Rwanda: Ese umwamikazi w’Ubwongereza ashobora kuzabazwa ibyaha by’ubugome bikorwa na leta ya Paul Kagame?

Ese Kagame ashobora kumvira Umwamikazi w'Ubwongereza akareka kuba rukarabankaba?

Mu mwaka w’1949, ibihugu n’intara byahoze bikoronijwe n’igihugu cy’Ubwongereza kimwe n’ibihugu bivuga ururimi rw’icyongereza kandi bisangiye umuco umwe,  byishyize hamwe bikora umuryango ubihuza witwa « Commonwealth ». Muri iki gihe uwo muryango ukaba ugizwe n’ibihugu 53. Buri gihugu kigize uwo muryango kikaba kigenga, ariko byose bikaba bifite amahame bihuriraho, igihugu kitubahirije ayo mahame kirukanwa muri uwo muryango. Amahame y’ingenzi uwo muryango wubahiriza akaba ari aya akurikira:  Demokarasi, Uburenganzira bw’ikiremwamuntu, kutavangura ubwoko, ubwisanzure mu kuvuga icyo utekereza, ihamwe ry’itandukaniro ry’ubutegetsi nshingamategeko , nyubahirizategeko n’ubutabera,  kimwe n’andi mahame menshi. Ariko ihame riruta ayandi muri iyo akaba aruko ibihugu byibumbiye mu muryango w’ibihugu bivuga icyongereza bigomba kumvira « umwamikazi w’igihugu cy’Ubwongereza »!

Mu mwaka w’2009, nibwo u Rwanda rwemerewe kwinjira mu muryango wa « Commonwealth » kuko rwari rumaze kwemera ko ruzuhahiriza amahame y’uwo muryango. Kwinjira mu muryango w’ibihugu bivuga icyongereza k’u Rwanda bikaba byarakozwe nk’uburyo bwo guhemba inkotanyi zivuga ururimi rw’icyongereza bitewe n’akazi gakomeye zari zimaze gukora ko kubohoza u Rwanda rwavugaga igifaransa. Iryo bohoza rikaba ryaranyuze mu ntambara ikomeye inkotanyi zashoje ku Rwanda kuva taliki ya 1/10/1990 ikarangira mu muvu w’amaraso menshi ku italiki ya 4/07/1994. Mbere yo kwemerera u Rwanda kwinjira muri uwo muryango, habaye impaka zikomeye kuko ibihugu bimwe biwugize byanengaga ubutegetsi bw’inkotanyi kuko budafite demokarasi bukaba butubahiriza n’uburenganzira bw’ikiremwamuntu. Ijambo riremereye ry’Ubwongereza muri uwo muryango ryatumye u Rwanda ruba umunyamuryango warwo dore ko icyo gihe ministre w’intebe w’Ubwongereza yari « Tony Blair » inshuti magara ya Paul Kagame!

Muri iki gihe,u Rwanda rukaba rutangiye kuba icyasha (igisebo) gikomeye ku gihugu cy’Ubwongereza kuko nta hame na rimwe rigenga umuryango w’ibihugu bivuga icyongereza rwubahiriza; birasaba ko leta y’Ubwongereza muri iki gihe ifata icyemezo gikomeye ku Rwanda, niba bitabaye ibyo, amahano Kagame n’inkotabyi bakomeje gukora bikaba bizajya ku gatwe k’umwamikazi w’Ubwongereza kuko ariwe ufite ijambo rya nyuma ku bihugu byose bigize uwo muryango. Nta buryo kandi igihugu cy’Ubwongereza gishobora kuzavuga ko kitamenye amahano akorwa n’abicanyi b’inkotanyi. Kuwa mbere taliki ya 25/01/2021, Akanama k’Umuryango w’abibumbye ONU gashinzwe uburenganzira bwa muntu kateraniye mu gihugu cy’Ubusuwisi mu nama yako ya 37. Muri iyo nama , ibihugu 26 bigize ako kanama byareze leta y’u Rwanda ibikorwa byo guhohotera uburenganzira bw’ikiremwamuntu.

