Rwanda: « Ndazira ko mvuga ukuri mudashaka kumva » (Aimable Karasira).

Aimable Karasira ntabwo yibona mu batutsi kandi nta nubwo yibona mu bahutu
Aimable Karasira na Kizito Mihigo ni abacikacumu FPR yiyemeje kurimbura ari incike

Kuri uyu wa gatanu taliki ya 23/07/2021 abicanyi bo muri RIB bongeye kwiha amenyo y’abasetsi ubwo bakinaga ikinamico ryo kuregera ubucamanza bwa Kagame ibyaha ashinja Aimable Karasira! Karasira arashinjwa ibyaha byo kuvuga ko Kabuga Félicien azira ko atatanze umusanzu muri FPR no kuba umutungo we wose warafashwe na Paul Kagame, Karasira kandi akaba asinjwa kuvuga ko jenoside mu Rwanda itateguwe ko ahubwo yatewe n’ihanurwa ry’indege  yarimo perezida Juvénal Habyarimana na Cyprien Ntaryamira w’Uburundi.

Karasira akaba atemera ibi byaha yahimbiwe, kuri we akaba abona azira ukuri avuga FPR idashaka kumva; Aimable Karasira yagize ati:  » Nta ngaruka z’amacakubiri zatewe n’ibiganiro natangaga, ahubwo nshobora kuba naravuze ukuri kudakenewe kumvywa. icyaha kijyanye na jenoside cyo rwose mukireke kuko ndi umucikacumu, mu muryango wanjye hasigaye ingerere, nisanze nta bwoko mbarizwamo baba Abahutu cyangwa Abatutsi, akaba ariyo mpamvu njyewe niyita Umushingwacumu. Ndababwira ko iyo bigeze ku mateka ya jenoside hari ababyitwaza ariko abanyuze mu bikomeye by’iyo jenoside mu buryo bwa nyabwo bagahitamo kwicecekera.Ukuri kose si ngombwa kukuvuga, ahari kera abantu bazemera ko ibyo mvuga ari ukuri kuko amateka nyayo yandikwa n’abari ku butegetsi…ku mutima wanjye nemera ko n’ubwo nafungwa cyangwa se nta fungwa,  système y’ubutegetsi buriho ntabwo nyemera, numva ari abanzi banjye. »

Ibi byaha biregwa Karasira birasekeje kuko biramutse ari uko bimeze Inkotanyi ubwazo nizo zakwishinja kwamamaza ibyo byaha. urugero rutari kure ni uko buri mwaka ku italiki ya 07 Mata, inkotanyi zibuka intangiriro ya jenoside mu Rwanda yatewe n’iraswa ry’indege ya Habyarimana ku italiki ya 6 Mata 1994. Mu kwibuka iyo sabukuru kandi Inkotanyi zivuga ko indege ya Habyarimana yarashwe n’intagondwa z’abahutu zidashaka ko zimenyekana kugirango zibone urwitwazo rwo kwica Abatutsi! None se icyo Karasira yavuze kinyuranyije n’ibi inkotanyi zivuga ni ikihe? Ese Inkotanyi zizashyikiriza ubutabera umuryango w’abibumbye uvugako jenoside mu Rwanda itateguwe kandi ko yatewe n’ihanurwa ry’indege ya Habyarimana? Iri huzagurika ry’abicanyi b’inkotanyi rirerekana ko iminsi y’ubutegetsi bwazo ibaze!

Umunyamakuru wa radiyo mpuzamahanga VOA i Kigali arasobanura ku buryo burambuye urubanza rwa Karasira (Fungura amajwi)

Veritasinfo

Soyez le premier à commenter

Poster un Commentaire

Votre adresse de messagerie ne sera pas publiée.