Rwanda: Bwana Faustin Twagiramungu yandikiye ministre w’Intebe Edouard Ngirente ku kibazo cy’abayobozi batakiboneka mu nshingano zabo!

[Ndlr:Hagiye gushira hafi imyaka 2 Abanyarwanda badaca iryera umukuru w’igihugu, ahubwo bakamubona mu mashusho yatembereye mu bihugu by’amahanga cyangwa bakamubona mu mafoto agaragaza ko yakiriye abanyamahanga mu Rugwiro. Sibyo gusa kuko n’inzego nkuru z’igihugu nazo zahagaze gukora kuva umukuru w’igihugu yajya mu bwihisho. Iryo zimira ry’umukuru w’igihugu niryo ryahagurukije Bwana Faustin Twagiramungu wabaye Ministre w’intebe w’u Rwanda, ubu akaba ari umuyobozi w’ishyaka rya « RDI-Rwanda Rwiza » rikorera hanze y’igihugu, kubaza Edouard Ngirente niba Kagame atarataye inshinganoze. Dore iyo baruwa mu mwimerere wayo:]

Buruseli, kuwa 01 Ugushyingo 2021

Ibaruwa ifunguye igenewe Bwana NGIRENTE Édouard
Minisitiri w’Intebe wa Repubulika y’u Rwanda

KIGALI.

Impamvu: Abayobozi batakiboneka mu nshingano zabo

Nyakubahwa Minisitiri w’Intebe,

Mbandikiye nk’umwenegihugu wabaye Minisitiri w’Intebe w’u Rwanda (1994-1995), nkaba kandi mbikoze mu izina ry’Ishyaka «Rwandan Dream Initiative » (RDI – Rwanda Rwiza) mbereye umuyobozi. Nifuje kubagezaho impungenge dukomeje guterwa n’imiborogo y’Abanyarwanda, cyane cyane abari mu gihugu imbere, babuze gitabara nk’aho nta buyobozi bukiriho.

Nyakubahwa Minisitiri w’Intebe, munyemerere mbahe ingero z’akarengane n’urugomo bikomeje kuzahaza abaturage :

1.Abatuye mu cyaro baratabaza kubera inzara n’ubukene batewe no kwamburwa amasambu yabo, kurandurirwa imyaka, no gutegekwa guhinga ibihingwa bigenewe gucuruzwa ikantarange.

2.Abo mu mijyi batari bacye, batindahajwe no gusenyerwa amazu yabo nta ngurane bahawe, ahubwo bakaba barahindutse impunzi mu gihugu cyabo.

3.Abanyarwanda kandi bahangayikishijwe no kuburirwa irengero bakorerwa n’inzego zitwa ko ari iz’umutekano, cyane cyane hakaba hibasirwa urubyiruko, ubu rwatakaje icyizere cyo kubaho mu gihugu cyarwo rutekanye kandi rwiteza imbere.

4.Urusasu rukomeje kuvuza ubuhuha, abana b’u Rwanda bakaraswa ku maherere, ari ababeshyewe ko bashatse gutoroka amagereza, cyangwa abazira ko bari bagiye kwambuka imipaka, bagenzwa no gushaka amaramuko mu bihugu bituranye n’u Rwanda.

Kubera ibyo bibazo byose n’ibindi tutarondoye, abaturage ntibahwemye gutakambira abayobozi kugera k’Umukuru w’igihugu, ariko baheze mu kangaratete, kubera kubura gitabara. Ni yo mpamvu tubasabye dukomeje, ko mwasobanurira rubanda uko ibintu biteye mu by’ukuri, dore ko imyaka igiye kuba ibiri yose, hari inzego z’ubuyobozi bw’igihugu zitagikora, cyangwa abayobozi batakiboneka mu nshingano zabo, hirengagijwe ibiteganywa n’Itegeko-Nshinga n’andi Mategeko arishamikiyeho.

Ibisobanuro bikenewe mu buryo bwihutirwa, ni ibirebana n’ibibazo Abanyarwanda bakomeje kwibaza ku nzego nkuru z’ubuyobozi bw’Igihugu zitagikora, cyane cyane Prezidansi ya Repubulika, Inteko ishinga amategeko na Guverinoma.

1.Biravugwa ko hashize amezi arenga 18 abagize Inteko ishinga amategeko (umutwe w’Abadepite n’uwa Sena) kimwe n’Inama y’Abaministre, bahejejwe mu ngo zabo. Kubera iki badaterana imbona nkubone ngo bakemure ibibazo by’abaturage, kandi twumva hirya no hino mu gihugu amasitade y’imikino ahuriramo ibihumbi by’abantu, amasoko, amazu y’urunywero n’urubyiniro byarafunguriwe, ndetse u Rwanda rukakira amarushanwa mpuzamahanga ? None se, ibibazo by’Abanyarwanda byakemuka bite, mu gihe abitwa intumwa za rubanda badaterana, ngo babifatire imyanzuro ?

