Rwanda: Major RUTAYOMBA Théogène arakorera nde mu gutesha agaciro dosiye yo guhanura indege ya perezida Juvénal HABYARIMANA?

Major Rutayomba Théogène

Major Rutayomba Théogène ni umunyarwanda w’impunzi uba mu gihugu cya Leta Zunze Ubumwe z’Amerika (USA). Rutayomba yinjiye mu gisilikare cya FPR -inkotanyi ari ku butaka bwa  Uganda, akaba yari avuye mu gihugu cy’Uburundi; Major Théogène Rutayomba akaba ari we wayoboraga ingabo zarindaga Gén.Kayumba Nyamwasa  wari umuyobozi mukuru w’umutwe ushinzwe ubutasi mu ngabo z’inkotanyi witwa DMI . Muri iki gihe,  Major Rutayomba Théogène akaba ari umuyoboke w’imena y’ishyaka rya RNC ryashinzwe na Gén.Kayumba Nyamwasa wari umukuriye mu gisilikare cy’inkotanyi.  Mu kiganiro yagiranye n'”Ikondera libre”, Major Rutayomba yatanze ubuhamya bw’uko ari mu basilikare batoranyijwe mu gupakira mu modoka intwaro zakoreshejwe mu kurasa indege yarimo perezida Juvénal Habyarimana. Iyo ndege ikaba yararashwe ku italiki ya 06/04/1994 saa mbiri z’umugoroba. Iraswa ry’iyo ndege akaba ariryo ryabaye imbarutso ya jenoside mu Rwanda nk’uko byemezwa n’umuryango w’abibumbye ONU.

Iyo ndege yarashwe yitegura kugwa ku kibuga cy’indege cya Kanombe i Kigali ubwo abakuru b’ibihugu by’u Rwanda n’Uburundi bari bavuye mu nama y’akarere i Dar-es saalam muri Tanzaniya; muri iyo ndege harimo: Perezida w’u Rwanda Juvénal Habyarimana, perezida w’Uburundi Cyprien Ntaryamira hamwe n’abayobozi banyuranye bari baherekeje abo bakuru b’ibihugu bombi ndetse n’abaderevu b’iyo ndege bafite ubwenegihugu bw’Ubufaransa; abo bose bari muri iyo ndege nta numwe warokotse bose bitabye Imana. Nyuma y’aho FPR ifatiye ubutegetsi mu Rwanda, hashyizweho urukiko mpuzamahanga mpanabyaha ku Rwanda TPIR i Arusha rwagombaga guhana abantu bose bagize uruhare muri jenoside yo mu Rwanda,  ariko urwo rukiko rwanze gukora iperereza ku ihanurwa ry’indege yabaye imbarutso y’iyo jenoside!

Imiryango ifite abantu bayo baguye muri iriya ndege yashyikirije ikirego cyo gukurikirana abayihanuye mu nkiko z’igihugu cy’Ubufaransa. Nyuma y’iperereza ryakozwe n’umucamanza w’umufaransa Jean Louis Bruguière yafashe umwanzuro wo kohereza impapuro zita muri yombi abasilikare bakuru 9 b’inkotanyi kuko yari amaze kubona ibimenyetso bibashinja kugira uruhare mu iraswa ry’iriya ndege. Perezida Sarkozy amaze gutorerwa kuyobora Ubufaransa yafashe icyemezo cyo guhindura umucamanza Jean Bruguère amusimbuza undi  witwa  Marc Trévidic, uyu mucamanza akaba umwanzura afata kuri iyo dosiye, nyuma nawe aza gusimburwa n’abandi babiri aribo Nathalie Poux na Jean-Marc Herbaut bafashe umwanzuro w’uko ntabimenyetso bishinja FPR bashoboye kubona bitewe n’uko abatangabuhamya bagiye bavuguruzanya.

