Rwanda: Nta butabera umubyeyi wanjye ashobora guhabwa na leta yamushimuse (Roger Rusesabagina)

Umucamanza Mukarugira Théodosie yabaye igipfamatwi ku bibazo yashyikirijwe na Rusesabagina

Ubutabera bwa leta y’abicanyi b’i Kigali bumaze kwivuguruza 3 kose mu binyoma bwagiye bukwiza ku isi yose ku kibazo cya Paul Rusesabagina bwashimuse! Ikinyoma cya mbere cyagaragaye ku italiki ya 31/08/2020 ubwo abicanyi bo muri RIB bavuga ko Paul Rusesabagina bamushimuse babifashijwemo n’ibihugu byinshi by’amahanga; nyuma yaho baje kuvuga ko babeshye! Ikinyoma cya kabiri batinya gusubiramo ni uko RIB yavuze ko yafatiye Rusesabagina ku kibuga cy’indege cy’i Kanombe i Kigali, aha ntabwo barashobora kugaragaza uko yageze mu Rwanda kandi bizwi ko yari atuye muri Amerika akaba yarashimutiwe i Dubaï (Leta zunze ubumwe z’Abarabu); ikinyoma cya gatatu ni uko abo bicanyi ba RIB babeshye isi yose ko igihugu cy’Ububiligi cyabahaye dosiye yuzuye irimo ibimenyetso bishinja ibyaha Paul Rusesabagina , nyamara mu ikinamico ririmo ubuswa bwinshi, kuri uyu wa gatanu taliki ya 23/10/2020, ingirwabacamanza ba leta y’ibyihebe ya Kigali bavuze ko  Rusesabagina agomba kuguma muri gerezaa ngo kuko agihimbirwa dosiye yo kumushinja ibyaha! 

Mu kiganiro Bwana Roger Rusesabagina yagiranye na Madame Espérance kuri radiyo “Ubumwe” kuwa kane taliki ya 22/10/2020, yagaragaje ko nta butabera umubyeyi we Paul Rusesabagina ashobora guhabwa na leta ya mushimuse. Roger Rusesabagina yagaragaje ko igikorwa cyo gushimuta umubyeyi we cyatangiye cyera cyane mbere y’uko aninjira mu bikorwa byo kuvugira abanyarwanda bakomeje guhohotera na leta y’abicanyi b’i Kigali. Roger Rusesabagina yagaragaje ko Rusesabagina yahawe igihembo na leta ya FPR-Kagame ariko yanga kujya kugifata mu Rwanda kuko bari bamuteze umutego wo kumugirira nabi!  Ese gushimuta Rusesabagina hari icyo bizagabanya ku butwari bwe bwatumye ahabwa ibihembo binyuranye mu mahanga kubera uruhare yagaragaje rwo gukiza abantu barenga 1200 muri jenoside yo mu 1994? Ntacyo ibyo bishobora guhinduraho ahubwo gushimuta Rusesabagina bizereka amahanga ko u Rwanda rwashimuswe n’ibyihebe byitwa FPR-Inkotanyi! Ubuswa n’amakosa menshi akomeje kugaragara mu kibazo cy’ishimuta rya Rusesabagina byatumye ingirwabucamanza bwa Kagame bwarahindutse urwenya rubabaje ku isi yose!

Urwenya rwa mbere rwagaragajwe n’abacamanza ba leta y’abicanyi ni uburyo banze ko abanyamategeko baburanira Rusesabagina bakandiga ikirenge mu Rwanda n’umwe mu banyamategeko washoboye kugerayo bakaba baranze ko abonana nawe! Leta ya FPR yashimuse Rusesabagina, abacamanza bamuburanisha bakaba bakorera leta ya mushimuse noneho iyo leta ikaba ari nayo yahaye Rusesabagina abanyamategeko bayo bamwunganira, iyo witegereje ibyo abo banyamateko bahawe Rusesabagina bakora ubona ari urwenya gusa! Urugera ni aho abo banyamategeko bagiye kuvuga imbere y’ubucamanza bakorera ko Paul Rusesabagina yafunzwe ku buryo bunyuranyije n’amategeko igihe kingana n’iminota 7! Kuki abo banyamategeko bunganira Rusesabagina badashobora kuvuga ko yashimuswe? Muri iri kinamico ryo kuburanisha Rusesabagina, ingirwabucamanza bwa FPR bugomba gusubi nibura ibibazo 5 bikomeye bizagira ingaruka zikomeye mu mateka y’iyi ngoma y’abicanyi! Ibyo bibazo ni ibi bikurikira:

1)Rusesabagina yafatiwe i Kigali ate? Yahageze mu buhe buryo? Iki kibazo kirakomeye cyane kuko gikubiyemo icyaha cyo gushimuta Rusesabagina kandi icyo cyaha kikaba gihanwa n’amategeko mpuzamahanga. Icyaha cyo gushimuta umuntu kikaba gishinjwa imitwe ikora ibikorwa by’iterabwoba. Kudasubiza iki kibazo bihita bigaragaza ko leta ya Kigali nayo ikora ibikorwa by’iterabwoba ( Etat terroriste).

