Rwanda: Amacenga no kujijisha mu iburanishwa rya Bamporiki Edouard!

Burya ubutegetsi nabwo bukurikiza ihame ry’ubuzima: «Ubutegetsi buravuka, bugakura, bugasaza, hanyuma bugapfa»! Iri hame ry’ubuzima niryo riri kugaragara ku butegetsi bwa FPR-Inkotanyi na Paul Kagame! Ubu butegetsi bwa FPR – Kagame bugeze muzabukuru, hakaba hasigaye igihe cyo kwitaba «rurema-nkwashi» bugashyingurwa! Bimwe mu bimenyetso bigaragaza ubusaze bwa FPR-Kagame, ni uburyo Kagame yananiwe gusubiza ibibazo by’akarengane k’abaturage bakorerwa na FPR mu ngendo amazemo iminsi mu turere tumwe na tumwe  tw’igihugu (Ruhango-Nyamagabe-Nyamasheke na Karongi)! Agahomamunwa muri ubu busaze bwa FPR-Kagame bukaba bugaragarira cyane mu kibazo cya Bamporiki Edouard wananiwe kuburanishwa kubera ibyaha bya ruswa!

Bwana Bamporiki Edouard wivugira ubwe ko «ari Inkotanyi itareshya n’izindi, ikaba idasa n’izindi kandi ikaba itaraturutse aho izindi zaturutse», yitereye hejuru yigamba ko amaze kugira umutungo w’amafaranga angana na miliyari y’amafaranga y’u Rwanda! Ntabwo Bamporiki asobanura aho yakuye ako kayabo k’amafaranga ! Mu minsi micye gusa amaze gutangaza uwo mutungo we, yahise akorerwa idosiye y’uko yafatiwe mu cyuho ari kwakira ruswa (ku ntore za FPR bakaba babyita kwakira indonke)! Muri Gicurasi 2022, Bamporiki yahise yamburwa umwanya w’ubuministre maze afungirwa iwe mu rugo; muri icyo gifungo, Bamporiki akaba yarakomeje kuba intore maze akajya yandikirana na Paul Kagame kandi ari imfungwa  ndetse aboneraho gusaba imbabazi z’icyaha gikomeye yakoze! Bamporiki Edouard akaba ariyo mfungwa ya mbere mu Rwanda itarashyizwe muri gereza kandi igakomeza kuvugana n’umukuru w’igihugu! Ese aho ntibaba bombi ari abafatanyacyaha?

Muri uko gusaba imbabazi Bamporiki yanditse kuri twitter ye  aya magambo, yagize ati: «Nyakubahwa Umukuru w’u Rwanda@PaulKagame, Narahemutse. Umutima wanze kumpa amahwemo. Bavandimwe, Nshuti zanjye, namwe abankurikira kuri uru rubuga, Nakoze icyaha cyo kwakira indonke. Nkaba ntafite irindi jambo navuga usibye Kubasaba mwese imbabazi. Ndatakambye Kuva Bamporiki yakwandika aya magambo ikibazo cye cyahise gicecekwa! Nubwo bimeze gutyo arik, muri iki cyumweru turimo, umuvugizi wa RIB, Dr Murangira B. Thierry, yabwiye ibinyamakuru binyuranye biri mu Rwanda ko Bamporiki akurikiranyweho ibyaha bifitanye isano na ruswa; yagize ati «Guhera tariki ya 5 Gicurasi, Bamporiki Edouard yarimo akorwagaho iperereza ku cyaha cyo gusaba, kwakira cyangwa gutanga indoke. Ubu dosiye yamaze gushyikirizwa Ubushinjacyaha kuwa 7 Nyakanga 2022.»

Nubwo bimeze gutyo ariko, nta kimenyetso kigaragaza ko Bamporiki Edouard azagezwa imbere y’ubutabera! Ministre w’ubutabera w’ingoma iri mu marembera ya FPR-Kagame yavuze ko, akurikije itegeko ry’ubusambo rya FPR,  Bamporiki Edouard ashobora kutazaburanishwa ku byaha ashinjwa kubera inyungu za politiki! Ibi bikaba bigaragaza ko ibyaha bya ruswa mu Rwanda byemewe n’amategeko ya FPR iyo byakozwe n’intore z’inkoramutima za Kagame nka Bamporiki Edouard cyangwa mwene wabo wa Kagame «Mutangana Eugène» ukora muri RDB! Amakuru «Veritasinfo» ikesha bamwe mu ntore za FPR, yemeza ko ubu hari ibiganiro hagati ya FPR na Bamporiki bigamije kureba uburyo yakamburwa iriya miliyari y’amafaranga y’u Rwanda yibitseho, noneho ibyo kumuburanisha bikagenda nka nyomberi! Ng’uko uko ubutegetsi bubi busaza nabi maze bugapfa bworetse igihugu!

Amakuru arambuye kuri iki kibazo cy’urubanza rwa Bamporiki Edouard mushobora kuyabona hano kuri Chaîne YouTube «MAMA URWAGASABO TV»!

Veritasinfo