Rwanda : Ijambo rya Perezida w’Ishyaka rya RDI-Rwanda Rwiza ryo gusoza umwaka w’2021.

Banyarwanda, Banyarwandakazi , uyu mwaka w’2021 turangije waranzwe n’icyorezo cya Covid-19 gikomeje guhitana abantu benshi mu bihugu binyuranye byo ku isi.

Mu gihugu cy’u Rwanda by’umwihariko, icyo cyorezo cyaje kiyongera ku bindi bibazo bikomeje kuzahaza Abanyarwanda, bitewe ahanini n’ubugome bakorerwa n’ubutegetsi bubi bwa FPR – Inkotanyi. Koko rero, Abanyarwanda b’imbere mu gihugu bakomeje kubaho mu bukene bukabije, kwicwa n’inzara, kwamburwa imitungo yabo, guhahamurwa n’ubwoba bwo gufungirwa ubusa no kugirirwa nabi n’ubutegetsi, n’ibindi bibazo byinshi bibazahaza mu buzima busanzwe bwa buri munsi, birimo ubushomeri mu rubyiruko no guhezwa mu ngo nta bundi bufasha ku babuzwa kwikorera imirimo yabo. Abanyarwanda bari hanze y’igihugu nabo ntiborohewe : babayeho nabi kubera ibibazo by’ubuhunzi no guhigwa bukware na leta mbi ya FPR ibasanga aho bahungiye ikabica, nk’uko byagaragaye mu minsi ishize, cyane cyane ku Banyarwanda bari muri Repubulika Iharanira Demokarasi ya Congo, muri Afurika y’epfo no muri Mozambique.

Bigomba kumvikana ariko, ko igihe turimo atari icy’amaganya. Ahubwo kigomba kuba igihe cyo guhagurukira itabaro, ndetse byaba ngombwa tugatanga ibindi bitambo, kugira ngo tubeho nk‘Abenegihugu aho kubaho nk’ingaruzwamuheto. Tugomba kwirinda guhebera urwaje, twumva ko nta kundi byagenda. Rwose reka ntsindagire ko tugomba kugira ishema ryo guhagurukira rimwe twese, cyane cyane urubyiruko, tukabohora igihugu cyacu. Niba ari n’ibitambo bidusaba kugira ngo twibohore, tuzongera tubitange, aho kugira ngo dukomeze kuba abaja b’agatsiko kagizwe na ba « Mutima muke » bavuye Ikantarange, bazanywe no kwigwizaho imitungo no kwica  urubozo bene Kanyarwanda.

Tugomba kwanga gukomeza guhohoterwa n’abantu bavuye  «Ikantarange » babeshye ko ari Abanyarwanda barwanira gucyura impunzi, nyamara ari abasilikare bavuye mu ngabo za Uganda, bagambiriye mu by’ukuri kwifatira ku ngufu ubutegetsi bwose bw’igihugu cy’u Rwanda, kabone n’iyo byavutsa ubuzima amamiliyoni atabarika y’Abanyarwanda n’Abanyekongo. Ikibabaje kandi giteye inkeke, ni uko na nyuma y’imyaka 30 bashoje intambara mu gihugu cyacu, bakomeje kwica no kunyereza ababangamiye inyungu zabo bwite, kabone n’iyo baba ari bamwe mubabafashije kugera ku butegetsi. Abo batishe, barimo babakubita inkoni nk’izo ku gihe cy’abakoloni. Rwose ni amahano kubona abakecuru bafatwa nta mpamvu, bagakubitwa inkoni nk’iz’inzoka, bakambikwa ubusa, ababyeyi bagashyirwa ibyuma by’amashanyarazi mu myanya ndanga-gitsina, tutibagiwe n’abandi banyarwanda benshi bicwa imibiri yabo bakayijugunya mu misarane, mu mashyamba n’ahandi henshi ku gasi.

Igihe kirageze, ndetse kiri kurenga, ko amateka y’ubwicanyi bwibasiye Abanyarwanda, avugwa atagorekwa nk’uko bikorwa na FPR-Inkotanyi yagize ikinyoma umwuga. Abatutsi barishwe, ariko n’Abahutu barishwe kandi bakomeje kwicwa bunyamaswa ari benshi, Inkotanyi zikabirengaho, zikavuga nta soni ko nta jenoside bakorewe, zikamamaza gusa, ari nako ziyirisha, Jenoside yiswe ko ari iyakorewe Abatutsi gusa. Twebwe mw’ishyaka RDI-Rwanda Rwiza, twemera ko Abatutsi bishwe, ko n’Abahutu bishwe, ariko ko Jenoside atari ebyiri, ko ahubwo Jenoside ari imwe :  «Jenoside yakorewe Abanyarwanda», kuko Abatutsi n’Abahutu  bishwe ni Abanyarwanda bakorewe jenoside n’Interahamwe ku ruhande rumwe n’Inkotanyi kurundi ruhande.

