Rwanda: Burasa Jean Gualbert umuyobozi w’ikinyamakuru “Rushyashya” yitabye Imana

Umunyamakuru Burasa Jean Gualbert witabye Imana

Kuri uyu wa kabiri taliki ya 5/05/2020 nibwo inkuru y’urupfu rw’umuyobozi w’ikinyamakuru “Rushyashya” Bwana Burasa Jean Gualbert yashyizwe ahagaragara. Bwana Burasa Jean Gualbert yishwe n’indwara yo guturika imitsi ijyana amaraso mu bwonko  AVC (Accident Vasculaire Cérébral), akaba yaguye mu bitaro by’Umwami Faisal i Kigali. Asize umugore n’abana batatu.

Bwana Burasa Jean Gualbert yari umwe mu banyamakuru bari bafite uburambe mu Rwanda mu mwuga w’itangazamakuru ryandika. Yatangiriye akazi k’itangazamakuru mu kinyamakuru cya “Rwanda Rushya” mu mwaka w’1993 akorana na nyirarume Kameya André ari nawe wagishinze. Kameya André yishwe muri jenoside yo mu mwaka w’1994 naho Burasa acika ku icumu ryayo. Nyuma Burasa yakomeje umwuga w’itangazamakuru ashinga ikinyamakuru “Rushyashya”.

Amakuru “Veritasinfo” ikesha bamwe mu nshuti za hafi za nyakwigendera Burasa Jean Gualbert yemeza ko ikinyamakuru “Rushyashya” gikunda kwandikwamo inkuru kiba cyahawe n’urwego rw’iperereza DMi rwa leta ya Kagame, cyane ko umuyobozi wacyo Burasa Jean Gualbert yari umwe mu bakozi bakomeye ba maneko ya leta ya Kigali. Inyandiko z’ikinyamakuru “Rushyashya” zikunze kwibasira cyane abanyepolitiki batavuga rumwe n’ubutegetsi bwa Paul Kagame nko: kubasebya, kubandagaza, kubandikaho indandiko z’iterabwoba ndetse n’ibihuha.

Nyakwigendera Burasa Jean Gualbert azibukirwa cyane ku magambo yanditse ku rupfu rwa Col.Patrick Karegeya wiciwe muri Afurika y’epfo ku italiki ya 1 Mutarama 2014, Burasa yanditse kuri urwo rupfu agira ati:“mperutse kubona impano nziza y’umwaka mushya y’uko Col.Patrick Karegeya yapfuye”. Burasa kandi yagize icyo avuga ku rupfu rwa Kizito Mihigo rwatangajwe ku italiki ya 17/02/2020 ubwo yagiraga ati:”undi mwanzi yagiye, ntabwo iki ari igihe cyo kurira, ahubwo ni igihe cyo kwishima. Niba ukina n’umuriro ugomba kwirengera ingaruka uzahura nazo”. Igikomeje gutangaza abantu ni uko mu mezi macye cyane Burasa avuze ayomagambo kuri Kizito nawe yitabye Imana akaba amusanze!

Kizito Mihigo wishwe ku italiki ya 12/02/2020

Ku mbuga nkoranyambaga hari kuvugwa cyane amagambo Kizito Mihigo yanditse mu gitabo cye cyasohotse nyuma y’urupfu rwe,maze bakayahuza n’urupfu rwa Burasa jean Gualbert. Muri icyo gitabo Kizito agira ati : ” Abantu bose bagize uruhare mu mibabaro yanjye cyangwa bateganya guhitana ubuzima bwanjye ntabwo bazigera bagira amahoro kuri iyi si. Nziko nzicwa ariko abo bagizi ba nabi nabo Imana izabica; yansezeranyije uburakari burenze urugero buzakurikirana abagize uruhare mu mibabaro yanjye. Mu ijoro ryakeye nagize iyerekwa rinsaba kwiyiriza ubusa iminsi 40″.

Aya magambo cya Kizito Mihigo kimwe n’andi menshi yanditswe mu gitabo cye no mu bihangano byinshi by’indirimbo yasize, abantu benshi bayasoma bahita bemezo ko Kizito Mihigo yari intumwa y’Imana kuri iyi si. Imana ihe iruhuko ridashira Burasa jean Gualbert kandi ikomeze n’abo asize.

Veritasinfo

0 0 vote
Article Rating
S’abonner
Notifier de
guest
0 Commentaires
Inline Feedbacks
View all comments