Rwanda: “Ndamagana Ubukinduzi nk’ubwa koronavirusi” (Gasimba Francisko Saveri)

Harakabaho GIKONGORO yatubyariye abahanzi nka GASIMBA Francisco Saveri na Mutagatifu KIZITO MIHIGO

Gasimba Francisko Saveri ni umwarimu muri Kaminuza y’u Rwanda akaba ari n’umuhanzi, umwanditsi w’ibitabo n’umusizi w’umuhanga. Gasimba Francisko Saveri azwi cyane ku bitabo yanditse birimo ibisogo by’Ubuse; ibyo bisigo bikaba byaranengaga cyane cyane ubutegetsi bwa Habyarimana Juvénal, muribyo twavuga: “Indege y’ubumwe, Bangaheza n’Isiha rusahuzi”! Mu kwezi kwa Werurwe uyu mwaka w’2020, Gasimba Francisko Saveri yongeye kutugezaho undi muvugo wa 12 yise : “UMWANZURO”. Gasimba akaba avuga ko uwo muvugo ari uwa nyuma.

Muri uyu muvugo “UMWANZURO“, Umuhanzi Gasimba Francisko Saveri aramagana mu mvugo ya gihanaga akarengane k’ibihekane gakabije abanyarwanda bakomeje guhura nako karimo : ubwicanyi, kuvangura, gukubitwa , gusenyerwa, kwamburwa ibyawe n’ibindi. Mu gisobanuro cye, Gasimba Francisko Saveri akaba avuga ko uyu muvugo we ari uwanyuma, iyo mvugo ikaba yarateye abantu benshi impungenge! Bamwe baragira bati: Ese aho, Gasimba ntashobora kuba yaravuze ikimuri ku mutima kandi akaba azi neza ko abakinduzi bahitanye Kizito Mihigo batazamwihanganira nawe bakazamunyuza iy’ubusamo kubera uko kuri kwe? Twizereko bitazagenda gutyo uretse ko “umuntu adatinya ishyamba ahubwo atinya icyo yahuriyemo nacyo”!

Iyi leta ya FPR-Kagame ntabwo irebera izuba abahanzi n’abanyabwenge, abenshi barayihunga cyangwa ikabica, gusa icyo Inkotanyi zitazi ni uko umuhanzi adapfa, kuko n’ubwo umubiri we wakwicwa agashyingurwa, ibihangano bye birasigara kandi bikarushaho gutanga ubutumwa burimo uko ibihe bihora bisimburana iteka! Ntabwo twashatse kujya mu busesenguzi bw’umuvugo wa Gasimba yise “UMWANZURO”, ahubwo twahisemo kubagezaho uwo muvugo mu ‘ijwi rye bwite no mu nyandiko, noneho buri wese akisesengurira!

Munsi gato y’iyi foto ya Gasimba Francisko Saveri, fungura umuvugo we niba kandi bitagukundiye wusome munsi aha:

Umuvugo “UMWANZURO” wa Gasimba Francisko Saveri

Ndamagana!

«Ndamagana ubukinduzi nk’ubwa koronavirusi! Mujye mwikiriza uko ndangije igitero!

Ndamagana umutima mutindi, utera gushahura uwo mwashakanye, utitaye ku bana mwabyaranye!

Ndamagana umutima mutindi, ugutera gukinduza urusoro ngo urubahiriza inshingano, kandi igihano cyo kwicwa cyarahanaguwe mu itegekonshinga, twitoreye hafi ijana ku ijana!

Ndamagana umutima mutindi ugutera gutaraka, ugatatamura ibyivugo, ko wivuganye abo wita ababisha, ukabashahura, ukabashinyagurira, nk’uterekera icumu rya Gahunde ka Nyakaja!

Ndamagana umutima mutindi, ugutera gusenyera abanyantege nke, ukabatekeza imbumburi mu mvura y’amahindu, ukabahindura imburaburaro, ngo babangamiye iterambere ry’abashoramari, nk’aho abashabitsi barusha agaciro abenegihugu!

Ndamagana abafite ibisigisigi by’ingengabitekerezo ya jenoside yibasiye abatutsi, kimwe n’abashyira abahutu mu gatebo kamwe, n’abakomeje kunena abashigajwe inyuma n’amateka kugeza n’aho banena izina ryabo gakondo, ngo bibagirane, bazimire!

Ndamagana umutima mutindi ugutera guhunahuna no gushakira imari mu maraso y’inzirakarengane!

Ndamagana abaruca bakarumira, bagahitamo kuba ibyitso by’inkozi z’ibibi!

Ndamagana abakubitira abana ku mazi ba nyina bavomye, bakarenga bakamera nka ya ngwe ikurira umwana, ikakurusha kurakara!

Ndanimakaza!

«Ndimakaza ubwunamuzi nk’ubwa Kristo ku musaraba! Murajya mwikiriza uko ndangije igitero.

Ndimakaza umutima w’ibambe, ugutera gutabara abari mu kaga, utitaye ku buzima bwawe, nta yindi nyungu utegereje uretse gukiza ubuzima bwabo!

Ndimakaza umutima w’imbabazi, ugutera kubabarira abanzi bawe kandi baraguteye kugira inguma ku mutima!

Ndimakaza umutima w’ubutwari w’abavugabutumwa batavugira mu matamatama, cyane cyane bari kuri Altari, bamagana ubukinduzi bwibasira umubiri, ubukinduzi bwibasira umutima, ubukinduzi bwibasira ibitsina n’imitungo, bamagana n’akarengane k’ibihekane!

Ndimakaza umutima nama utera abayobozi guhumuriza rubanda, birinda kubacundaga, «manipuler, manipulate», ahubwo bababwira ijambo ryiza mugenzi w’Imana!

N’ubundi umuyobozi yakabaye Imana y’i Rwanda!

Ndimakaza umutima w’impuhwe n’urukundo, ugutera kubura ibitotsi kubera umusonga w’undi, ukabigaragaza umuzanira igituma umutima we usubira mu gitereko!

Ndimakaza umutima w’urugwiro, utera abashakanye gushyira imbere ubusabane, nubwo baba bashavujwe n’ubukene, cyangwa ibihe by’amajye nk’ibi bya Corona virusi!

Tubishimiye Imana!»

Gasimba yanzura umuvugo we mu ndirimbo, agira ati: Amahoro ku isi y’abayituye twese, aho turi hose, turayakeneye!

Subscribe
Notify of
guest
0 Comments
Inline Feedbacks
View all comments