RDC: Umuririmbyi w’icyamamare uzwi ku mazina ya  » Général DEFAO »yitabye Imana.

Général DEFAO yitabye Imana

Umuririmbyi « Lulendeo Matumona » bakunze kwita « Général DEFAO » yitabye Imana kuri uyu wa mbere taliki ya 27/12/2021 ari mu gihugu cya Cameroun; urupfu rwe rukaba rwaratewe n’indwara y’umutima. Général DEFAO yitabye Imana aburaho iminsi 4 gusa ngo yuzuze imyaka 63 kuko yavute ku italiki ya 31/12/1958 muri Repubulika Iharanira Demokarasi ya Congo.

Général DEFAO yatangiye umwuga wo kuririmba guhera mu mwaka w’1970, afite imyaka 12 gusa! Yatangiye kuririmbira mu matsinda mato y’abaririmbyi bo mu mudugudu (quartier) yakuriyemo. Nyuma yaho DEFAO yinjiye mu itsinda rikomeye ry’abaririmbyi ba « Zaïko Langa Langa » mu mwaka w’1981. hagati y’umwaka w’1983 n’1991 yamamaye cyane mu itsinda ry’abanyamuziki ba «  Choc Stars ». Nyuma y’umwaka w’1991, Général DEFAO yashinze itsinda rye ry’umuziki rizwi ku izina rya « Big Star« .

Général DEFAO yamenyekanye cyane bitewe n’indirimbo yaririmbye yise « Amour scolaire » kuko yakoze ku mutima urubyiruko rwinshi rw’Afurika. Yitabye Imana amaze gukora ibitaramo by’umuziki bikomeye mu gihugu cya Burkina Faso mu kwezi gushize, akaba yarabiherewemo igikombe cy’uburambe n’ubunararibonye afite mu muziki.

Hasi aha murabona indirimbo ya DEFAO yagaragajemo ubuhanga afite mu kubyina. Imana imwakire mu bayo kandi ikomeze n’umuryango asize.

Veritasinfo.

1 Comment

Les commentaires sont fermés.