Rwanda: Paul Rusesabagina abereye Kagame na FPR nk’igufwa ryaheze mu muhogo!

Ishimutwa rya Rusesabagina ryasekuranyije imitwe ya Businge, Ruhunga na Murangira bituma bivamo.

Igikeri cyaguye mu kizenga kirimo amazi ashyushye maze acyotsa inda, gihita gihamagara ibindi bikeri, kirabibwira kiti : »muroge magari, amazi si yayandi! » Ku kibazo cya Rusesabagina naho, FPR iroge magari kuko amazi si yayandi! Ku italiki 31/08/2020, nibwo leta ya FPR-Inkotanyi yagaragaje Paul Rusesabagina imbere y’abanyamakuru i Kigali arimo amapingu! Umuvugizi w’umutwe w’abicanyi wa RIB,  Bwana Trirry Murangira yahise yivuga ibigwi! Yatangaje ko ishimutwa rya Rusesabagina ryagizwemo uruhare n’ibihugu byinshi, iryo shimuta rikaba rigomba guha isomo Abanyarwanda baba mu bihugu by’amahanga barwanya ingoma ngome ya FPR ;  Murangira yavuze ko iminsi yabo ibaze, ko nabo bazagemurirwa abicanyi b’Inkotanyi i Kigali bikozwe n’ubuyobozi bw’ibihugu babamo!

Nyuma y’iminsi mike, umwicanyi mukuru wa RIB Col. Jeannot Ruhunga yabeshyuje ibyatangajwe na Murangira, avuga ko nta gihugu cyabahaye ubufasha kugirango bashobore gushimuta Bwana Paul Rusesabagina, ko ahubwo ariwe wizanye mu Rwanda! Nyuma yo gutangaza iryo vuguruzanya, ubwo ihuzagurika mu kibazo cya Rusesabagina ryahise ritangira,  kugeza ubwo ministre w’ubutabera Johnston Busingye yemeje ko leta ya FPR ariyo yashimuse Paul Rusesabagina, bityo aba avuguruje Murangira na Ruhunga icyarimwe! Muri iki gihe isi yose  ikaba iri guha urwamenyo Paul Kagame na FPR bitewe n’uko ihurizo ry’ishimutwa rya Paul Rusesabagina ryababereye nk’ihurizo ryo kumenya icyabaje hagati y’igi n’inkoko!! Amakuru « veritasinfo » yakuye muri bamwe mubacurabwenge b’agatsiko ka FPR, yemeza ko ishimutwa rya Paul Rusesabagina nk’umuntu wari uzwi n’amahanga, ryari rigamije impamvu 3 z’ingenzi arizo izi zikurikira:

1.Gutesha agaciro Paul Rusesabagina wagizwe intwari yakijije Abatutsi muri génocide yo mu w’1994. Kagame na FPR babajwe cyane n’uko Rusesabagina yagizwe intwari kandi akabiherwa n’umudari; Kagame wiyita ko yahagaritse jenoside akaba ataragizwe intwari naba mpatsibihugu bamushyize k’ubutegetsi! Paul Rusesabagina akaba arushaho kubabaza cyane Inkotanyi bitewe n’uko yamenyekanye nk’intwari y’Umuhutu wakijije Abatutsi kandi Kagame na FPR bagenda bigisha ku isi yose ko Abahutu bose ari abicanyi (abajenosideri)!

2.Guca intege Abanyarwanda barwanya leta ya FPR. Kuva mu kwezi kwa gatatu umwaka 2020, Paul Kagame ntiyongeye kugaragara imbere y’Abanyarwanda kugeza ubu. Icyo akaba ari ikimenyetso gikomeye kigaragaza ko nta bushobozi Kagame agifite bwo kuyobora igihugu. Vincent Biruta niwe muri iki gihe wasimbuye Kagame, akaba ayoboye igihugu mu buryo bw’amayeri kuko ari Umututsi kandi itegeko nshinga ritamwemerera gufata uwo mwanya. Kubera icyo cyuho kiri mu buyobozi bukuru bw’igihugu, Inkotanyi zikanze ko abazungu bashobora kuzana Rusesabagina akaba ariwe uba umukuru w’igihugu! Kubera iyo mpamvu , Inkotanyi zakoze ibishoboka byose kugirango zishimute Rusesabagina; bityo abatavuga rumwe n’Inkotanyi bari hanze y’igihugu barusheho guhungabana no kugira ubwoba bwo kuvuga ko umukuru w’igihugu yabuze kandi n’amahanga akomeze kwemera ko Kagame agifite imbaraga zo kuyobora igihugu!

