Rwanda: Indangabutwari zishingiye k’umurage n’amateka bya Kizito Mihigo, Intwari y’u Rwanda rwiyunze!

Muri iyi minsi twizihiza intwari zacu, twifuje kugeza ku basomyi ba “Veritas info” ibintu icumi Mihigo Kizito yirinze gukora. Ibyo bikaba byaramugize intwari u Rwanda rwiyunze rugomba kwigiraho uburyo bwo kwirinda “kirazira”. Ibi bitekerezo twabitangaje bwa mbere, ubwo twibukaga umwaka umwe wari ushize Mihigo w’i Kibeho aguye mu maboko y’inzego za Leta ya Kigali taliki ya 17/02/2020.

Inyandiko twayikoze dukurikije amategeko y’Imana dusanga mu bitabo bibiri: icy’Iyimuka Misiri (Iyim 20, 3-17) n’icy’Ivugururamateko (Ivug 5-6). Aya mategeko Musa yaherewe mu mpinga y’umusozi agaragaza ibyo abayahawe batemerewe gukora. Muri ziriya ndangagaciro uko ari icumi, inyito ya buri cyiciro nahisemo kugira nka “Kirazira” cyangwa se “Birabujijwe”.

Mukwandika iyi nyandiko nagerageje kwigana uko amategeko cumi y’Imana cyangwa amagambo icumi yanditse. Amategeko y’Imana yatanzwe mu buryo bwa “Kirazira” cyangwa “Birabujijwe” kuko yari agamije icyarimwe kuba amategeko agenga imyitwarire y’abanyedini, akaba kandi n’amategeko mbonezamubano. Amategeko ashobora kugira ingaruka ku bikorwa by’ubugizi bwa nabi. Ni muri urwo rwego amategeko mpanabyaha iteka yandikwa mu buryo yerekana ibibujijwe ; ibyo abantu batemerewe gukora cyangwa se ibyo badashobora kurengaho.

Mu gihugu kimitse ubutwari bushingiye ku bukinduzi, ubuhotozi n’ubukocozi, dusanga uburyo bwiza bwo kubaka ubutwari ari ukwiyibutsa ko hari bintu bitemewe n’aho abayobozi baba ari iyo nzira bahisemo kujyanamo igihugu n’abagituye. Dore rero imiziro intwari nyayo iziririza. Izi za nyirantarengwa tuzitoze, natwe tuzabe intwari zibereye « Nyagasani n’u Rwanda rwatubyaye.»

1.Uzirinde iburamuco ryo kuneka, kunekana no kunekeshwa.

Kuneka, kunekana no kunekeshwa biranga ingoma kirimbuzi zirimburana n’imizi umuco n’indangagaciro nyabantu. Kugeza aho mu rugo rumwe ntawizera uwo babana, umwana akagambanira se, umugabo akemera gutegekwa gushinja umugore we, n’umugore akaneka umufasha we! Uko niko ibintu bimeze mu Rwanda rw’iki gihe,kugezaho abantu ubashakaho ubucuti ugamije kubaneka no kubagambanira. Kugezaho wemera kumena amabanga y’abantu bakwizeye, harimo n’inshuti zawe magara.

Twebwe abahanye igihango na Kizito Mihigo, tugendeye ku ndamuco nyabwungo yaturaze, ntituzemera ko abashaka gucecekesha abataka n’abatakamba basaba ko uburenganzira bwabo bw’ibanze bwakubahirizwa, badukoresha ngo tuneke bagenzi bacu cyangwa ababyeyi n’abavandimwe. Tuzamagana iburamuco ryo kunekesha buri wese kuri buri wese; ndetse n’umugenzo mubi wo kumenesha amabanga y’urugo abarugize.

2.Ntuzirengagize gutabara cyangwa gutabariza abarengana.