Ibyo aribyo byose ntabwo dosiye y’indege yahagaze kuko imiryango ifite abantu bayo bayiguyemo yiyemeje kugeza ikirego mu rukiko; iyo miryango ikaba yarakusanyije ibimenyetso izashyikiriza abacamanza itagombye gutegereza ibimenyetso byagombaga gutangwa n’ubushinjacyaha, hakaba hategerejwe icyemezo cy’urukiko mukuburanisha iyo dosiye. Muri gahunda yo gutesha agaciro dosiye yo kumenya abahanuye indege, Kagame n’ibyitso bye bagiye bategura mu ibanga abatangabuhamya b’igeze kuba abasilikare b’inkotanyi, maze bakajya guha ubuhamya abacamanza b’abafaransa bakoraga iperereza ryo kumenya abahanuye iriya ndege. Abo batangabuhamya babaga ari abasilikare b’inkotanyi bato cyangwa se binjiye mu gisilikare cy’inkotanyi nyuma y’ihanurwa ry’indege maze bakajya gutanga ubuhamya burimo ibinyoma byinshi cyane bapfunyikiwe na FPR,  ku buryo byagiye byorohera ababuranira Kagame n’abicanyi be mu kubibeshyuza!

Mu kiganiro Major Théogène Rutayomba yagiranye n’Ikongera Libre, nawe yatanze ubuhamya bw’uko yari ku Mulindi maze agapakira mu modoka intwaro zakoreshejwe mu kurasa indege ya Perezida Habyarimana; Rutabomba kandi yahakanye amakuru yemeza ko abakomando b’inkotanyi bacengeye mu mutwe w’interahamwe bakagira uruhare rukomeye mu kwica abatutsi!Ni mwumve uko Rutayomba abivuga:

Ubu buhamya bwa Major Rutayomba ku ihanurwa ry’indege ntabwo bwuzuye kandi burimo ibinyoma byinshi kuburyo budashobora kugezwa imbere y’ubutabera! Dore bimwe mu binyoma tubona muri ubu buhamya:

1)Major Rutabomba Théogène aremeza ko yapakiye mu modoka intwaro zakoreshejwe mu guhanura indege; ariko akaba atazi ubwoko bw’izo ntwaro yapakiye kuko atashoboye kuzibonaho bitewe n’uko zari zihambiriye mu bikarito; yongeraho ko niyo aza kuzibonaho atari kumenya ubwoko bwazo kuko atazi ubwoko bw’intwaro zihanura indege kandi akaba atarigeze yiga no kuzikoresha! Iyi mvugo ya Rutayomba yuzuyemo ibinyoma; none se ni iki kimuhamiriza ko ibikarito yapakiye mu modoka byari birimo intwaro zo kurasa indege kandi atarazibonyeho ndetse akaba atarigeze abona n’imbunda irasa indege? Abasilikare benshi b’inkotanyi bahamirije “Veritasinfo” ko Rutayomba abeshya cyane kuko nta musirikare ushobora kuyoberwa ubwoko bw’ imbunda cyangwa amasasu aba ari gupakira mu mododaka!

2)Major Rutayomba Théogène avuga ko umugambi wo kurasa indege ya Habyarimana yawumenye hasigaye iminsi itatu  kugirango iyo ndege iraswe. Nubwo avuga ibyo ariko, Gén. Kayumba Nyamwasa wari umukuriye yatanze ubuhamya kuri radiyo mpuzamahanga y’abafaransa RFI avuga ko atari azi umugambi wo kurasa indege ya Habyarimana, ko nawe yabimenye nyuma, iyo ndege  imaze kuraswa abibwiwe na Paul Kagame! Bishoboka bite ko umusilikare muto nka Théogène Rutayomba amenya mbere cyane umugambi wo kurasa indege ya Habyarimana ndetse akagira n’uruhare mu gupakira intwaro zo kurasa iyo ndege ariko umuyobozi we mukuru ariwe Nyamwasa we akaba avuga ko atari azi uwo mugambi? Ni nde wahaye amabwiriza Rutayomba yo gupakira izo ntwaro Kayumba umukuriye atabizi?

