Rwanda-Mozambique : Abicanyi ba FPR-Inkotanyi binjiye mu mirwano rwihishwa mu ntara ya « Cabo Delgado » !

Nubwo leta y’abicanyi ba FPR-Inkotanyi yashyize ahagaragara uyu munsi wo kuwa gatanu taliki ya 09/07/2021 itangazo rimenyesha ko yohereje abicanyi bayo b’inkotanyi mu gihugu cya Mozambike, amakuru « veritasinfo » ifite agaragaza ko inkotanyi zimaze amezi agera kuri 3 ziri muri Mozambike.

Leta ya Kigali yashyize ahagaragara itangazo ryemeza ko k’ubusabe bwa leta ya Mozambique, uyu munsi Kigali yohereje ingabo n’abapolisi bagera ku 1,000 mu ntara ya « Cabo Delgado » iri mu majyaruguru y’icyo gihugu. Iyi ntara ya Mozambique imaze igihe yarazahajwe n’ibikorwa by’iterabwoba n’umutekano mucye bikorwa n’umutwe w’inyeshyamba w’abahezanguni biyitirira idini ya Islamu, uwo mutwe ukaba uzwi muri ako gace ku izina rya «Al-Shababb».

Itangazo rya leta ya Kigali yasohoye kuwa kane taliki ya 08 Nyakanga 2021 rivuga ko ingabo n’abapolisi bayo yohereje mu ntara ya « Cabo Delgado » bazakorana bya hafi n’ingabo za Mozambique hamwe n’ingabo zizoherezwa n’umuryango wa SADC. Amakuru « veritasinfo » ikesha urubuga rwitwa « ligne de défense »yemeza ko u Rwanda rwohereje ingabo zarwo mu mezi yashize muri Mozambique, zikaba zaragaragaye mu gace kitwa Pemba aho zarimo zishinga ibirindiro.

Perezida Nyusi wa Mozambique yagiriye uruzinduko mu Rwanda mu kwezi kwa kane (ifoto ya BBC)

Amakuru menshi yanyuze ku mbuga nkoranyambaga akaba  yemeza ko aba bicanyi b’inkotanyi bari Pemba muri Mozambique ko aribo bashimuse umunyamakuru Cassien Ntamuhanga wari warahungiye muri icyo gihugu, ubu akaba nta muntu uzi irengero rye.  Urubuga « ligne de défense» rwemeza ko umutwe uri kurwanya leta ya  Mozambique atari intagondwa ziyitirira idini rya Islamu nk’uko bivugwa, ko ahubwo ari abaturage bo muri iyo ntara bivumbuye ku butegetsi bwa Mozambique.

Mu kurwanya abo baturage bivumbuye ku butegetsi muri Mozambique, SADC (umuryango wo gutabarana uhuza ibihugu byo mu majyepfo y’Afurika) wemeje ko ibihugu biwugize bizohereza ingabo zigera ku bihumbi 3 mu ntara ya « Cabo Delgado » mu kurwanya abo bivumbuye ku butegetsi, icyo gikorwa cyo kohereza ingabo kikaba kizatwara amafaranga agera kuri miliyoni 10 z’amayero(amafaranga akoreshwa mu burayi) kandi ayo mafaranga akazatangwa n’ibihugu bigize SADC.

Kubera ko ibihugu bigize SADC biri gutinda gutanga ayo mafaranga no kohereza ingabo vuba muri « Cabo Delgado », byabaye ngombwa ko perezida wa Mozambique yitabaza ibindi bihugu birimo u Rwanda, Ubufaransa na Politigali mu kurwanya umutwe wivumbuye ku butegetsi bwe. Abafaransa bakaba bafite inyungu nyinshi cyane muri icyo gikorwa cyo kurwanya umutwe wivumbuye kuri leta  ya Mozambique bitewe n’uko abarwanyi bawo babujije isosiyete y’Ubufaransa yitwa « TOTAL » gucukuru umwuka wa Gazi wabonetse muri ako karere.

Urubuga rwa « BBC-Gahuzamiryango » rwemeza ko ingabo z’u Rwanda muri Mozambique zizakora “imirwano n’ibindi bikorwa byo kugarura umutekano” zishyizemo umuhate kugirango zongere  gusubizaho ubutegetsi bwa Mozambique muri iyo ntara. Leta y’u Rwanda ivuga ko ingabo zayo zigiyeyo hakurikijwe “amasezerano menshi” ibihugu byombi bifitanye yasinywe mu 2018. Ibikorwa by’izo nyeshyamba muri Cabo Delgado bikaba bimaze guhitana abasivili babarirwa mu bihumbi n’abandi benshi bavuye mu byabo bagahunga.

BBC ivuga ko mu kwezi kwa kane Perezida Filipe Nyusi wa Mozambique yari i Kigali “kugisha inama Kagame ku kibazo cya « Cabo Delgado ». Twababwira ko ubushuti bwa Nyusi na Kagame buteye impungenge impunzi z’Abanyarwanda zahungiye mu bihugu by’Afurika y’amajyepfo kuko abicanyi b’inkotanyi babonye uburyo bwo kwica izo mpunzi nk’uko babikora mu gihugu cya RD Congo. Urugero twatanga ni uko kuva abo bicanyi b’inkotanyi bakoza ikirenge muri Mozambique bahise bashimuta umunyamakuru Cassien Ntamuhanga !

BBC ivuga ko Cassien Ntamuhanga, Umunyarwanda utavuga rumwe n’ubutegetsi mu Rwanda, yafashwe n’igipolisi cya Mozambique, bikaba byari byitezwe ko azoherezwa mu Rwanda ariko ibihugu byombi bikaba nta masezerano yo kohererezanya abakekwaho ibyaha bifitanye nk’uko umunyamategeko wa Ntamuhanga yabibwiye icyo kinyamakuru mu kwezi gushize. Kugeza ubu irengero rya Ntamuhanga ntirizwi. Abategetsi ba Mozambique bavuze ko hari gukorwa iperereza.

Kuba Inkotanyi zinjiye ku butaka bwa Mozambique mu ntara ya « Cabo Delgado » ihana umupaka n’igihugu cya Tanzaniya, biragaragara ko umutekano mucye uri muri iriya ntara ugiye gusakara mu karere kose, kuko abicanyi b’inkotanyi bagiye guhiga impunzi z’Abanyarwanda ziri muri ibyo bihugu, ibyo bikazateza impagarara mu karere kose kandi zitewe na perezida Nyusi wa Mozambique winjije ibirura by’inkotanyi mu karere kari gasanzwe karangwamo umutekano, none ubu kakaba kagiye kuwubura  kubera inyungu bwite za Nyusi zo kuguma ku butegetsi.

Abanyarwanda bari mu bihugu by’Afurika y’amajyepfo bagomba kwimenya bakaba maso kandi bakunga ubumwe mu guhangana n’abo bicanyi bakomeje gutera imiborogo muri Afurika yose !

Veritasinfo

Veritas

Leave a Reply