Rwanda : Ese koko ihuriro RBB ku banyarwanda rishushanya ikiraro cy’umurato kidashobora kugira aho kibageza?

Ku rubuga rwitwa «les-mutikeys.com» turahasanga inyandiko iri mu rurimi rw’igifaransa yanditswe na «Alice Mutikeys», aho yibaza ikibazo kigira giti: «Ese Rwanda Bridge Builders imeze nk’ikiraro cy’Avignon ku banyarwanda? »Muri iyo nyandiko, Alice Mutikeys asobanura ko ikiraro cy’Avignon kitiriwe umujyi cyubatsemo w’Avignon ari ikiraro cyiza cyane cyahogoje abahanzi. Iyo urebeye icyo kiraro kure ubona giteye amabengeza ariko iyo ucyegereye neza ubona ntaho gishobora kugeza abakitabaza bashaka kwambuka uruzi, kuko icyo kiraro kigera hagati muruzi kigahagarara; muri macye ikiraro cya Avignon akaba nta kandi kamaro gifite uretse ko ari ikiraro cy’umutako w’umujyi w’Avignon! 

Ahereye kuri urwo rugero rw’icyo kiraro cy’Avignon, Alice Mutikeys agaragaza ko RBB  (Rwanda Bridge Builders) nayo ari igitekerezo cyiza cyane, ariko mu byukuri iyo RBB ikaba idashobora kugira aho igeza abantu bayisunze kuko ubona nta cyerekezo ifite! Alice Mutikeys avuga ko ku italiki ya 26 Gicurasi 2020 hatangajwe ku mugaragaro ihuriro nyarwanda ryitwa RBB (Rwanda Bridge Builders) rihuje imitwe ya politiki n’imiryango idaharanira inyungu za politiki igera kuri 36, Imwe mu ntego ya RBB akaba ari ugusenya inkuta zitandukanya abanyepolitiki batavuga rumwe na leta ya FPR ahubwo hakubakwa ibiraro cyangwa se ikiraho gihuguza abo banyepolitiki batumvikana hagati yabo kugirango bahurize hamwe imbaga n’umugambi wo kuzana impinduka nziza ya politiki mu Rwanda!

Ese iki ni ikiraro cyangwa ni ubwugamo bwo kwikinga izuba? Aha buri wese atanga igisubizo akurikije uko abibona!

Alice Mutikeys akomeza avuga ko mu ikubitiro, ivuka rya RBB ryahise ricamo ibice abanyarwanda batavuga rumwe n’ubutegetsi bwa Kigali, RBB ntabwo yakiriwe neza na buri wese muri abo banyepolitiki  bitewe n’uko ihuza amashyirahamwe aharanira uburenganzira bw’ikiremwamuntu n’amashyaka ya politiki ayoborwa na bamwe mu banyepolitiki bashinjwa guhungabanya uburenganzira bw’ikiremwamuntu cyane cyane mu bwicanyi bwakorewe abanyarwanda n’abacongomani! Alice Mutikeys akibaza uburyo  amashyirahamwe arengera uburenganzira bwa muntu ashobora gukorana n’abanyepolitiki bashinjwa guhohotera ubwo burenganzira bw’ikiremwamuntu! Kubw’iyo mpamvu RBB irushaho gutera urujijo mu bantu cyane ko idaha agaciro inzirakarengane zagizweho ingaruka  n’ubwicanyi bunyuranye bwakozwe na bamwe muri abo banyepolitiki! Kuri iyo ngingo RBB ikaba irushaho gutera impungenge bamwe mu banyarwanda batayishira amakenga batekereza ko RBB yaba ihishe indi gahunda itari nziza!

Alice Mutikey, abona RBB ifite gahunda yo kugenda yiyubaka ari nako igenda isenya iby’abandi.Ibyo bigaragazwa n’uko ku italiki 12/10/2020 rimwe mu mashyaka ayigize ryayisezeyeho. Mu itangazo ryashyizwe ahagaragara n’ishyaka Ishema ryagaragaje ko RBB irangwa no gukorera mu bwiru kandi ibyo bikaba bihabanye na demokarasi ivuga ko iharanira. Alice Mutikey yatangajwe n’uko ishyaka Ishema ariryo ryashoboye gushyira ahagaragara izo nenge za RBB mu gihe amashyirahamwe arengera uburenganzira bwa muntu ayirimo yararuciye akarumira kandi ashinzwe mbere na mbere guhanira uburenganzira bwo kwishyira ukizana! Ku italiki ya 29/10/2020  nibwo byagaragaye ko hari amashyirahamwe 2 kandi akomeye aharanira uburenganzira bwa muntu atari muri RBB, ayo mashyirahamwe ni “Global Campaing for Rwandan’s Human Rights n’Amahoro Iwacu“. Alice Mitikey asanga no kuba ishyaka RDI riyobowe n’inararibonye muri politiki y’u Rwanda Bwana Faustin Twagiramungu ritaritabiriye RBB nacyo ari icyuho gikomeye!

Alice Mutikey akaba yibaza ati : “Ese ubutaha ni nde tuzumva ko nawe yashinguye ibirenge muri RBB akayisezeraho?”.

Kanda kuri iyi nteruro y’igifaransa usome iyo nyandiko ku buryo burambuye: Rwanda Bridge Builders, le pont d’Avignon rwandais ?

Alice Mutikeys

Subscribe
Notify of
guest
0 Comments
Inline Feedbacks
View all comments