Rwanda : «Ese Paul Kagame yaba abeshyerwa ? Ntazasubire mu ndaki adakemuye iki kibazo ashinjwa kugiramo uruhare kiri muri ADEPR!

[Ndlr : Ingendo Paul Kagame amazemo iminsi zo kubonana n’abaturage nyuma y’imyaka 3 atagaragara muri rubanda ngo yumve ibibazo by’akarengane Abanyarwanda baterwa n’ubutegetsi bwe, zateye ibindi bibazo muri FPR ! Nubwo Kagame nta bisubizo atanga ku bibazo aba yagejejweho, ariko nibura agahinda rubanda ifite kajya ahagaragara! Ubu noneho abicanyi b’inkotanyi bafite ubwoba ko rubanda igeza ibyo bibazo byabo kuri Kagame !

Abahoze ari abayobozi ba ADEPR batawe muri yombi kuko bifuje kugeza akarengane kabo kuri Kagame ! Twizereko Kagame atongera gusubira mu ndaki ye mu Bugesera, ahubwo agerageza gutega amatwi rubanda ; niba bitabaye ibyo, akongera kubura nk’uko byagenze muri iyi myaka 3 ishize, umuriro ushobora kwaka mu gihugu ! Iyi nkuru ya «teradignews.rw» iragaragaza neza ko ikibazo kiri muri ADEPR kigomba gukemurwa na Kagame wenyine kuko ashinjwa kuba ariwe wagiteye!»] 

Polisi y’u Rwanda ikorera mu Karere ka Kicukiro ifatanyije n’izindi nzego z’ubuyozi ,baburijemo inama y’abahoze ari abavugabutumwa mu Itorero rya ADEPR bavuga ko birukanwe mu buryo bunyuranyije n’amategeko.  Iyi nama ngo mu byo yagombaga kwigaho harimo no gushaka uko bageza kuri Perezida Kagame akababaro kabo dore ko ngo hari ibyakozwe bakabwirwa ko ari Perezida wabibatumye ariko bo bakaba bakeka ko ari ukumubeshyera. Aba Bapasiteri bavuga ko nyuma y’uko inama yabo iburijwemo ndetse n’abayobozi babo Polisi ikabatwara ari amahirwe kuko ikibazo cyabo kigiye kugera kuri Perezida Kagame ari nacyo bifuza kugira ngo barenganurwe.

Abahoze ari abayobozi muri ADEPR batawe muri yombi kuko bifuza kugeza ibibazo byabo kuri Paul Kagame!

Babwiye Itangazamakuru ko iyi nama yari igamije kwiga ku bigendanye n’akarengane, iyicwa ry’amategeko n’itotezwa Abapasiteri bahagaritswe bahura naryo hirya no hino bityo ko nubwo yaburijwemo ariko bazategura indi kuko batiteguye gutuza mu gihe ikibazo bafite kitarakemuka. Bavuga ko ubu Amategeko ari muri ADEPR batayemera kuko yatowe n’abantu 20 mu gihe byari bisanzwe bikorwa ku buryo abakristu bose babigiramo uruhare bityo bakaba bavuga ko ADEPR yashimuswe ngo nubwo umuyobozi wa RGB yavuze ko batumwe na Perezida Kagame bo bakeka ko bamubeshyera.

Aba Bapasiteri bavuga ko hatitawe ku buyobozi bari bafite ubu bambuwe uburenganzira bwose mu Itorero ku buryo nta n’uwemerewe no kujya ku ruhimbi ngo abwirize bityo bakabibona nko guhohoterwa cyane ko nta muziro cyangwa amakosa baba barakoreye Itorero kuko ngo niyo bayishe hari izindi nzira bicamo Komite ishinzwe imyitwarire akaba ariyo ibifataho umwanzuro. Bakomeza bavuga ko ubu babihiwe n’ubuzima cyane cyane ko hari n’abo abana babo bahagaritse kwiga, abandi bagasohorwa mu mazu cyangwa guterezwa cyamunara mu gihe haba hari umwenda wa Banki bari bafite nyuma yo kwirukanwa nk’imbwa.

Bavuga ko ikibatungura kurushaho ari uko, iyo bagize icyo ababaza basubizwa ko Leta ibirimo ndetse ko byose byakozwe na RGB nayo itumwe na Perezida Kagame. Bemeza ko buri wese wari umukozi wa ADEPR guhera ku muntu ukora amasuku bose basimbujwe, aho abantu bagera ku 3000 bamaze kwirukanwa kandi ngo bikana bigikomeje hirya no hino mu gihugu.

Inkuru ya «teradignews.rw»