2.Birazwi ko Perezida wa Repubulika ari we ukuriye inzego zose z’igihugu, ni nawe izo nzego zishingiyeho mu mikorere yazo. Ikibazo ni uko imyaka ibiri igiye kurangira nta muturage uramuca iryera, imbona nkubone. Abanyarwanda, mu bibazo bibugarije, bamwumva gusa mu manama yo kw’ikoranabuhanga ahuriramo n’abanyamahanga, bakamubona no ku mafoto yakorewe m’Urugwiro, ibyo bikaba birushaho gutera urujijo no kwibaza byinshi, kuko nta foto ya Perezida ishobora kuboneka, yafotowe n’ikinyamakuru kigenga.

3.Ikirushijeho gutera impungenge, ni uko tubona hari abantu bihaye gukora inshingano z’Umukuru w’igihugu kandi nta tegeko ribibahera ububasha. Aha twavuga nk’inzego za gisilikare zihaye ububasha bwo gushyira Abanyarwanda muri “Guma mu rugo” nta buryo bahawe bwo kubona ibibatunga. Byaragaragaye kandi ko inshingano za Perezida zo guhagararira u Rwanda mu ruhando mpuzamahanga, kwakira abakuru b’ibihugu, gushyikirizwa impapuro zemerera Abambasaderi guhagararira ibihugu byabo mu Rwanda, zigaruriwe na Ministre w’Ububanyi n’Amahanga. Ese musobanura mute ko Vincent Biruta asimbura Prezida wa Repubulika mu buryo bwa magendu ?

4.Inama z’Abaministre bivugwa ko ziba zayobowe na Perezida wa Repubulika ngo akoresheje ikoranabuhanga, ariko ibyemezo bifatiwemo Ministre w’Intebe akaba ariwe wenyine ubishyiraho umukono mu izina rya Perezida. None se, Perezida wa Repubulika ayobora inama, ariko akananirwa gusinyira ibyavuye muri izo nama ? Ikindi gitangaje ni uko mu minsi ishize, Amategeko-Teka mudashobora gusinya mu izina rya Prezida, asohoka adasinye, mbega nta gaciro afite imbere y’amategeko, ariko agashyirwa mu bikorwa! Urugero ni amategeko-teka yahinduriye imirimo cyangwa akazamura mu ntera abayobozi ba gisivile n’aba gisilikare, yasohotse nta mukono uriho, nyamara agahita yubahirizwa. Musobanura mute ko Umukuru w’igihugu adasinya inyandiko zikomeye nk’izo?

Nyakubahwa Ministre w’Intebe, muzi neza ko Itegeko-Nshinga rya Repubulika y’u Rwanda, mu ngingo yaryo y’105, riteganya uko Perezida wa Repubulika asigarirwaho mu gihe adashoboye gukora inshingano ze mu gihe gito, rigateganya n’uko asimburwa mu gihe adashoboye gukomeza imirimo ye, bitewe n’impamvu zitandukanye. Ministre w’Intebe niwe usigariraho Perezida by’igihe gito, Perezida wa Sena akamusimbura iminsi 90 mu gihe atagishoboye gukomeza imirimo igihugu cyamushinze, nyuma hagategurwa amatora yo kumusimbura. Igitangaje kandi giteye impungenge, ni uko hari agatsiko k’abantu bihaye ububasha bwo kwishyira mu nshingano za Perezida wa Repubulika, mu mirimo ye yo mu gihugu ndetse no mu mahanga.

Niyo mpamvu tubasabye dukomeje, kuvana Abanyarwanda mu rujijo, mukabatangariza ku mugaragaro, aho Umukuru w’igihugu batoye ngo abayobore aherereye, kuko batakimubona imbona nkubone. Nimusabe Perezida wa Repubulika asohoke mu “Urugwiro”, aho amaze hafi imyaka ibiri yifungiraniye, maze nk’uko yari asanzwe abigenza, yegere abaturage bamugezeho ibibazo bafite, abishakire ibisubizo, kuko amafoto ye berekwa adashobora kubavana mu kaga barimo.

Ibyo niba bidakozwe, Perezida wa Repubulika agakomeza kwihisha Abanyarwanda, ntabegere nk’uko byari bimenyerewe, bizarushaho gushimangira amakuru yibaza ku buzima bwe, bityo byumvikane ko atagishoboye kuyobora igihugu. Nta gushidikanya ko bishobora gukomeza gukurura akajagari n’umutekano mucye mu gihugu, nk’uko bigaragara hirya no hino muri iki gihe. Mumenye kandi ko ingaruka zabyo zizabazwa mwebwe ubwanyu na Guverinoma muyoboye.

Turangije tubashimira uburyo muzaha agaciro iyi mpuruza tubagejejeho, kandi mukazayitugereza no ku bandi bayobozi bagombye kuba bari mu nshingano zabo, kugira ngo abaturage bakomeje kugirirwa urugomo n’akarengane, batabarwe mu gihe kibangutse.

Mugire amahoro !