3.Kurangaza amahanga n’Abanyarwanda ku izimira rya Kagame! Ubutegetsi bw’Inkotanyi bwubakiye kukinyoma bubeshya ibihugu bikomeye, bityo ibyo bihugu bigakomeza kubutera inkunga ya politiki ndetse no gukingirwa ikibaba mu byaha byinshi  bukora byibasira uburenganzira bw’ikiremwa-muntu. Inkotanyi zikaba zifite ubwoba ko mu gihe byaba bigaragaye ko Kagame atagishoboye kuyobora igihugu, izo nkunga zose ndetse n’icyizere amahanga agirira Inkotanyi byahita bihagarara. Kugira ngo Inkotanyi zemeze amahanga ko ubutegetsi bwazo bugikomeye, zahisemo gushimuta Rusesabagina .  Icyo gikorwa kikaba kigamije kurangaza amahanga n’Abanyarwanda kugirango bahugirwe kuri Rusesabagina  bitume batabona icyuho kiri mu miyoborere y’igihugu kubera izimira rya Kagame!

Inkotanyi zatekerezaga ko urubanza rwa Rusesabagina ruzazorohera cyane, kuko zimufite mu maboko yazo kandi zikaba zari zarateguye impunzi zashimuse muri Congo zagombaga kumushinja ibyaha zamuhimbiye! Rusesabagina kandi nawe yijeje Inkotanyi ko ibyaha bamushinja byose azabyemera ntamananiza ndetse akanemera ko ariwe wizanye mu Rwanda! Ubwo ikinamico ry’urubanza rwa Rusesabagina n’abahoze ari ingabo za FLN ryatangiraga, Rusesabagina yavuze ko umuryango we wamushakiye abunganizi 7 b’abanyamahanga. Inkotanyi zanze ko abo bunganizi ba Rusesabagina bakandagiza ikirenge mu Rwanda kugirango batavumbura amanyanga yari muri urwo rubanza; bityo Inkotanyi ziba ziguye mu mutego wo guhindura urwo rubanza baringa!

Nyuma y’uko Inkotanyi zari zimaze gutesha agaciro inzitizi zose zatanzwe na Rusesabagina muri urwo rubanza, byabaye ngombwa ko Paul Rusesabagina nawe afata icyemezo cyo kwikura muri iryo kinamico ryo kuburana kuko yari amaze kubona ko nta butabera ashobora guhabwa n’Inkotanyi zamushimuse! Kwikura muri urwo rubanza kwa Rusesabagina byatunguye Inkotanyi cyane kuko imigambi yazo yose yo kwemeza amahanga ko ibyaha zishinja Rusesabagina yabyiyemereye ubwe yahise ihagarara, ziba zicyuye umunyu!  Inkotanyi zaciye urubanza rwa Rusesabagina ziri guhuzagurika kugirango zubahirize icyifuzo cya Kagame maze zikatira Paul Rusesabagina igihano cy’igifungo cy’imyaka 25 zirengagije ko zasezeranyije ba mpatsibihugu ko urwo rubanza ruzanyura mu mucyo kandi rukubahiriza amategeko mpuzamahanga!  Icyo gihano kikaba cyararakaje ibihugu bikomeye bisanzwe bishyigikira Inkotanyi mu mafuti yose zikora!

Ihurizo Inkotanyi zifite kuri uru rubanza rwa Paul Rusesabagina.

1.Igihugu cya « Leta zunze ubumwe z’Amerika (USA) » kimaze imyaka 27 gikingira ikibaba Kagame na PFR , cyateye utwatsi ibihano byahawe Rusesabagina, ahubwo gisaba ko arekurwa vuba na bwangu. Igihugu cy’Amerika (USA) kiramutse gifatiye ibihano Leta y’inkotanyi, ntabwo Leta ya Kagame yarenza amezi 6 itarahirima. Ese Inkotanyi zizakomeza kwinangira nka Farawo maze zikomeze gufunga Rusesabagina?