Ambasaderi w’u Bwongereza muri Loni i Genève, Julian Braithwaite

Nyuma y’ibyo birego ku Rwanda, Ambasaderi w’u Bwongereza mu Muryango w’Abibumbye i Genève mu Busuwisi, Julian Braithwaite yambitse ubusa leta y’agatsiko k’abicanyi ba FPR , yagize ati: “Ubwongereza bwashimye u Rwanda mu bijyanye no guteza imbere ubukungu mu bijyanye no koroshya ubucuruzi ndetse no guteza imbere ihame ry’uburinganire mu guha abagore imyanya mu buyobozi, ariko ku rundi ruhande turacyatewe impungenge n’amananiza agikomeje gushyirwa mu bijyanye n’uburenganzira bw’ibanze mu biijyanye na politike ndetse n’ubwisanzure bw’itangazamakuru. Nk’Umunyamuryango w’ibihugu bikoresha ururimi rw’Icyongereza[…]

Turasaba u Rwanda kujyana n’indangagaciro z’Umuryango w’ibihugu bikoresha Icyongereza mu bijyanye na demokarasi, iyubahirizwa ry’amategeko ndetse no kubahiriza uburenganzira bw’ikiremwamuntu. Turasaba abayobozi b’u Rwanda kwemera ko habaho iperereza rinyuze mu mucyo kandi ryigenga ku bijyanye n’ibirego by’ubwicanyi, impfu zo muri gereza, ibura ry’abantu n’iyicarubozo kandi abakora ibyo byaha bakagezwa imbere y’ubutabera. Ubwongereza burasaba leta y’u Rwanda kurinda no kureka abanyamakuru bagakora mu bwisanzure, nta bwoba bwo guhutazwa kandi rukagenzura ko inzego za Leta zubahiriza itegeko ryo gutanga amakuru.”

Uyu Ambasaderi w’Ubwongereza yavuze ayo magambo asa nusubiza Ministre Busingye wari umaze kuvugako yiyamye abantu bose bavuga ko leta y’inkotanyi inyereza abanyarwanda ikabafungira ahantu hatazwi.  Uyu mu ministre yiyibagije ko umuyobozi w’ikigo cy’ubwicanyi cya RIB Col Jeannot Ruhunga yavuze ko ikigo ayoboye gishimuta abanyarwanda kikabafungira ahantu hatazwi kugirango babone amakuru yo gufata abandi bantu! Busingye kandi yibagiwe ko Paul Rusesabagina, Callixte Sankara, Kizito Mihigo kimwe n’abandi benshi cyane bashimuswe na leta y’abicanyi abereye ministre w’ubutabera! Niba Busingye avuga ko leta y’abicanyi ba FPR bayibeshyera  mu byaha bibangamiye uburenganzira bwa muntu, nta kibazo leta abereye ministre yagombye kugira kuko igomba kwemerara ko impuguke mpuzamahanga zijya mu Rwanda zigakora iperereza kuri ibyo birego ishinjwa. Iyo leta niyanga ko iryo perereza ribaho ubwo izaba yemera ibyaha ishinjwa!

Burya ngo uwububa abonwa n’uhagaze, hasi aha murumva mu magambo macye uko Ibihugu bimwe bigize akanama ka Loni gashinzwe uburenganzira bw’ikiremwamuntu gashinja abayobozi ba FPR kwica abanyarwanda urubozo! Igikomeje gutangaza amahanga, ni uburyo ibihugu bya kure cyane bidafite aho bihuriye n’Abanyarwanda aribyo biri gutakambira inkotanyi ziyita abanyarwanda kureka kwica abanyarwanda!

Veritasinfo

1 Comment

  1. Abongereza bararira amarira y’ingona (larmes de crocodile).Sibo na USA bateretse FPR ku butegetsi?Museveni wabakoreraga yabashuize ku butegetsi, abinjiza muri CEAE abashyira no muri Commonwealth afatanyije na T Blair.Ndumva batakagombye kwitakisha.

Poster un Commentaire

Votre adresse de messagerie ne sera pas publiée.