Rwanda : Ishyaka «RDI-Rwanda Rwiza» riratabariza abaturage ba Kagondo na Kibiraro bagoswe n’inzego z’umutekano.

Abasilikare n'abapolisi bagose Kangondo na Kibiraro

Nyuma yo kumenya amakuru y’akarengane gakomeje gukorerwa abaturage ba Kangondo na Kibiraro mu mujyi wa Kigali, aho bakomeje kuvanwa mu mitungo yabo kungufu hirengagijwe amategeko. Byumwihariko ubu kuva ejo n’ijoro taliki 14/09/2022 bakaba bagoswe ninzego zishinzwe umutekano, ibi bikaba bije nyuma y’aho umwe murabo baturage witwa Shikama Jean de Dieu aherutse gufungwa agahimbirwa ibyaha, nyamara azira kuvuga akarengane we n’abagenzibe bakomeje gukorerwa na Leta kuva 2018 kugera uyumunsi, aho bamwe bavanywe mu byabo ku ngufu,abandi bagakubitwa ndetse abagore bagafatwa kungufu n’igisirikare cy’u Rwanda.

Tugendeye kuri ibi byose ndetse n’ibindi tutarondora bijyanye n’akarengane k’Abanyarwanda bakorerwa n’ubutegetsi hirya no hino mugihugu. Ishyaka RDI Rwanda Rwiza riramenyesha abanyarwanda bose n’umuryango mpuzamahanga ibi bikurikira :

1.Ishyaka RDI ryamaganye aka karengane kamaze imyaka 4 gakorerwa abaturage ba Kangondo na Kibiraro mu mujyi wa Kigali.

2.Turasaba Leta y’u Rwanda guhagarika gukoresha inzego zishinzwe umutekano muguhohotera ababaturage no kubafata nk’abigometse igihe bo basaba iyubahirizwa ry’amategeko no guhabwa uburenganzira ku mitungo yabo, bityo bakimurwa kubwumvikane kandi bahawe ingurane ihwanye n’agaciro k’imitungo yabo aho kubafatirana hagenderewe kubambura ibyabo kumayeri.

3.Turasaba Abanyarwanda b’umutima bose guhagurukira iki kibazo no gutera ingabo mu bitugu abaturage ba Kangondo na Kibiraro kugirango uburenganzira bwabo basaba bwubahirizwe.

 

Bikorewe i Bruxelles kuwa 15/09/2022

Faustin Twagiramungu

President wa RDI-Rwanda Rwiza.