Mu mateka yacu, benshi bagiye batabaza bakabura gitabara. Batakambiye abavuga ko baharanira uburenganzira bwa muntu barabirengagiza. Imiryango mpuzamahanga n’abahagarariye ibihugu byabo babimye ubuhungiro. Hari abo twabuze kubera kubura ubatabara cyangwa ngo abatabarize. Twebwe abahanye igihango na Kizito Mihigo, tugendeye ku ndamuco nyabwungo yaturaze, ntituzahwema kuba ijwi ritatabariza bose, baba abazize jenoside, baba n’abazize ubundi bwicanyi, yaba abahohotewe mu mateka ya cyera, yaba n’abahohoterwa kuri uyu munsi. Tube intwari, twirinde kuba ba ntibindeba. Ubutwari bw’inzirakarengane zose zishwe mu Rwanda budufashe dutsinde ubugwari. Butumare amanga dutsinde ubwoba. Budutere imbaraga n’ishyaka, maze tuvuganire abapfukiranwa n’abahezwa ku byiza by’igihugu Imana yaduhaye.

3.Uzirinde gupfukirana no kunigana ijambo abataka batabaza.

Gupfukirana no kunigana ijambo abataka batabaza ni ubufatanyacyaha. Ikibabaje hari ababikora bagamije guhakwa no guhakishwa abo ubutegegetsi butifuza. Amajwi yabo bakayashakira ibisobanuro biyapfobya. Ibibazo byabo bakabyitiriranya no kwigomeka ku ngoma.  Twebwe abahanye igihango na Kizito Mihigo, tugendeye ku ndamuco nyabwungo yaturaze, abatankamba batabaza tubafata nk’ibikomangoma bya rubanda. Tububahe, tubamenye, tubarinde. Bityo tuzaca umuco wo kuveba buri wese ugaragaje ubutwari bwo kuvuga ikimuri ku mutima. Dutege amatwi abantu bose, ntawe dupfukiranye, ntawe twimye ijambo. Intwari zacu zitangiye rubanda zose zemeye gupfa aho guhemuka tuzahora tuzibuka. Zose zaharaniye ubwisanzure buzira cishwaha na munyangire: zirakarama.

4.Uzirinde guharabika, gusesereza no gutesha agaciro bagenzi bawe.

Nk’uko abahanga baminuje mu bumenyi ndemyabantu na ncengeramyemerere babivuga, intwari nyayo irangwa no kwambarira ururimi ikikwiza. Aho kwirinda ubwambure bw’umubiri, uzi kwambara yakambarira ururimi rwe! Ubundi akirinda kwandarika amagambo asebanya cyangwa ateranya. Niba udashoboye kuvuga ukuri kw’ibintu, uzahitemo guceceka. Aho kuvuga ibitagira ishingiro, ibinyoma n’amateshwa, waruca ukarumira. “Nucecetse burya aba avuze”.

Twebwe abahanye igihango na Kizito Mihigo, tugendeye ku ndamuco nyabwungo yaturaze, tuzirinda kuzibukwa mu mateka nk’abantu baseserezaga abandi, baharabikaga bagenzi babo, bagamije kubatesha agaciro. Ntituzamamaza imvugo zubushinyaguzi cyangwa zandagaza abandi. Gusebanya, gusesereza no guharabika bigaragaza abantu barezwe nabi.

5.Ntuzicane cyangwa ngo ugambanire bagenzi bawe.

Kizito Mihigo, wabaye umuhanga ureba iby‟isi ubisumba. Amafaranga, ubutegetsi n‟ubuhangange ubiharira abahorana irari ritazashira. Kuko iyo uza guteshuka ku ntego baba barakugize ikintu ukareka kuba umuntu. Ubutwari bwo kutigurisha ni bwo bwatumye ukomeza kuba umuntu urangwa n’ubumuntu.

Twebwe abahanye igihango na we, tugendeye ku ndamuco nyabwungo waturaze, tuzahora tukwibuka tugushimira, kubera ko watweretse ko mu gihugu cyuzuye amacakubiri ashingiye ku ndonke, ubutwari bwashingira ku bumuntu. Wabivuze neza uti “ndi umunyarwanda; ijye ibanzirizwa na ndi umuntu”.  Kimwe nawe tuzaharanira kurengera ubuzima. Tuzahamya ko ineza yatsinze inabi. Tuzamamaza ko ukuri guca mu ziko ntigushye. Tuzemeza ko ikinyoma kirirwa ntikirare. Tuzimika iteka icyiza n’umuco ubungabunga ubuzima.

6.Ntuzabe umuzindaro w’ibihuha.

Kizito Mihigo muvandimwe, turakwibuka nk’umuhanga n‟umuganga w’imitima”. Wabaye intumwa y‟isanamitima”. Uharanira kunagura ubuvandimwe muri bene Kanyarwanda. Ushakashaka amahoro arambye, wemera gupfira intego nk’iyi. Wanga kwigura no kwigurisha.

