Rwanda: Ese inkuru z’urupfu rwa Paul Kagame zivuze iki ku banyarwanda?

Paul Kagame yarimo aganira n'intore iba mu mahanga mu mwaka w'2016

Muri ibi bihe isi yose iri mu gikorwa cyo guhangana n’icyorezo cya Coronavirus, hari amakuru menshi ari kuvuguruzanya ku mbuga nkoranyamba ari kuvuga ku burwayi n’urupfu rwa Paul Kagame! Abakunzi ba “veritasinfo” benshi bakaba bari kudusaba kugira icyo tuvuga kuri izo nkuru! Twamenyesha abasomyi bacu ko atari Kagame gusa uri kuvugwa ko yapfuye kuko kuri interneti ibinyamakuru n’imbuga zikomeye ku isi ziri kuvuga ko umuyobozi w’igihugu cya Koreya ya ruguru “Kim Joung-un” nawe ashobora kuba yaritabye Imana bikagirwa ibanga! Impamvu Kagame na Kim Joung-un bari kuvugwa cyane ko batakiriho, ni uko muri ibi bihe bya “Coronavirus” abakuru b’ibihugu byinshi ku isi bari kwegera abaturage babo ngo babahumurize ariko aba bayobozi b’abanyagitugu bombi (Kagame na Kim Joung-Un) ubu bakaba batigaragariza abo bayobora kandi bazwiho gukunda kwiyerekana cyane mu itangazamakuru!

“Veritasinfo” iramenyesha abakunzi bayo ko ntamakuru y’impamo ifite agaragaza ubuzima bwa Paul Kagame muri iki gihe ariko ko hari ibimenyetso byinshi “Veritasinfo” ifite byemeza ko amakuru ari kuvugwa mu kinyamakuru “igihe” gikunze kuba umuyoboro w’ibitekerezo n’ingamba za leta ya Kagame, kiri gutangaza amakuru y’impuha kuri Kagame gikoresheje amashusho n’amajwi bikozwe mu buryo bw’ikoranabuhanga, aha tukaba twatanga urugero rw’inkuru ikurikira: Perezida Kagame yagiranye ikiganiro cyiza na Trump… Ubusanzwe, iyo perezida Trump yaganiriye n’umukuru w’igihugu cy’amahanga ahita yitangira ubutumwa ku giti cye ku rubuga rwe rwa twitter”avuga ko yavuganye n’umukuru w’igihugu runaka, nta kintu rero kigaragaza ko Kagame yaganiriye na Trump uretse ikinyamkuru “igihe” kibivuga cyonyine! Icyo twabwira abasomyi bacu ni uko Kagame afite umubiri nk’undi muntu wese, akaba ashobora kurwara , kugira umunaniro ukabije umusaba kuruhuka igihe kirekire ndetse akaba ashobora no kurwara akitaba Imana, nta gitangaza kirimo!

Amateka y’ahandi atwigisha iki? Ese Kagame aramutse yitabye Imana, ni nde watinyuka kubivuga mu gihugu?

Izi ni inyeshyamba zari zimaze gufata umurwa mukuru wa Somaliya mu mwaka w’1991 zirukanye Mohamed Siad Barré