3)Nyuma y’aho Major Rutayomba Théogène atangiye ubuhamya ku Ikodera Libre, twagerageje gukora ubushakashatsi bwo kumenya amakuru y’ukuri kuri ubu buhamya yatanze kuri ihanurwa ry’indege ya Habyarimana; tukaba twarasanze Rutayomba yaratanze amakuru yuzuye ibinyoma kandi akaba yarabikoze yabigambiriye! Misile zakoreshejwe mu kurasa indege ya Habyarimana zabaga muri batayo yari ishinzwe kurinda umutekano wa Paul Kagame. Izo misile zari zishinzwe gukumira ibitero byashoboraga guturuka mu kirere bikagabwa aho Paul Kagame yabaga ari. Abasirikare bapakiye izo misile mu modoka ni abasilikare b’inkotanyi bazirindaga ari nabo bari bashinzwe gucunga umutekano wa Paul Kagame. Misile zapakiriwe imbere gato y’inzu Paul Kagame yabagamo yari iherereye mu ruganda rw’icyayi rwo ku Mulindi wa Byumba.

Mu buhamya bwa Major Rutayomba arabeshya, kuko nta na rimwe yigeze aba mu basilikare ba FPR barindaga Paul Kagame cyangwa se ngo abe yarari mu basilikare barindaga izo misile. Ntabwo Major Rutayomba yigeze aba ku Mulindi wa Byumba, ahubwo yabanaga na Generali Kayumba Nyamwasa muri DMI, akaba yari ashinzwe umutekano wa Kayumba, icyo gihe DMI ikaba yarabaga aho bita “NKANA” ho muri Byumba. Mu gihe Paul Kagame yabaga ahamagaye Kayumba Nyamwasa ngo amusange ku Mulindi, abarindaga  Kayumba ari nabo Rutayomba yabaga arimo, basigaraga kuri bariyeri yambere y’abasirikare b’inkotanyi barindaga Paul Kagame. Iyo bariyeri yambere ba Rutayomba na bagenzi be basigaragaho yariri nko mu birometero 2 uvuye ku kicaro gikuru cya FPR cyari ku Mulindi. Andi makuru “veritasinfo” yashoboye kumenya yerekana ko Rutayomba abeshya, ni uko mu gihe izo ntwaro zavaga ku Mulindi, abasilikare bazirindaga ndetse n’abarashi bazo babwiwe ko izo misile zoherejwe i Kigali kujya kurinda abayobozi ba FPR bari muri CND; ntabwo bigeze babwirwa ko izo ntwaro zigiye gukoreshwa mu kurasa indege ya perezida Habyarimana.

Ikindi kinyoma gikabije Rutayomba yabeshye ni uko ahakana ko nta bakomando ba FPR bacengeye mu nterahamwe bakajya mu birwa byo gukora jenoside bica abatutsi n’abahutu! Imvugo ya Major Rutayomba ubona yuzuyemo amacenga menshi cyane no kuyobya uburari ku bwicanyi bwakozwe n’inkotanyi! Iyo Rutayomba aza gusubiza ko iby’abakomando ba FPR bacengeye mu nterahamwe atabizi byari kumvikana kuko amakuru menshi “veritasinfo” yahawe na bamwe mu bakomando ba FPR yemeza ko igikorwa cyo gucengeza abakomando b’inkotanyi mu nterahamwe cyakorwaga mu ibanga rikomeye.  Ariko  guhakana agatsemba ko ngo bitigeze bibaho ni ukubeshya; Rutayomba arimo gutinya ko FPR yabereye umusilikare ishobora kuzakurikiranwaho uruhare rwayo muri jenoside, kandi byanze bikunze bizabaho. Igikorwa cyo gutoza abakomando, kubohereza i Kigali, no kubacengeza mu nterahamwe cyakorwaga na Paul Kagame, Kabarebe na Kayonga. Ndetse bakaba barakoreshaga itumanaho rya gisirikare ritumvirizwaga n’andi ma batayo y’abasilikare ba FPR.