Mu gusoza uyu mwaka w‘2021, tuzirikane kandi imfungwa zikomeje kwicirwa mu magereza no mu ma kasho nk’uko Kizito Mihigo yishwe mu mwaka w’2020, kimwe n’uko muri uyu mwaka urangiye w’2021, undi musore w’umuhanzi, Jay Polly, nawe yahitanywe n’Inkotanyi, yiciwe muri gereza. Icyo abo bahanzi bazize kirazwi : ni uko batangaga inyigisho zo gutoza Abanyarwanda kugira urukundo rw’igihugu no kunga ubumwe nk’Abenegihugu, bagendera kure ingengabitekerezo y’ivanguramoko Inkotanyi zikomeje gucengeza mu rubyiruko, zigamije guca Abanyarwanda mo ibice, kugira ngo batishyira hamwe bakaba bagira imbaraga zo gusezerera ingoma ngome ya FPR.

Dufite kandi ku mutima imfungwa zose za politike, iz’abanyamakuru, iz’abahanzi, n’izindi nzirakarengane zinyuranye, zazize kugaragaza ibitekerezo birengera inyungu za rubanda, bigahinduka icyaha kuko binyuranye n’iby’agatsiko kigaruriye ubutegetsi, kakabukoresha mu gusigasira inyungu bwite z’abakagize. Turasaba dukomeje ko Déogratias MUSHAYIDI, Dr. Théoneste NIYITEGEKA, Paul RUSESABAGINA, Callixte NSABIMANA Sankara, Rachid HAKUZIMANA, Fred Sekikubo BARAFINDA, n’abandi banyepolitiki bazize guharanira ifungurwa ry’urubuga rwa politiki mu Rwanda, bahita barekurwa nta yandi mananiza.

Abandi bazize ibitekerezo byabo dusaba ko nabo bahita bafungurwa, ni abavugizi ba rubanda bashyize ahagaragara ukuri kuzwi kandi kubonwa na buri wese mu gihugu, bakakuzira. Abo ni nka Aimable KARASIRA, NIYONSENGA CYUMA Dieudonné, NSENGIMANA Théoneste, Madame Yvonne IDAMANGE Iryamugwiza, Innocent BAHATI n’abandi tutarondoye. Abo bose ahubwo bari bakwiye guhabwa imidali y’ishimwe, kuko babaye intwari, bagatinyuka gutabariza abaturage, mu gihe abitwa Intumwa za rubanda n’abandi bayobozi bakuru b’igihugu, basaga n’abataye inshingano zabo, na n’ubu bamwe muri bo, uhereye kuri Prezida Kagame, bakaba bakibazwaho byinshi, kubera ko bagaragara gusa mu mafoto no mu mashusho, ibyo bikarushaho gutera urujijo ku buzima bwabo.

Turamagana kandi twivuye inyuma, iyicarubozo ryakorewe umutegarugori w’imyaka 27, Madame DUSHIMIRIMANA Antoinette, kugera aho ashyirwa icyuma cy’amashanyarazi mu myanya y’ibanga, nyuma agafungwa azira ko atamenye uburyo umugabo we SHYAKA Gilbert yatorotse, nk’aho kujya hanze y’igihugu ari icyaha kijyana uwo mwashakanye muri gereza.

Tuboneyeho n’umwanya wo gutabariza ababuriwe irengero, barimo NIYOMUGABO Nyamuberwa Gerald, dusaba ko Leta ya FPR isobanurira rubanda urupfu rwe cyangwa se ikavuga niba akiriho ! Hari na Boniface TWAGIRIMANA Inkotanyi zakuye muri gereza zikamujyana ahantu na n’ubu hatari hamenyekana.

Abantu baburirwa irengero bakomeje kuba benshi. Turagaya cyane Leta ya FPR kubw’iyo mikorere yuzuye ubugome kandi ibangamiye bikomeye uburanganzira bw’ikiremwamuntu, kandi dusabye dukomeje ko hatangwa ibisobanuro by’uburyo abantu bagiye barigiswa, Leta ikituramira nk’aho nta cyabaye.