Kugirango dusobanukirwe neza amakuba ategereje u Rwanda n’abanyarwanda , reka turebe muri macye amateka y’igihugu cya Somaliya! Igihugu cya Somaliya cyabonye ubwigenge mu mwaka w’1960, umugabo witwa  Mohamed Siad Barré yashinze umutwe w’inyeshyamba wamufashije guhirika ubutegetsi bwa Somaliya mu mwaka w’1969, aba perezida w’icyo gihugu ku geza mu mwaka w’1991. Mohamed Siad Barré yashyizeho ubutegetsi bw’igitugu gikomeye muri Somaliya abifashijwemo n’igihugu cy’Uburusiya na Cuba. Uretse icyo gitugu gikaze, Mohamed Siad Barré yashoje intambara ku gihugu cya Etiyopiya, mu mwaka w’1980 havutse umutwe w’inyeshyamba muri Somaliya wasabaga ubwigenge bw’igice cya Somaliya y’amajyaruguru kitwa “Somaliland”. Intambara Mahamed Siad Barré yarwanaga n’igihugu cya Etiyopiya ndetse n’inyeshyamba zo mu majyaruguru ya Somaliya yatumye ubutegetsi bwe butangira gucika intege ariko ibintu bikaba byarahumiye ku mirari ubwo mu gice cy’amajyepfo ya Somaliya naho havukaga imitwe 2 y’inyeshyamba zo mu bwoko bumwe ziyemeje kurwanya ubutegetsi bwa Mohamedi Siad Barré. Mohamed Siad Barré amaze kubona ko leta ye ibangamiwe bikomeye n’imitwe iyirwanya, yihutiye kugirana ubushuti n’igihugu cya Leta Zunze Ubumwe z’Amerika ariko ibyo ntibyabujije ko imitwe 2 y’inyeshyamba zo mu majyepfo y’igihugu yigarurira umurwa mukuru wa Somaliya mu kwezi kwa Mutarama 1991.

Mohamed Siad Barré amaze kwirukanwa mu murwa mukuru wa Somaliya yahungiye mu gace k’uburasirazuba bw’amajyepfo y’igihugu, agerageza kurwana n’imitwe yamwirukanye mu murwa mukuru ngo yisubize ubutegetsi, biramunanira, ahungira mu gihugu cya Nigéria mu mwaka w’1992 ari naho yafatiwe n’uburwayi yitaba Imana mu kwezi kwa Mutarama 1995 afite imyaka 84 y’amavuko. Imitwe 2 y’inyeshyamba zo mu bwoko bumwe yirukanye Mohamed Siad Barré yafashe igihugu ariko inanirwa kugabana ubutegetsi n’ubwo abarwanyi bari bayigize ari abo mu bwoko bumwe, maze iyo mitwe yombi isubiranamo irarwana hagati yayo; umutwe umwe w’inyeshyamba wari uyobowe na ALI MAHDI naho undi mutwe uyobowe na FARRAH AÏDID. Mu gihe iyo mitwe yombi yarimo irwana hagati yayo , umutwe w’inyeshyamba wa gatatu wari mu majyaruguru y’igihugu wahise utangaza ubwigenge bw’icyo gice bita Somaliland n’ubwo umuryango mpuzamahanga utemeye ubwo bwigenge kandi kugeza ubu niko bimeze! Kuva Mohamed Siad Barré yava ku butegetsi ntabwo Somaliya yigeze igira ubutegetsi buhamye cyangwa ngo yiyunge nk’igihugu kimwe , kugeza ubu icyo gihugu kikaba kirangwamo intambara z’urudaca!

Ihuriro rya Mohamed Siad Barré na Paul Kagame ni irihe? Ese bazavaho kimwe?

Kagame ari mu nama y’ubumwe bw’Afurika ku matora yo muri Congo muri Mutarama 2019

Siad Barré na Kagame bahuriye kuri byinshi mu butegetsi bwabo ariko ndavuga ibintu 2 by’ingenzi bibahuza cyane: Icya mbere bahuriyeho, ni uko bombi ari abayobozi b’abanyagitugu, bakaba barayoboye igihe kirekire kandi bakaba batiteguye kuva ku butegetsi ngo bagire undi babuha. Ikindi kintu cya kabiri aba bagabo bombi bahuriyeho ni uko ari abarwanyi, bahora mu ntambara zo kurwana n’abenegihugu (imitwe inyuranye) ndetse n’ibihugu by’abaturanyi (Congo kuri Kagame na Etiyopiya kuri Mohamed Siad Barré). Kubyerekeranye ni uko Mohamed Siad Barré na Kagame bashoboka kuva ku butegetsi kimwe; ntabwo nabyemeza 100% kuko Kagame akiri ku butegetsi; gusa dukurikije aho ibintu mu Rwanda bigana, 80% yo kuva ku butegetsi kwa Kagame izaba imeze nk’uko Siad Barré yabuvuyeho! Twabishaka tutabishaka , Paul Kagame azava ku butegetsi kandi azapfa nk’uko abantu bose bazapfa igihe nikigera. Ikigaragara cyo ni uko Paul Kagame azava ku butegetsi nta muntu wo kumusimbura uhari kuko atamuteguye kandi akaba atabishaka. Kugirango hazaboneke undi muntu uzasimbura Kagame mu buryo bwose azavaho bikaba bizanyura mu mvururu zizagorana guhagarika, izo akaba ari zo ngaruka zo kuyoborwa n’abanyagitugu b’abicanyi!