Gen. BM Emmanuel Habyarimana yasobanuye neza uburyo abakomando ba FPR bakoze ibikorwa by’ubwicanyi bw’abatutsi mu Bisesero n’ahandi henshi mu gihugu, ibyo akaba yarabivuze  mu kiganiro yakoreye kuri radiyo “Ubumwe”. Gén. BM Habyarimana akaba ari mu bantu bacye cyane bafite impamyabushobozi y’ikirenga mu byerekeranye n’igisilikare ndetse n’amategeko akaba yarabaye na ministre w’ingabo mu Rwanda; dore muri macye uko BM Emmanuel Habyarimana  avuga ikibazo k’ihanurwa ry’indege n’ibimenyetso by’uko abakomando ba FPR bagize uruhare muri jenoside yakorewe abatutsi :

Nyuma y’ubu buhamya bwa Gén.Habyarimana, “Veritasinfo” ifite amakuru menshi n’ubuhamya bwinshi byemeza ko nyuma y’intambara  yo mu 1994 hari abasirikare benshi b’inkotanyi bavugirizwaga induru n’abatutsi bacitse ku icyumu babarega kuba bari mu nterahamwe zabahekuye! Iyo abasilikare nk’abo batahurwaga n’abaturage ko bagize uruhare mu bwicanyi, abakuru b’ingabo za FPR bahitaga babakura  muri ako gace bakabohereza mu yindi ntara mu rwego rwo kuyobya uburari.

Umwanzuro:

Dukurikije ubuhamya bwa Major Théogène Rutayomba bwuzuye ibinyoma ku iraswa ry’indege ya  perezida Habyarimana no ku icengera ry’abakomando ba FPR mu mutwe w’interahamwe, turemeza tudashidikanya ko Major Théogène Rutayomba ari mu butumwa bwa leta ya Kagame yaba abishaka yaba atabishaka! Rutayomba arimo agaragaza ubuhamya bw’ibinyoma mu ihanurwa ry’indege kugirango mu gihe urubanza ruzaba ruri kuburanishwa ku ihanurwa ry’iriya ndege, Kagame n’ibyitso bye bizifashishe ibinyoma bya Théogène Rutayomba mu kwiregura bagaragaza ko abatanga ubuhamya ku ihanurwa ry’iyo ndege baba babeshya. Ubusanzwe mu manza nshinjabyaha, kirazira gutanga ubuhamya burimo ikinyoma cyangwa kwibeshya kuko iyo bigaragaye ikirego gihinduka impfabusa! Kuba Kagame yakwifashisha Major Théogène Rutayomba ni ikintu k’ingenzi cyane kuko byatuma ashobora kuburizamo ubuhamya bwatangwa na Kayumba Nyamwasa mu rukiko kuko atinya ko aramutse atanzemo ubuhamya byamugora cyane kububeshyuza!

Major Rutayomba kandi arahakana cyane ko nta mukomando w’inkotanyi wacengeye mu nterahamwe kuko atinya ko inkotanyi zishoye mu bwicanyi zishobora kuzagezwa imbere y’inkiko zigashinjwa jenoside ndetse nawe arimo kuko hari amakuru menshi amutunga agatoki ko yishoye mu bwicanyi bw’abaturage muri perefegitura ya Gisenyi. Rutayomba arimo guhakana iby’abakomando bacengeye mu nterahamwe kuko icyo kibazo kimaze kubera umuzigo uremereye leta ya Kigali; bityo rero leta ya Kagame iramutse ibonye umuntu uri muri opposition wayifasha guhakana uruhare rwayo mu bwicanyi bw’abatutsi yakakirizwa amaboko yombi ndetse Kigali ikaba yamutera inkunga ikomeye!

Turashimira itangazamakuru rya opposition rishobora guha ijambo abantu banyuranye ku bibazo bikomereye abanyarwanda, tukaba twizerako ibyo bizatuma ukuri kugeraho ku kavugwa ku mahano y’ubwicanyi yagwiririye abanyarwanda. Mushobora kumva kuburyo burambuye ikiganiro cya Rutayomba n’inkondera Libre mukanze kuri iyi nteruro: “Indege ya Habyariamana, ndi mubapakiye ibikoresho byayihanuye”. Naho ikiganiro cya Gén. BM Emmanuel Habyarimana mukaba mwacyumva mukanze kuri iyi nteruro: “Igihugu gikeneye abagabo b’intwari kandi bashyira hamwe

Veritasinfo

S’abonner
Notifier de
guest
0 Commentaires
Inline Feedbacks
View all comments