Rwanda: Nyuma yo kwica Kizito Mihigo, Paul Kagame avuga ko agiye gukurikizaho Madame Victoire Ingabire!

Ese Kagame abona gufunga cyangwa kwica Madame Victoire Ingabire byamuha agahenge?

Kumena amaraso y’inzirakarengane nicyo kintu cyonyine umwicanyi Paul Kagame yishimira! Mu kiganiro yagiranye n’umuyobozi w’ikinyamakuru cya “Jeune Afrique” François Soudan  n’Umunyamakuru Nicholas Norbrook wa The Africa Report, ku italiki ya 19/06/2020, umwicanyi Kagame yagize icyo avuga ku mpamvu yatumye yica  Kizito Mihigo n’imigambi mibisha afitiye Madame Victoire Ingabire!

Ikinyamakuru “Jeune Afrique” nicyo Kagame atangamo amafaranga menshi kugirango cyamamaze isura ye nziza mu mahanga uretse ko ibikorwa n’imvugo bya Kagame bigenda birushaho kumuhindanya, akaba yarahindutse Rubebe aho kugaragara neza nk’uko abyifuza. Kagame azwiho kuba ari umunyagitugu ruharwa, wiyemeje kuzagwa ku butegetsi,akaba ari umubeshyi bitavugwa, ubutegetsi bwe akaba  nta demokarasi , nta burenganzira bw’ikiremwamuntu, nta bwisanzure bwo kuvuga icyo utekereza biburangwamo kandi Kagame akaba ari umujenosideri n’umwicanyi ruharwa (un tyran).

Mu kiganiro yagiranye n’abo banyamakuru bombi, Kagame yongeye kugaragaza isura ye nyayo koko! Kagame yavuze ko Ingabire yaburanishijwe agahamywa n’ibyaha birimo n’imikoranire ye n’imitwe yitwaje intwaro ifite uruhare mu guhungabanya akarere. Nyamara Kagame yibagiwe ko Madame Victoire Ingabire yamutsinze mu Rukiko nyafurika rushinzwe uburenganzira bwa muntu n’abaturage ruherereye Arusha, rwemeje ko yarenganijwe, ko uburenganzira bwe  butubahirijwe, ndetse rukaba rwarasabye  Kagame kumuha indishyi y’akababaro kugeza ubu akaba yarananiwe kuyitanga! Imbere y’abo banyamakuru, Kagame yavuze ko azagirira nabi Ingabire yaba arengana cyangwa atarengana, yagize ati:

“…Urubanza rwe, abanyamakuru, abadipolomate n’indorerezo babashije kurukurikirana, rwabaye mu mucyo. Yarafunzwe, hanyuma hashize imyaka ibiri ahawe imbabazi. Twamubabariye nk’uko twababariye abajenosideri benshi mu gihe cyashize, tukabarekura batarangije igihano cyabo twizeye ko batangira ubuzima bushya… Nta kabuza [abanyamahanga ]batekereza ko u Rwanda rukeneye kuyoborwa n’umuntu uri ku rwego rwe, umuntu w’intagondwa. Ntabwo nzi umwanzuro ubutabera buzafata, ntabwo nzi ikizabaho. Gusa ikintu kimwe ni uko azashyirwa mu mwanya umukwiriye, uko dosiye ye yaba iteye kose.

Iyi mvugo ya Kagame kuri ingabire yibutsa ijambo Bizimungu yigeze kuvuga kuri Musenyeri Misago, ubwo yavugaga ngo n’ubwo yaba umwere azajye gutura ahandi hatari mu Rwanda! None Kagame nawe ati uko dosiye ya Ingabire yaba iteye kose nzamugirira nabi! Ku kibazo cya Kizito Mihigo, Kagame yavuze ko ntacyo Kizito Mihigo yamuburanye ariko akaba yarahisemo kugirana ubushuti n’abamurwanya bityo bigatuma afata icyemezo cyo kumwica, ngo yarizize!! Kagame yagize ati:

…Nafashe umwanzuro wo kumufasha [Kizito Mihigo]. Twamwishyuriye amashuri mu Bubiligi no mu Bufaransa, nyuma aragaruka, nabwo guverinoma ikomeza kumufasha kubyaza umusaruro impano ye. Ku mpamvu ntazi, agirana imikoranire n’imitwe y’abagizi ba nabi kimwe na Ingabire. Kimwe na we [Ingabire], yarafashwe, araburanishwa, arafungwa, arababarirwa. Kimwe na Ingabire na none yongeye kubikora nyuma yo gufungurwa. Uzi icyakurikiyeho: Polisi yamufashe agerageza kwambuka umupaka ngo yinjire i Burundi mu buryo bunyuranyije n’amategeko. Ibi ni ibintu bifite gihamya, nta kindi. Ni amakosa ye.

Umwicanyi Kagame arangiza ikiganiro cye n’abo banyamakuru yibaza impamvu amahanga amwita umunyagitugu w’umwicanyi kandi yumva neza ko aba ari gukora neza;  akaba asanga amahanga amurenganya! Kagame yumvikanishije mu mvugo ye ko byanze bikunze azi neza ko azagezwa imbere y’ubutabera bwaba ubwa hano ku isi cyangwa ubwo mu ijuru (uretse ko ashobora no gucibwa urubanza nubwo yaba yarapfuye) maze akabazwa ibikorwa bye, kuri icyo kibazo cy’urubanza Kagame yagize ati: “Ku munsi w’urubanza, nizera ko nzabona amanota meza kurusha abaduciraho iteka bitwikiriye ubwisanzure. Naharaniye ubwisanzure n’uburenganzira bw’abaturage kurusha abo bose baduha amasomo. Gusa na none ntabwo turi intungane, usibye ko nta n’intungane ibaho.

Ku byaha bye, Kagame yigira umwere nk’intare yarye  inyamaswa zose, ikarya inka n’abashumba ariko igakatira igihano cy’urupfu indogobe yakoze icyaka cyo kurisha ku bwatsi bwo mu isambu ya Padiri bigatuma Imana irakara igateza igateza icyorezo cya muryamo mu nyamaswa zose, none ubugome bwa Kagame nabwo buri gukururira abanyarwanda ibyago bitagira ingano, Kagame akavuga ko ibyo byago biterwa n’abashaka ubwisanzure!

Imana ifashe abanyarwanda bazashobore kwigobotora ubutegetsi bw’umwicanyi Paul Kagame.

Veritasinfo

 

S’abonner
Notifier de
guest
0 Commentaires
Inline Feedbacks
View all comments