Twebwe abahanye igihango na we, tugendeye ku ndamuco nyabwungo waturaze, tuzahora tukwibuka nk’intwari yacu, urugero rwacu n’ikitegerezo kuri benshi. Ikivi watangiye tuharanira iteka kucyusa. Tuzarinda imitima wasannye gusenywa n’ibinyoma. Tuzakumirira kure ibihuha twima icyanzu ababikwiza. Tuzaba intumwa z’ukuri kubohora bose.

7.Ntuzatererane uwahohotewe n’uri mu kaga.

Abanyarwanda baciye umugani bati “inda nini yishe uwa kuze”. Nyamara hari benshi inda nini, kureba hafi cyane no guharanira inyungu zitarambye bemera bakagurana imbehe uburenganzira bwabo n’ubwa bagenzi babo. Bahitamo kurebera; cyangwa kwirengagiza ihohoterwa n’akarengane. Bahitamo kwicecekera, igihe cyose inyungu zabo zitekanye.

Twebwe abahanye igihango na Kizito Mihigo, tugendeye ku ndamuco nyabwungo yaturaze, ntituzatererena bibaho abahohoterwa; cyangwa ngo twime amaso abari mu kaga. Tuzarangwa n’urukundo nyarwo; rumwe rwihangana, rwitangira abandi, rutagira ishyari; rutirarira, ntirwikuririze.Tuzirinda rwose gukora ibidahwitse, mu rukundo rutarondera akari akarwo, ntirurakare, ntirugire inzika; ntirwishimire akarengane, ahubwo rugahimbazwa n’ukuri. Tuzababarira byose, twemera byose, twizera byose, twihanganira byose. Kuko twamenye ko iyi ari yo nzira yo kubaka amahoro arambye.

8.Ntuzareke ngo amateka yawe asibangane cyangwa ngo wemere ko atangazwa n’abanzi bawe.

Igihe cyose uzareka amateka yawe akamirwa n’ingoma uzaba ugomeye benshi bifuzaga kukumenya uko uri. Uzaba wipfukiranye ubwawe. Uzaba ubaye bangamwabo. Ni nde uzakuvuga uko uri kurusha wowe ubwawe? Kizito mihigo watwigishije udusigira amateka yawe nk’umusanzu wo kubaka u Rwanda rwayobotse ubwiyunge kugira ngo abarutuye babeho mu mahoro, kandi nibanapfa batabaruke bishimye.

Twebwe abahanye igihango na we, tugendeye ku ndangamuco nyabwungo waturaze, nk’uko wanze ko amateka yawe atangazwa n’abatayazi, natwe “twanze gutoberwa amateka”. Twiyemeje kuvuga amateka yacu. Uko tubishoboye, tuzaha urubuga uwifuza wese kubara inkuru z’ubuzima n’amateka bye. Tuzatega amatwi y’umubiri n’ay’umutima uwifuza kuruhura umutima no gusana ibisare yatewe n’amateka. Ntituzemera ko imvugo ivuga ngo “amateka yandikwa n’abatsinze” iba impamo. Tuzaharanira ko buri wese yamenya ko ari umwimerere, ikinege, n’indasimburwa.

9.Uzaharanire iteka ubutabera ku bazima n’abapfuye.

Nta rupfu rwiza rubaho”. Urupfu ruragapfa. Igihe cyose umuntu atapfuye urw’ikirago, umunyaze ubuzima atamuhaye yagombye kubibazwa no kubiryozwa. Nta n’umwe ufite uburenganzira bwo kwica, kandi nta numwe waremewe kwicwa. Uwamennye amaraso y’umuntu akwiye icyuhagiro; mbere yo kubabarirwa agasoburirwa uburemere bwo gucuza umuntu ubuzima atamuhaye. Intwari dukeneye kuri ubu ni iziharanira ko haba ubutabera bushingiye ku kuri, ubutabera ni bwo buzatugeza ku mahoro nyayo kandi arambye.

