Rwanda: FPR yishe umuhanzi Jay Polly afite imyaka 33 nk’iyo Yezu Christu yari afite! uyu muvumo izawukizwa ni iki?!

Joy Polly yakunze u Rwanda rwo ruramwanga!

Umwana w’Imana Yezu Christu mu gihe yari afite imyaka 33 gusa yishwe n’Abayahudi b’abahezanguni. Mbere yo ku mwica, Abayahudi bafashe Yezu bamujyana kwa Pilato bamusaba ko amuha igihano cy’urupfu. Abayahudi bakaba barashinjaga Yezu Christu ibyaha by’ibihimbano birimo: kurwanya ubutegetsi bw’Abaromani, kwangisha abaturage ubutegetsi buriho no kwiyita umwana w’Imana, ibyo byaha akaba aribyo byatumye asabirwa igihano cy’urupfu! Pilato amaze gusuzuma ibyo birego, yasanze Yezu Christu ari umwere ashaka kumurekura ariko rubanda y’Abayahudi itera hejuru igira iti : nabambwe nabambwe!

Pilato bimuyobeye yafashe amazi akarabira imbere y’iyo mbaga maze arayibwira ati « Amaraso ya Yezu Christu ntazampame« , maze rubanda y’Abayahudi iramusubiza iti  » Ayo maraso azaduhame twe n’abana bacu« ! Uwo muvumo ukaba warakurikiranye Abayahudi n’abana babo. FPR nayo yishe Joy Polly afite imyaka 33 kandi ikaba yaramwiciye ibyaha by’ibihimbano nk’uko Abayahudi babihimbiye Yezu Christu, amaraso ye azahame FPR (RIB) n’urubyaro rwayo ! Hashize imyaka 30 FPR imena amaraso y’inzirakarengane z’Abanyarwanda kandi ntakimenyetso kigaragara ko yiteguye kunamura icumu, ese izarimbura Abanyarwanda bose isigare yonyine mu gihugu?

Tuyishime Joshua uzwi ku izina ry’ubuhanzi rya « Joy Polly« abyarwa na Nsabimana Pierre na Mukarubayiza Marienne, Joy Polly yavutse ku italiki ya 5/07/1988 mu mujyi wa Kigali. Joy Polly yavukanye impano yo kuririmba kuko kuva akiri muto yaririmbye muri korali y’itorero rya ADEPR ari kumwe n’umubyeyi we nawe wari umuririmbyi muri iyo korali. Joy Polly yakomeje gutera imbere mu muziki yibanda cyane cyane ku njyana ya HIP HOP ikundwa n’urubyiruko. Yishyize hamwe na bagenzi be bashinga itsinda bise « TUFF GANGZ« ryakunze gukora ibihangano by’indirimbo zivuga akababaro k’Abanyarwanda nk’ubukene, akarengane, kutavuga icyo utekereza n’ibindi.

Itsinda rya « TUFF GANGZ » ryateye ubwoba FPR-Inkotanyi kuko ryakanguriraga urubyiruko gutekereza ku bibazo birwugarije biterwa n’ubutegetsi bubi, ibyo bikaba byaratumye FPR ikora uko ishoboye isenya iryo tsinda yifashishije urwego rw’ubutasi. Bimwe mu bihangano by’indirimbo za « Tuff Gangz » byateye ubwoba inkotanyi byumvikanagamo amagambo agira ati :  » Turi imbohe z’abo turibo n’aho tuva; Kuba tutavuga si uko imitwe yacu irimo ubusa; Burya mu buzima umugabo wese arimenya; Imitima yacu yuzuyemo amaganya… »

Nyuma y’isenyuka ry’iryo tsinda, Joy Polly yakomeje kwamamara mu muziki ndetse akavuga ko ari umuvugizi wa rubanda ibabaye, ibyo akaba yarabigaragaje mu bihangano byinshi by’indirimbo ze nka Hishamunda cyangwa Umwami uganje. Indirimbo ze zagiye zikomanyirizwa ku maradiyo yo mu Rwanda no mu marushanwa amwe namwe kuberako ko zitavugaga ibigwi by’abicanyi ba FPR. Inzego z’ubutasi za FPR zegereye Joy Polly zimusaba guhindura ubutumwa atanga mu ndirimbo ze ndetse asabwa no gukorana na FPR mukuyikundisha urubyiruko. Joy Polly yanze icyo cyifuzo kuko atashakaga kugira uruhande abogamiraho muri politiki! Kuva icyo gihe FPR yahise imushyira ku rutonde rw’abanzi bayo!