Muri iki gihe mu Rwanda hari imitwe myinshi yitwaje intwaro ishaka gukuraho ubutegetsi bwa Kagame, uko bwije uko bukeye Kagame akora uko ashoboye ngo yice abayobozi b’iyo mitwe ariko ntashobora kuyitsinda ngo ayikureho burundu. Ese igihe Kagame atazaba ahari, ni nde uzarwanya iyo mitwe? Ingabo za Kagame RDF nazo zibayeho ku manegeka kuburyo mu gihe Kagame atazaba ahari zishobora kuzasubiranamo cyangwa se zigacikamo ibice zikurikije abakuru b’izo ngabo buri wese yibonamo.Inkotanyi zabohoje igihugu mu mwaka w’1994 zarashaje izindi Kagame yarazishe, arazifunga,  izisigaye zihungira mu mahanga. None se birashoboka ko izo nkotanyi zishobora guhurira ku mukuru w’ingabo umwe zikemera ko aziyobora mu gihe Kagame yaba adahari? Mu gihe Kagame yaba adahari umuntu ushobora gutinyuka kuvuga ko yapfuye agomba kuba ari nawe wafashe ubutegetsi, uwo muntu yaba ari nde mu nkotanyi? Imitwe y’ingabo zirwanya ubutegetsi bwa Kagame nayo ifite icyo kibazo, iyo mitwe n’ubwo ikomoka ahanini mu bwoko bumwe bw’abahutu ntabwo yumvikana; ese Kagame atakiriho nibwo iyo mitwe yakumvikana? Ese amashyaka adafite ingabo kandi atavuga rumwe n’ubutegetsi bwa Kagame yabyitwaramo ate aramutse adahari?

Buri wese natekereza ku bisubizo yabonera ibi bibazo, biramwereka neza ko kuva ku butegetsi kwa Kagame bishobora kuzasiga u Rwanda mukangaratete nk’ako perezida wa Somaliya Mohamed Siad Barré yasizemo igihugu cya Somaliya. Kugirango akaga ko kugwa mu kajagarai mu Rwanda katazabaho ni uko u Rwanda rwayoboka inzira ya demokarasi, hakaba amatora anyuze mu mucyo kandi impunzi zose zigataha mu gihugu. Hagize umuntu utekereze ko u Rwanda ruzayoboka inzira ya demokarasi kuri ubu butegetsi bwa Kagame bamwita umusazi! Ntabwo ari ubwa mbere hatangazwa ko Kagame yapfuye nyuma akigaragaza ari muzima, ariko iryo kinamico ryagombye kugira icyo ryigisha abanyarwanda kuko byanze bikunze Kagame azava muri ubu buzima kuko ni umuntu!

Abakora politiki, inshuti z’u Rwanda n’abanyarwanda bagombye gutangira gutekereza ikintu cyakorwa mu gihe Kagame yaba atagishoboye gutegeka ku mpamvu iyo ariyo yose, naho ubundi Afurika izagira Somaliya ya Kabiri kubera amacakubiri ari mu banyarwanda yigishijwe n’ubutegetsi bw’umwicanyi ruharwa Paul Kagame! Buri wese azirikane kandi ko ngo “urupfu rumeze nk’umujura“!

Veritasinfo

Subscribe
Notify of
guest
0 Comments
Inline Feedbacks
View all comments