Rwanda: Ni iyihe sano iri hagati ya FPR-Kagame n’URUPFU? Sergeant Major Kabera Robert ni atubere ikitegererezo!

Urupfu ntirugira inshuti, urarurwanya rukaguhita, warukunda nabwo rukaguhitana! FPR-Kagame nayo ni ko iteye, abanzi bayo ibakubita agafuni ariko n’abakunzi bayo bayirata ibigwi birangira ibahembye kubakubita agafuni! Uwavugako FPR- Inkotanyi bisobanura Urupfu ntabwo yaba yibeshye na gato! Sergent Major Kabera Robert ni umusilikare wabaye intyoza mu kuririmba no kurata ibigwi by’ubwicanyi bya FPR- inkotanyi ariko bigeze aho izo Nkotanyi yarase ibigwi nawe zimuhigira hasi kubura hejuru kugirango zimuhembe agafuni! Ese indirimbo yahimbye ziha morale Inkotanyi nazo zigiye gucibwa mu Rwanda nk’uko indirimbo za Kizito Mihigo zaciwe?

Sgt Robert ni umwe mu basilikare b’abahanzi babaye ibyamamare cyane mu guhimba indirimbo ziha morale igisilikare cya RDF akaba ndetse ari no mu mutwe w’abaririmbyi b’ingabo z’inkotanyi witwa “Army Jazz Band“. Kuwa mbere taliki ya 23/11/2020 nibwo inkuru yasakaye hose ko ubuyobozi bukuru bw’ingabo z’inkotanyi RDF buri gushakisha uruhindu Sergeant Major Kabera Robert ngo bitewe ni uko yakoze icyaha cyo gusambanya umwana we w’umukobwa ufite imyaka 15, icyo cyaha akaba yaragikoze mu ijoro ryo kuwa gatandatu taliki ya 21/11/2020; nyamara kuri iyo taliki Sgt Robert Kabera yari yarageze muri Uganda ndetse yanditse mu bitabo by’abaka ubuhunzi ku italiki ya 19/11/2020

Bitewe n’uko umuco w’inkotanyi ari uwo kunyereza abantu nyuma bagatoragura imirambo ku gasozi , abantu bahise bagira impungenge ko Sergent Major Kabera Robert nawe yanyerejwe n’inkotanyi nyuma zikamukubita agafuni. Ikinyamakuru cyo muri Uganda kitwa “Daily Monitor” cyatangaje inkuru ivuga ko Sergent Major Kabera Robert yahungiye muri Uganda, akaba yarahageze kuwa kane taliki ya 19/11/2020. Sergent Major Kabera Robert  akaba yaratangarije icyo kinyamakuru ko impamvu yatumye asaba ubuhungiro muri Uganda ari ukubera ko ari guhigwa na Leta y’inkotanyi yari abereye umusilikare kugirango imugirire nabi. Ubu twandika iyi nkuru , Bwana Sergent Major Kabera Robert yanditse mu bitabo by’ishami ry’umuryango w’abibumbye ryita ku mpunzi muri Uganda UNHCR, twizereko atazanyerezwa nka Mutabazi!

Aba basore bari mubashyinguye Madame Joy Agaba hamwe na Robert nabo bakaba bari guhigwa n’abicanyi bo muri FPR!

Sergent Major Kabera Robert akaba yarabwiye “Daily Monitor” ko yaburiwe n’abasilikare b’inkotanyi babaye abanyeshuri be yigishaga umwuga w’ubutasi, abo banyeshuri bakaba baramubwiye ko Leta ya FPR irimo itegura uburyo bwo kumugirira nabi kubera amabanga azi y’urupfu rwa Kizito Mihigo wari inshuti ye magara ndetse akaba afitanye isano n’umuryango wa Fred Gisa Rwigyema wabaye umuyobozi w’ikirenga wa FPR Inkotanyi akaza kwicwa nyuma y’umunsi umwe gusa inkotanyi ziteye u Rwanda ku italiki ya 2/10/1990! Sergent Major Kabera Robert kandi yasobanuriye icyo kinyamakuru ko yatangiye kugirana ibibazo na FPR Kagame nyuma yaho ayoboreye imihango yo gushyingura mushiki wa Rwigema Joy Agabe witabye Imana mu mwaka w’2019, bikaba bivugwako yahitanywe n’uburozi yahawe n’ubutegetsi bwa FPR kuko yari atangiye kumena amabanga y’urupfu rwa Rwigema.

Mu guhunga kwe, Sergent Major Kabera Robert yanyuze mu nzira y’ubusamo ku mupaka wa Kagitumba ari kumwe n’umugore we ndetse n’uruhinja rw’amezi 7 ariko bitewe n’uko byabaye ngombwa ko banyura mu mazi bari koga, byatumye uruhinja baruta mu nzira (twizereko abantu basigiwe urwo ruhinja bazarufata neza); bakaba barasigiye inshuti zabo abandi bana bakuru kandi bakaba badashobora kuvuga aho baherereye kuko inkotanyi zishobora kubakubita agafuni! Ngayo amaherezo yo gukorera FPR Inkotanyi uko agenda, ariko zirarushywa n’ubusa kuko amaherezo yazo ari ukurimbuka.

Twizere ko Leta ya Uganda n’umuryango wa UNHCR bigomba gucunga umutekano wa Sergeant Major Kabera Robert ku buryo bukomeye kuko afite amabanga menshi yerekeranye n’urupfu rwa Kizito Mihigo ndetse na Fred Gisa Rwigema ndetse n’abandi benshi inkotanyi zishe kandi zikomeje kwica.

Veritasinfo


Veritas

2 Comments

  1. FPR irenze Apartheid.Nta kintu kitagira iherezo, FPR nayo izava mu nzira! Nta gihe Rwanda yacu yigeze iyoborwa nabi nko ku gihe cya FPR ikorera inyungu za ba Mpatsibihugu. Mutegereze icyo FPR iduhishiye muri DRC. Ubu Felix ntaramenya systeme ya FPR?

Leave a Reply