Mu mwaka w’2014, Joy Polly yasohoye indirimbo yise « Ikosora« , kubera gukundwa n’urubyiruko, urwego rw’ubutasi rw’Inkotanyi rwahimbye ubutumwa bwa twitter mu izina rya Faustin Twagiramungu, inararibonye muri politiki y’u Rwanda akaba n’Umuyobozi w’ishyaka rya RDI-Rwanda Rwiza rikorera hanze y’igihugu, ubwo butumwa bwavugaga ko Twagiramungu akunda ibihangano bya Joy Polly ndetse ko ubutumwa buri mu ndirimbo ze bugomba gutera imbaraga urubyiruko!  Urwego rw’ubutasi bwa FPR bwahise busaba Joy Polly gutangazako azarega Twagiramungu mu nkiko kubera ubwo butumwa yatangaje, ibyo Joy Polly yarabikoze ariko abanyamategeko bavuga ko icyo nta cyaha kirimo kuko gukunda umuhanzi atari icyaha! Iyo Joy Polly adakora ibyo yari yasabwe n’abo bicanyi b’Inkotanyi bari guhita bavuga ko yifatanyije na Twagiramungu bityo bikaba impamvu yo kumuca umutwe!

Nubwo Joy Polly yasimbutse uwo mutego wo kumutsindagira Twagiramungu, ntibyabujije Inkotanyi gukomeza kumutesha umutwe kuko yagiye afungwa kenshi ku mpamvu zidasobanutse! Umutego wa nyuma Joy Polly yatezwe ni uwo gutwererwa urumogi nk’uko yabigaragaje mu rukiko rw’inkotanyi umunsi umwe mbere y’uko yicwa! Joy Polly yabwiye urukiko ko urumogi ashinjwa rwazanywe mu rugo rwe  n’umukoziwa RIB witwa Kaboko. Ntabwo bitangaje kuko Inkotanyi zica umuntu zikamwambika igisasu cya grenage nyuma zikavuga ko yishwe kuko yari agiye gukora igikorwa cy’iterabwoba cyangwa zikarasa umuntu wambaye amapingu zikamushinja ko yari agiye gutoroka gereza!!

Mu ikinamico ry’urubanza, Joy Polly yavuze ko uwitwa Dr Rodrigue yamubwiye ko agiye kumuzanira abantu mu rugo b’abanyamahanga bashaka ko abamamariza imishinga yabo bafite mu Rwanda. Abo banyamahanga bakaba barazanye n’umukozi wa RIB witwa KABOKO waje yitwaje urumogi rwageretswe kuri Joy Polly, igitangaje ni uko ari Kaboko, ari Rodrigue nta numwe wigeze atabwa muri yombi ngo abazwe iby’urwo rumogi! Twabibutsa ko Joy Polly yatawe muri yombi muri Mata 2021 akaba yari afunze amezi 5 nta cyaha kimuhama! Aya makuru y’uko uru rumogi rwazanywe na Kaboko mu rugo rwa Joy Polly yemezwa na mwenenyina  witwa Iyamuremye Jean Clément nawe ufungiye i Mageragere muri dosiye imwe na Joy Polly. Iyamuremye akaba yarabaye umusilikare wa FPR , nyuma aza kwirukanwa muri cyo ahimbiwe icyaha cyo kunywa ibiyobyabwege!

