugambi wo gushanyaguza igihugu cya Congo kugirango bakigaburemo ibihugu byinshi! Inteko ishingamategeko ya Congo ikaba yarafashe icyemezo cyo gushyiraho umutwe w’ingabo za congo udasanzwe ugomba kurengera imbibi z’igihugu cyabo.

Ikibazo gikomeye Congo ifite akaba ari uko nta buyobozi buhamye ifite kuburyo igihugu gisa naho ntabuyobozi gifite!

Source: RFI

 

S’abonner
Notifier de
guest
0 Commentaires
Inline Feedbacks
View all comments