 

TWAGIRAMUNGU Faustin

Prezida w’Ishyaka RDI – Rwanda Rwiza

 

 

Bimenyeshejwe :

  • Perezida w’Inteko-Ishinga amategeko mu Rwanda, umutwe wa Sena
  • Perezida w’Inteko-Ishinga amategeko mu Rwanda, umutwe w’Abadepite
  • Perezida w’Urukiko rw’Ikirenga mu Rwanda

42 Comments

  1. [url=http://motrin.quest/]advil/motrin[/url] [url=http://cialis10.online/]cheap cialis india[/url] [url=http://cialischeap.quest/]tadalafil chewable[/url] [url=http://pfizerviagra.quest/]purchase viagra canada[/url] [url=http://onlineviagra.quest/]cheap viagra tablets uk[/url] [url=http://sildenafilutabs.online/]sildenafil 20 mg tablet cost[/url] [url=http://cialis20mg.quest/]cialis 5mg in india[/url] [url=http://tadalafil20mg.quest/]generic tadalafil paypal[/url] [url=http://viagractabs.online/]viagra 100mg cheap price[/url] [url=http://sildenafilpills.quest/]where can i get sildenafil 100mg[/url]

  2. I have been exploring for a bit for any high-quality articles or blog posts on this kind
    of area . Exploring in Yahoo I ultimately stumbled upon this website.
    Studying this info So i’m glad to convey that I have a very just right uncanny feeling I found out exactly what
    I needed. I most for sure will make sure to don?t omit this website and give it a look on a constant basis.

  3. Ni ugushimira bikomeye Nyakubahwa Twagiramungu Faustin n’ishyaka rye rya RDI, iyi mpuruza batanze iratureba twebwe Abanyarwanda bari mu gihugu. Ubu hano i Kigali dufite impungenge nyinshi cyane bitewe nuko abitwa ko bagize inzego z’umutekano ubu aribo bahindutse amabandi bitewe n’uko batagihembwa kandi byose bikaba biterwa no kubura kwa Kagame kuko nibura ariwe izo Nkotanyi zitinya!

    Ubu muri Kigali hateye amabandi y’ubwoko bwose, ayo mabandi yiba ikintu cyose , badutwara compteur z’amazi ndetse n’ibyuma twanikaho imyenda!! Ikibabaje ni uko nta muyobozi numwe umuturage ashobora kwitabaza kuko nabo batinya abo bajura kuko abenshi muri abo bajura ari inkotanyi zibarinda!! Ngaho aho igihugu kigeze! Abari hanze mudutabarize nk’uko Twagiramungu abikoze!

    • Iyo baruwa rwose nitureba twebwe abanyarwanda. Uwowese abishima niyaburamo umu genocidaire cg membre de famille de genocidaire. Un fait bien connu

  4. Nyakubahwa Bwana Faustin TWAGIRAMUNGU na RDI-Rwanda Rwiza,
    Mbashimiye byimazeyo iyi baruwa y’impuruza yo gutabariza u Rwanda n’abanyarwanda twese. U RWANDA rugeze mu bihe bikomeye cyane pee!!! Ibimenyetso by’igihe birabyerekana bidaca amarenga!!! Ubutegetsi bwose n’inzego zose za Leta n’izigenga zafashwe bugatwe n’agatsiko FPR (Fake Patriotic Regime) kariho gategura kurimbura u Rwanda n’abanyarwanda!!! Ni nde uzongera kuvuga ngo twaratunguwe??? (Sé)BAZUMVARYARI

  5. Kagame ni isambo cyabanyaburayi abibira mubihugu by,afrika nka drc ,rca ,mozambike , abanyaburayi ntibadufasha kumukuraho twe nitwirwaneho.

  6. Excellent job ! Byari mu gihe rwose ko abayobozi bo mu mashyaka atavuga rumwe n’ ubutegetsi nayo ava mu buvumo bakerekana ko babona ibibazo by’ abanyarwanda kandi berekana n’ ibikorwa ngo bafatanye n’ abaturage kubikemura. Twizere ko iki gikorwa cy’ indashyikirwa cya Faustin Twagiramungu gishyigikirwa n’ andi mashyaka ari akorera mu gihugu ndetse n’ akorera hanze. Murakoze.

  7. Isi iyobowe na Sekibi kweri! Hari umuntu ushobora kumbonera igisubizo ku mpamvu ituma Kagame atumirwa mu nama z’ibihugu 20 bikize ku isi kandi mbere bitarakorwaga? Ni iki u Rwanda rurusha igihugu nka Kenya, Tanzaniya… bidatumirwa muri iriya nama? Ese Kagame akurahe imbaraga zimugeza i Burayi ariko akabura izituma asura abaturage ba Kangondo bari ku gasi? Iyi si iyobowe n’ibirura peee!!

    • Hhhh
      Umusaza arakoze kutuvuvira
      Umukuru w’igihugu kutaboneka mubanabe ni kibazo kuko numubyeyi hanyuma reka tumuhe igihe adutekerezeho wenda azatwibuka nkumubyehi

Poster un Commentaire

Votre adresse de messagerie ne sera pas publiée.