Rwanda: Gen.Léonard Ngendakumana w’umurundi yishwe na FPR i Kigali bigirwa ibanga!

Amakuru ari kuvugwa hano i Kigali mu ibanga, ni urupfu rwa Général Léonard Ngendakumana wishwe anizwe n’abantu batazwi ku cyumweru taliki ya 17/07/2022 i Kigali. Uyu Gén. Léonard Ngendakumana akaba yari yungirije Gen.Major Godrefroid NIYOMBARE mu gikorwa cyo guhirika ubutegetsi bwa nyakwigendera Petero Nkurunziza perezida w’Uburundi, mu mwaka w’2015.

Nyuma yo kunanirwa guhirika ubutegetsi bwa Petero Nkurunziza , Gen. Léonard Ngendakumana na Gen.Maj. Niyombare n’abo bari kumwe bahungiye i Kigali mu Rwanda maze bahabwa ubuhungiro n’icyo gihugu cyane ko Paul Kagame yari abashyigikiye muri uwo mugambi. Kugeza ubu leta y’u Rwanda ikaba yaranze guha Uburundi abo basilikare bashatse guhirika ubutegetsi bwa Nkurunziza kugirango bagezwe imbere y’ubutabera; ibyo bikaba biri mu mpamvu nyamukuru zituma umubano w’ibihugu byombi utifashe neza.

Gen.Léonard Ngendakumana yari atuye i Remera mu nzu y’umucuruzi w’amabuye y’agaciro ya coltan witwa GAFUPI. Ku cyumweru taliki ya 17/07/2022, Gen.Léonard Ngendakumana yavuye iwe ari kumwe n’abasilikare 4 bamurinda ajya kwica akanyota mu kabari kitwa «Umusambi Bar» gaherereye i Kabuga. Bigeze mu masaha ya saa moya z’umugoroba, Gen.Léonard Ngendakumana yanizwe n’abantu batazwi bamwicira muri ako kabari! Umurambo wa Gén.Léonard Ngendakumana ukaba ufungiye mu nzu yagizwe ibanga, leta ya Kigali ikaba irimo gushakisha uburyo izatangaza urupfu rwe cyane ko badashaka gutangaza ko yiciwe mu Rwanda kuko bishobora kurushaho kubateranya na leta y’Uburundi.

Akabari Gen.Léonard Ngendahimana yiciwemo

Urupfu rwa Gen. Léonard Ngendakumana rurimo urujijo rwinshi kuko bitumvikana uburyo yishwe n’abantu batazwi kandi yari afite abasilikare 4 bamurindira umutekano. Uburyo yishwemo bugaragaza neza ko yishwe n’abicanyi ba leta ya Kigali kuko bigaragara ko yishwe anizwe mu buryo busa n’ubwicanyi bukorerwa abantu bicwa na leta ya Kigali. Nk’uko leta ya FPR ikoresha abacongomani icumbikiye bavuga ikinyarwanda mu kurwanya ingabo za leta ya Congo FARDC mu izina rya M23, iyo leta (FPR) irimo gushaka gukoresha Abarundi icumbikiye mu kujya kurwanya ingabo z’Uburundi muri Kivu y’amajyepfo.

Nyuma y’aho inama y’abakuru b’ibihugu bigize umuryango w’Afurika y’iburasirazuba EAC bemereje ko uwo muryango uzohereza ingabo muri Congo kurwanya imitwe yitwaje intwaro iri muri icyo gihugu, ariko u Rwanda rukaba rutaremerewe kujya muri icyo gikorwa, leta ya Kigali yatangiye gutegura ingabo zizarwanya abasilikare ba EAC bazoherezwa muri Congo. Muri Kivu ya ruguru Inkotanyi zizarwanya ingabo za EAC mu izina rya M23, naho muri Kivu y’amajyeppfo Inkotanyi zikazarwanya abasilikare b’Uburundi bazoherezwayo mu izina rya Red Tabara!

Iyi akaba ariyo mpamvu Abarundi bari mu gikorwa cyo guhirika ubutegetsi bwa Nkurunziza bari mu Rwanda bagomba kujya kurwanya ingabo z’Uburundi muri Congo muri Kivu y’amajyepfo mu izina rya Red Tabara; uwo mugambi ukaba utari ushyigikiwe na Gen. Léonard Ngendakumana kuko atibonaga muri Red Tabara none FPR ikaba imuhembye urupfu! Bamwe mu bayobozi ba FPR bakaba baratanze igitekerezo cyo kuvuga ko Gen.Léonard Ngendahimana yiciwe muri Kenya arikoibyo bakaba barasanze bidahwitse, ubu bakaba barimo bashakisha uburyo bazatangaza urupfu rwe!

Ngurwo urupfu rutegereje abantu bose bakorana n’amashitani y’Inkotanyi.

Karinganire Jean Bosco, umusomyi wa «Veritasinfo» i Kigali.