Iyamuremye Jean Clément

Amakuru agera kuri « veritasinfo » yemeza ko uyu Iyamuremye nawe ari mu mazi abira kuburyo ashobora kwicwa n’inkotanyi kubera amakuru afite ku rupfu rwa Joy Polly, ibyo kandi biramenyerewe mu muco w’inkotanyi wo kuzimya umuryango wose nk’uko zabikoze kuri Cassien Ntamuhanga. Nubwo Inkotanyi zivuga ko Joy Polly yishwe n’umuti w’alukore ukoreshwa mu kogosha imisatsi yanyoye nyuma ukamumerera nabi, nta kigaragaza ko uwo muti ariwo wamwishe kuko n’inkotanyi ubwazo zivugira ko hari abandi bagororwa 3 bawunyoye ntugire icyo ubatwara; amakuru veritasinfo ihabwa n’abari hafi y’iyi dosiye yemeza ko Joy Polly yishwe n’urushinge bamuteye akigera ku bitaro bya Muhima!

Nta buryo Inkotanyi zabeshya ko atarizo zishe Joy Polly kuko ibimenyetso bibashinja urwo rupfu birigaragaza. Dore impamvu inkotanyi zidashobora kwikura mu cyaha cyo kwica Joy Polly kimwe n’abandi banyarwanda benshi zimaze guhitana:

1)Inkotanyi zigomba kumenya ko arizo zifite ubutegetsi zikaba zigomba gukora ibishoboka byose kugirango zirengere ubuzima bw’Abanyarwanda niba zitabishoboye zikaba zigomba kwegura. Kuba Abanyarwanda biyahura kubera ubuzima bubi zabashyizemo, izo mpfu zose zigomba kujya ku gatwe k’Inkotanyi. Ese FPR ishobora guhakana ubwicanyi bw’abaturage bakomejwe kwicwa barashwe n’inkotanyi hirya no hino mu gihugu?

2)Joy Polly yari afunzwe kandi  intwaro cyangwa se ikindi kintu cyose gishobora kugirira umuntu nabi ntabwo cyemerewe kwinjira muri gereza, kuba rero yaranyoye umuti ari muri gereza ukamuhitana ibyo bigomba kubazwa leta yamufunze kandi igomba kumurindira umutekano. Kuvuga ko Joy Polly yishwe n’umuti yanyoye ntabwo bikuraho uruhare rw’inkotanyi zamushyize mu buzima bubi butuma yiyahura. Ese umuntu asunitwse akagwa mu muhanda imodoka ikamugonga,  bavuga ko yiyahuye cyangwa aba yishwe?

3) Bitewe n’uko Joy Polly yishwe n’inkotanyi kimwe n’abandi bose zishe zikabeshya ko zigiye gukora iperereza,  ntacyo iryo perereza ryazo rizageraho, ni uguhuma amaso abanyarwanda gusa kuko yishwe n’izo nkotanyi, ntabwo rero zishobora kwishinja icyaha! Kuba Joy Polly yaraguye mu maboko ya leta n’ikimenyetso gishimangira ko ifite uruhare mu rupfu rwe. Leta ya FPR yagombye guha umuryango wa Joy Polly impozamarira ntamananiza zishyizemo.

Joy Polly yashyinguwe kuri iki cyumweru taliki ya 05/09/2021  ariko abantu benshi bagize ubwoba bwo kumuherekeza kubera gutinya abicanyi ba FPR! Umwanzuro twatanga kuri uru rupfu rwa Joy Polly ni uko Abanyarwanda bagomba gushyira mu mutwe wabo ko nta wundi muntu uzabakiza Inkotanyi, uretse bo ubwabo;  nibo bagomba guhaguruka nk’umuntu umwe bakirukana abo bicanyi kandi bakamenya ko kwitondo, guceceka, kubaha n’ibindi byinshi bategetswe gukora bitazabuza Inkotanyi gukomeza kubica umusubizo.

Imana yakire mu bayo Joy Polly kandi yihanganishe umuryango we mu gahinda utewe no kumubura akiri muto.

Veritasinfo.

Soyez le premier à commenter

Poster un Commentaire

Votre adresse de messagerie ne sera pas publiée.