Ntitwabura kandi gukomoza ku kibazo cy’amasambu n’ibibanza byambuwe benebyo bigafatwa n’abifite, ku kagambane ka Leta ya FPR-Inkotanyi. Hari ibibanza byagiye bifatwa byambuwe benebyo kandi barabihawe na Leta, babifitiye n’inyandiko zemewe n’amategeko cyangwa ari umurage basigiwe n’umuryango wabo, ariko bigafatwa nk’aho byari bisanzwe ari umutungo bwite wa leta. Hagomba kujyaho amategeko ahamye asobanura neza kandi arengera umutungo bwite wa buri Munyarwanda, abacujwe ibyabo bakarenganurwa bidatinze, kandi bakagenerwa indishyi z’akababaro.

Muri rusange, abaturarwanda babayeho mu karengane gasa n’akahozeho ku ngoma ya cyami na gihake. Niyo mpamvu dusaba dukomeje ko akarengane n’iyicarubozo byazahaje rubanda byarangirana n’uyu mwaka w’2021, bityo umwaka w’2022, ukazaba uw’impinduka, zigambiriye gushyira imbere inyungu za rubanda no kugarura ituze n’umutekano mu gihugu cyacu. Umwaka mushya wa 2022 byaba byiza ubaye umwaka wo kubaha abaturage, abayobozi bakumva ko ari abagaragu ba rubanda. Ibyo kandi bikagerwaho nta buriganya cyangwa ubujura, ubwicanyi, kurigisa imitungo ya Leta no kwambura abantu ibyo baruhiye.

Umwaka w’2022 nube kandi umwaka wa demokarasi n’ubwisanzure muri politike, mu mibereho, n’imibanire ya rubanda. Ikibazo cy’amoko kikaba kigomba byanze bikunze kuzakemurwa, hagashyirwaho inzira zose zishobora KUTUGEZA KU BUMWE BW’ABANYARWANDA BWUZUYE. Nubere kandi Abanyarwanda bari imbere mu gihugu n’abari hanze yacyo, uwo guhuza umugambi mu guharanira uburenganzira bwabo, bwashimangirwa n’impinduka bazaba baraharaniye batizigamye.

Banyarwanda, Banyarwandakazi, ndangije mbifuriza umwaka mushya muhire mu miryango yanyu : muzawugiremo amahoro y’Imana n’amahirwe menshi, mu buzima buzira umuze !

Harakabaho igihugu cy’u Rwanda, harakabaho Abanyarwanda mu bumwe nyabwo!

Bikorewe i Buruseli (mu Bubiligi), tariki ya 31 Ukuboza 2021

 

Faustin TWAGIRAMUNGU

Prezida w’Ishyaka RDI-Rwanda Rwiza.

6 Comments

  1. Icyo mbakundira muzi kwicara iyo zaburayi murya piza mugashuka abana b’abanyarwanda ngo nibiba nangombwa twaba ibitambo, ese mwashogosheye mukaza mukababanziriza. Nagirango nkumenyeshe ko kuva kuri sobukwe kayibanda kugera none ntagihe abanyarwanda babayeho Neza nkubu kdi bishimye. Niba rero ibihararumbo bihanwa kuko bishaka kudusubiza aho mwataye u Rwanda mukiruka,ibyo ntibizakunda ntanubwo abanyarwanda tuzabyemera

    • Ngo abanyarwanda babayeho neza kandi barishimye? Reports nyinshi zisohoka zerekana ko abanyarwanda bakennye kandi batishimye.Ariko ushobora kuba ufite definition yÁBANYARWANDA twe tutazi.Wayidusangiza aho gucyurira abantu za Pizzas.

  2. Ijambo rya Mzee ryateguranywe ubuhanga.Ntaho rihuriye n’i rya Kagame ryamaze umunota n’amasegonda 47! Byabananiye gutekinika cyangwa ni agasuzuguro asanganywe?

  3. Ijyambo ryiza muzehe, ariko wibagiwe kugaya kumugaragaro ibihugu bigifasha Kagame guhohotera abaturage. Mwakagaye Leta zo mukarere ndetse na moatse ibihugu kubera ubujura bakomeje gukorana na Kagame. Mwakagombye no kuvuga ku ihonyorwa ry’amategeko international, ndetse na manipulation politic inkotanyi zikorana nayo mahanga hagamijwe ubujuru. Gusaba abasilikale bi inkotanyi guhagarika kuba abacancuro b’umuntu. Kubibutsa ko bashobora kuzabibazwa.
    Mwagerageje. Imana Ibahe Umugisha

Les commentaires sont fermés.