2)Ubwenegihugu bwa Paul Rusesabagina ni ubuhe? Iki kibazo cyatumye ingirwabacamanza ba FPR zihinduka ibipfamatwi ni ibiragi ku kibazo Paul Rusesabagina yababazaga, Rusesabagina yagize ati :”Nababwiye ko no mu rubanza rushize, mu Rukiko Rwisumbuye, iki kibazo nagisubiyemo, ahubwo icyo ntumva ni uko urukiko ndubwira rimwe, kabiri, gatatu ntirwumve ngo runkorera icyo narubwiye […] niba njye ndi umunyarwanda, irangamuntu yanjye ni iyihe, pasiporo yanjye ni iyihe, unshaka ankurahe? […] njye kuri njye ndi Umubiligi.” Iki kibazo ntabwo cyoroheye abicanyi b’i Kigali, ubusanzwe iyo umuntu yahunze igihugu cye ahita atakaza ubwenegihugu bw’igihugu cye kandi amategeko mpuzamahanga asumba kure amategeko y’igihugu. Ingirwabacamanza ba Kigali bazasubiza bate iki kibazo?

3)Ese Rusesabagina ararwaye? Iki kibazo nacyo ni ingorabahizi kuri Kigali; ingirwabacamanza ba Kigali bavuga ko Rusesabagina arwaye ariko bakaba batamwemerera kujya hanze kuko byatuma asubira mu gihugu cye cy’Ububiligi , iki gisobanuro kikaba gihita gishimangira ko Paul Rusesagina ari umubiligi aho kuba umunyarwanda kandi akaba adashobora guhabwa ubutabera kuko ari Umubiligi nk’aho icyo gihugu kitagira ubutabera!

4)Kuki Rusesabagina adahabwa abunganizi be yasabye? Iki kibazo cyakunze kugaruka kenshi ariko Kigali igasubiza ko abanyamategeko Rusesagina afite ariwe wabisabiye kandi abemera ariko nyuma yaho Paul Rusesabagina yanditse ibaruwa isaba ko agomba kunganirwa n’abanyamategeko yatoranyirijwe n’umuryango we bityo kuri we akaba atunganiwe mu byukuri mu rubanza afite! Kigali izasubiza ko yangiye Rusesabagina abanyamategeko be ishingiye kuki?

5)Abaturage ba Nyabimata bazajya gushinja Paul Rusesabagina mu rukiko mu buhe buryo? Mu cyemezo ingirwamucamanza wa Kigali yafashe cyo kongera igifungo cya Rusesabagina yagize bute : “Ubushinjacyaha bwagaragaje kandi ko hari abatangabuhamya bacyegeranywa barimo aba Nyabimata muri Nyaruguru na Gisagara batarabazwa hategerejwe ko bavugishwa. Urukiko rwanzuye ko Paul Rusesabagina afunzwe mu buryo bwemewe n’amategeko kuko Ubushinjacyaha bwubahirije ibijyanye n’igihe cyemewe n’amategeko cyo gutanga ikirego“. Umucamanza MUKARUGIRA Théodosie akaba yagize ati :” Hari impamvu ifatika ituma uregwa [Rusesabagina] yongererwa igihe cy’iminsi 30 cyo gufungwa by’agateganyo.” Ese abaturage ba Nyaruguru bazavuga ko babonye Rusesabagina abatera kandi yarabaga muri Amerika?

Ikigaragara cyo ni uko Rusesabagina nta butabera azahabwa na leta yamushimuse nk’uko umuhungu we Roger Rusesabagina abyemeza; ahubwo icyo umuryango wa Rusesabagina ushobora gukora ni uko nawo ugomba gushyikiriza ubutabera bw’Amerika (USA) igihugu Rusesabagina yabagamo cyangwa se ubutabera bw’Ububiligi aricyo gihugu Rusesabagina afitiye ubwenegihugu (juridiction à compétence universelle) ikirego cy’uko umubyeyi wabo yashimuswe maze abagize uruhare muri iryo shimutwa bagashyikirizwa ubutabera.

Hasi aha murumva ikiganiro Roger Rusesabagina agiranye na Radiyo Ubumwe

Subscribe
Notify of
guest
1 Comment
Oldest
Newest Most Voted
Inline Feedbacks
View all comments
Hamisi
Hamisi
24 October 2020 13 h 04 min

Igihe.com mu rindi kinamico rigamije kuvuguruza padiri T.Nahimana ngo Nyakwigendera yagiye kureba basketball!! Ururimi rwa padiri rurarusha ingufu Katyusha za RDF. Courage padiri komeza ubahe. The silent majority of Rwandans are behind you.