Rwanda: « Muzamenya ukuri, maze ukuri kubahe kwigenga . » (Espérance MUKASHEMA).

Madame Espérance MUKASHEMA, umuyobozi wa radiyo Ubumwe, arahamagarira abanyamakuru bari hanze y'u Rwanda kugirana ubufatanye.

Mu gihe mu Banyarwanda n’ ahandi henshi mu gihugu no hanze yacyo hakivugwa iyicwa rya Kizito MIHIGO wemeye kuryamira ubugi bw’ intorezo aho kuryamira ukuri, ubutegetsi bwo mu Rwanda bwongeye kwibasira abasore b’abanyamakuru banze kugurwa ngo barye iminwa babeshya rubanda nk’uko abenshi mu banyamakuru bakorera ibinyamakuru by ubwo butegetsi babikora. Ab’ ingenzi muri bo bari bamaze kumenyekana cyane ni NSENGIMANA Théoneste w’UMUBAVU TV na CYUMA Hassan Dieudonné wa ISHEMA TV.

Aba bataripfana mu itangazamakuru, baje bakurikira bagenzi babo benshi bishwe, abafunzwe n’abahunze igihugu kubera gusa umwuga wabo wo kumenyesha rubanda amakuru y’ibibera mu karere nyabuzima barimo. Nyamara n’ubwo abategetsi bo mu Rwanda bakora ibyo byose byo guhohotera abo banyamakuru bagamije guhisha ibikorwa bibi bagirira abaturage,ukuri ko bananiwe kugutwika ngo gushye cyane cyane ko urubyiruko rw’u Rwanda rwiyemeje kutazatatira Kizito MIHINGO ngo rureke amateka yacu akomeze kugorekwa.

Nguko rero uko ku wa gatatu w’iki cyumweru turangije twabashije kumenya amakuru y’umukobwa basanze hafi y’uruganda rw’icyayi rwa Pfunda yazahajwe n’inzara mugihe abategetsi bo badashaka kwemera ko icyo kibazo kinzara cyamaze kubarenga. Hari n’abandi batatinye kumenyeshako abayobozi bo mu Mudugudu wa Nyabisindu, Akagari ka Nyabisindu, Umurenge wa Remera, Akarere ka Gasabo barangwa n’ivangura n’ubwikanyize mugutanga amafunguro agenewe abaturage k’uburyo hari abamaze gufata inshuro zirenze ebyiri kandi  hari n‘abandi baturage bashonje cyane batarafata ibyo kurya na rimwe.

Kuvuga ukuri ku byo abaturage bagenda babona mu tugari twabo bibafasha gusobanukirwa imigambi mibisha bafitiwe n’ubutegetsi bubi, kandi bikaba birushaho kubahuza mugufatira hamwe umugambi wo guhagurukira rimwe bagahangana n’ubutegetsi bubatsikamiye mu gikorwa cyo kubafungira mu mazu yabo ngo bicwe n’inzara; nta virusi mbi kandi yica nabi kurusha inzara. Dushimire rero abo bose badakangwa n’itera bwoba rya Leta y’u Rwanda bakaba biyemeje kuzakomeza gutara amakuru yose kubibangamiye abaturage b’u Rwanda cyane cyane muri iki gihe duhanganye n’icyorezo cya “Coronavirus”.

Niyo mpamvu tugomba twese gushyigikira ubu buryo bushya bwo kumenyekanisha amakuru kuburyo bw’uruhererekane rw’ibanga maze ntiduhere mu icuraburindi leta ishaka kuduhezamo. Nkaba nsaba rero abanyamakuru bose bakorera hanze gukorana bya hafi kugirango inkuru zose zivuye mu gihugu zitanganzwe k’uburyo bw’umucyo, ntagushyira abantu mu rujijo ahubwo butere ababakurikira gusobanukirwa neza n’akaga Abanyarwanda bakomeje guhura nako buri munsi. Koko rero nitumenya ukuri ,tuzafatanya maze ukuri kuzaduhe kwigobotora igitugu, kuduhe no kwigenga.

Madame Espérance MUKASHEMA (Radiyo Ubumwe)

Subscribe
Notify of
guest
0 Comments
Inline Feedbacks
View all comments