Twebwe abahanye igihango na Kizito Mihigo, tugendeye ku ndamuco nyabwungo yaturaze, twafashe ingamba mbaturabakwe zigamije kutugira ijwi ritabariza abarengana n’abarenganywa. Ntituzihanganira ko hagira urengana bigacira aho. Ntituzaterwa ubwoba n’abadukangisha kutwica; kuko n’ubundi tuzapfa; kandi n’abo bagira urupfu igikangisho, ntibazatura nk’imisozo: nabo bazapfa. Ariko byaba byiza bapfuye bamaze kumva ko abantu bose imbere y’amategeko bareshya.

10.Uzahore wibuka intwari kandi uzatere ikirenge mu cyabo.

Ubutwari buraharanirwa; kandi buri wese yaba intwari. Kizito Mihigo yarabiririmbye atubwira ko muganga yaba intwari igihe avura abarwayi bamugana abikoranye umutima utabara kandi wuzuye impuhwe n’ubwuzo. Mwarimu yaba intwari igihe cyose yigisha azirikana ko ari we mushumba ushoreye intwari z’ejo hazaza. Umuhanzi w’indirimbo, ibyo akora byamubera inzira y’ubutwari igihe yinjira mu nganzo ashaka kuririmba ibyubaka ubuntu n’ubumuntu mu nyoko muntu.

Umukinnyi w’umupira yaba intwari igihe cyose impano ye atayihinduyemo mpemuke ndamuke, cyangwa gafaranga. Umworozi n’umuhinzi nabo baba intwari, igihe cyose uyu mwuga ukoranywe ubunyamwunga. Abasudira n’abakanishi nabo baba intwari igihe cyose ibyo bakora babikorana ubugeni n’ubudasa, atari ukwishakira amafaranga gusa. Padiri Furere n’umubikira nabo baba intwari igihe bakuriye uwabahamagaye bakamukurikiza ; byaba ngombwa bakemera kubambwa ku musaraba aho gutatira igihango. Pasitoro profete na shehe nabo baba intwari igihe cyose ibyo bakora bitabaye kwishakira amaturo n’amakoro bihishe inyuma y’idini. Abashinzwe isuku n’isukura nabo baba intwari igihe cyose bubashye akazi kabo, bakamenya ko umwuga mubi ari ukuroga. Abatwara abantu mu muhanda nabo baba intwari, niba bakoranye akazi kabo ubunyangamugayo.

Twebwe abahanye igihango na we, tugendeye ku ndangamuco nyabwungo waturaze, ntituzibagirwa intwari zitangiye rubanda, ari abo tuzi ari nabo tutamenye. Byongeye kandi nk’uko Kizito twamusezeranije ko ikivi yatangiye tuzaharanira kucyusa, tuzirinda ubugwari, guhakwa no guhakirizwa. Ibyaduhindura abacakara cyangwa abafatanyabikorwa b’abagome. Ntituzagurana imbehe uburenganzira bwacu.

Iki gihango kije gikurikira imyaka ibiri Kizito Mihigo amaze atuvanywemo, kutazagitatira; tubigize intego n’isezerano.

Padiri Jean Bosco Nsengimana Mihigo,

Veritasinfo.

12 Comments

  1. Every weekend i used to visit this website, because i want enjoyment, as this
    this website conations truly fastidious
    funny information too.

  2. Hello there! I could have sworn I’ve visited this web site before but after browsing through some of the posts I realized it’s new to me.
    Nonetheless, I’m definitely pleased I found it and I’ll be book-marking it and checking
    back regularly!

  3. We stumbled over here coming from a different page and thought I may as well check things out.

    I like what I see so now i’m following you. Look forward
    to looking into your web page again.

  4. Can I just say what a comfort to uncover somebody that really
    knows what they’re discussing on the internet.
    You actually know how to bring a problem to light
    and make it important. More people should look
    at this and understand this side of your story. I
    was surprised you aren’t more popular given that you surely have the gift.

  5. Very nice post. I just stumbled upon your blog
    and wished to say that I’ve really enjoyed surfing around your weblog posts.
    In any case I’ll be subscribing on your rss feed and I hope you
    write once more soon!

  6. I visited many websites, but yours is probably the most interesting I found, and your article "Rwanda: Indangabutwari zishingiye k’umurage n’amateka bya Kizito Mihigo, Intwari y’u Rwanda rwiyunze!" is very interesting ! Keep going 🙂 And have a look to my new website : https://www.taobao.fr/ !

Les commentaires sont fermés.