Rwanda: Kuri leta ya FPR abari muri gereza nibo bafite umutekano kurusha abari hanze!

Kuri uyu wa kane taliki ya 4/03/2021 nibwo ubugenzacyaha bwa leta y’abicanyi ya kigali bwagejeje Madame Yvonne Idamange Iryamugwiza imbere y’ubucamanza bwa FPR-Kagame. Bitewe nuko igihugu kiyobowe mu kajagari nk’ako mu ishyamba, nta mategeko akurikizwa nubwo yanditse bwose, byatumye Madame Yvonne Idamange agezwa imbere y’abo bacamanza nyuma y’ibyumweru 2 byose afungiye mu kasho, ari gukorerwa iyicarubozo, mu gihe amategeko y’inyeshyamba z’inkotanyi ateganya ko umuntu wafashwe n’ubugenzacyaha agezwa imbere y’umucamanza mu gihe kitarengeje amasaha 72! Ibyo kubahiriza amategeko ku bicanyi b’inkotanyi ni nk’umugani kurizo! 

Nubwo Madame Yvonne Idamange yakorewe ibikorwa byo kumubabaza no kumutesha agaciro, imbere y’abicanyi n’abashinjabinyoma ba Kagame yisobanuye neza kuburyo byatumye abashinjabinyoma bavuga amateshwa! Madame Idamange yanyuzagamo agaseka nyuma yo kumva ibinyoma by’ibyaha yahimbiwe n’abashinjabinyoma biyita abashinjacyaha! Abahimbabyaha ba FPR batekinitse ibyaha 6 barega Idamange byose bishingiye ku kuba yagaragaje ibitekerezo bye ku rubuga rwe rwa youtube inkotanyi zivuga ko yabivugiye kukarubanda! Dore uko Madame Idamange yisobanuye imbere y’abacamanza nk’uko twabigejejejweho n’Umuseke (fungura amajwi)

Madame Idamange asobanura ko ibyo yavuze bifite ishingiro, yasobanuye ibibazo abaturage barimo baterwa n’ubuyobozi bubi ndetse agenda atanga ingero z’abantu yagiye afasha. Idamange yasobanuye uburyo yatewe n’abantu 8 mu rugo rwe bambaye gisivile bagaca inzugi bakamena n’ibirahure byazo akaba ari nabyo bishobora kuba byarakomerekeje umwe muri abo bamuteye, yasobanuye uburyo yamaze ibyumweru 2 byose arimo amapingu kandi ari nako ari mu mihango, yasobanuye ko adashobora gupfobya jenoside kandi yarayirokotse gusa akaba yifuza ko imibiri y’abanyarwanda bazize jenoside yashyingurwa mu muco wa kinyarwanda igakurwa mu tubati.

Abashinjabinyoma bamaze kumva ibisobanuro bya Idamange; basabyeko agomba kugumishwa muri gereza ngo kuko aramutse agiye hanze yakongera kuvugira kuri youtube bigatuma leta y’inkotanyi ihirima ngo kiretse bamuciye umunwa, abo bicanyi bavuze ko agomba kurindirwa umutekano muri gereza! Ku isi ya rurema leta y’inkotanyi niyo yemezako iyoboye igihugu gifite umutano mucye cyane kuburyo gereza ari ubuhungiro!!  Abo bicanyi bavuze kandi ko Idamange agiye hanze ashobora guhunga bigatuma abaturage bose bamukurikira igihugu kigasigaramo ubusa! Mubyukuri Idamange akaba afunzwe nta cyaha afite ahubwo akaba azira kuvugira abanyarwanda barengana! Ikibazo cya Idamange kikaba gikomeje guhagurutsa abanyarwanda bari hanze ku buryo harimo gutegurwa imyigaragambyo mu bihugu byinshi ku italiki ya 20/03/2021 yo gusaba ko Idamange afungurwa kimwe n’abandi bantu benshi bafungiye ubusa bari muri gereza!

Radiyo TV UBUMWE , yakoze ikiganiro kirambuye ku ifungwa rya Madame Idamange, icyo kiganiro cyayobowe na Madame Espérance Mukashema! Kanda kuri iyi nteruro ufungure icyo kiganiro cyose: Mme Claudine Mukashema na James Munyandinda basesenguye urubanza rwa Madame Idamange

Veritasinfo

Veritas

Leave a Reply