2.Abashingamateka b’ibihugu 27 bigize umuryango w’Ubumwe bw’Uburayi (UE), bafashe umwanzuro N° 2021/2906 RSP usaba Kagame na leta ya FPR kurekura Paul Rusesabagina ntayandi mananiza bashyizeho kandi batitaye ku byaha bamushinja. Abo banyamateka bageze n’aho bavugako Inkunga ibihugu bigize uwo muryango biha u Rwanda igomba kongera gusuzumwa neza, ndetse byaba ngombwa igahagarikwa mu gihe Paul Rusesabagina yakomeza gufungwa. Amakuru agera kuri « Veritasinfo » yemeza ko imishinga yose Umuryango w’Ubumwe bw’Uburayi ufite mu Rwanda yahagaze kugeza igihe ikibazo cya Rusesabagina kizakemurirwa Ese Kagame n’Inkotanyi bazakomeza kwinangira?

3.Kubera agasuzuguro n’ubwirasi leta y’Inkotanyi ikomeje kugaragariza bimwe mu bihugu biyitera inkunga, amakuru aturuka mu bayobozi bamwe b’umuryango w’Ubumwe bw’Uburayi (UE) barimo abahagarariye uwo muryango muri z’ambasade zinyuranye (les diplomates), batangiye gusaba ko Kagame na FPR bagomba gushyikirizwa inkiko bakisobanura ku byaha by’ubwicanyi bamaze imyaka 27 bakora harimo n’igikorwa cy’iterabwoba cyo guhanura indege yari itwaye perezida Juvénal Habyarimana na Cyprien Ntaryamira w’Uburundi!

4.Kuba Paul Rusesabagina ari umuturage w’igihugu cy’Ububiligi kubera ko aricyo gihugu afitiye ubwenegihugu ndetse akaba n’umuturage w’Amerika (USA) kuko aricyo gihugu umuryango we utuyemo, bituma ibyo bihugu byombi birebwa ku buryo bw’umwihariko n’ikibazo cya Rusesabagina. Ibyo bihugu bisanga gushinja Rusesabagina ibikorwa by’iterabwoba bisobanuye ko ibyo bihugu byombi bicumbikira ibyihebe,  kandi ahubwo leta zabyo ziri ku isonga mu bihugu birwanya iterabwoba ku isi!

Umwe mu bajyanama b’Inkotanyi mu by’amategeko Bwana Evode Uwizeyimana yasanze iki kibazo cya Rusesabagina gikomeye cyane kandi Inkotanyi zarakoze amakosa,  maze avuga ko leta ya FPR yibeshye, ko yagombaga kwica Rusesabagina nk’uko ibikora ku bandi  aho kumuburanisha! Iyi mvugo ya Evode ikaba igaragaza ko ikibazo cya Rusesabagina kitoroheye Inkotanyi na gato! Leta ya FPR ikaba  isigaranye amahitamo 2 gusa kuri iki kibazo cya Rusesabagina, kandi iyo ubirebye neza, usanga  ayo mahitamo yose agusha ku mpinduka y’ubutegetsi bw’Inkotanyi!

a)Amahitamo ya mbere ni ukurekura Paul Rusesabagina.

Ishimutwa rya Rusesabagina ryasekuranyije imitwe ya Businge, Ruhunga na Murangira bituma bivamo.

Kubera imiterere ya Kagame n’Inkotanyi muri rusange, kurekura Rusesabagina ntabwo bizaborohera.  Amahanga yose yamaze kumenya ko leta y’Inkotanyi itubahiriza uburenganzira bwa muntu, Rusesabagina aramutse arekuwe byaba ngombwa ko n’abandi banyarwanda Inkotanyi zifungiye ubusa nka :Yvonne Idamange, Aimable Karasira, Déo Mushayidi… nabo zigomba kubarekura. Inkotanyi ziyemeje kurekura Rusesabagina byaba ngombwa ko zifungura n’urubuga rwa politki mu Rwanda kandi ibyo biramutse bibaye , ubutegetsi inkotanyi zifite bwahita buzinyura mu myanya y’intoki! Ikindi giteye inkeke kuri iyi ngingo, ni uko uko Inkotanyi ziri gukomeza kwihagararaho, ari nako ziri kurushaho kurakaza ibihugu bikomeye birimo Amerika (USA) n’umuryango w’ibihugu by’Iburayi (UE) bikunze kuzikingira ikibaba, kuburyo zizajya kwisama zasandaye!

b) Amahitamo ya kabiri ni ayo gukomeza gufunga Paul Rusesabagina.  Mu gihe Kagame na FPR bazahitamo gukomeza gufunga Paul Rusesabagina, bazaba bahisemo guhangana n’umuryango mpuzamahanga kimwe n’ibihugu by’ibihangange bimaze igihe kirekire bikingira ikibaba Inkotanyi ku bwicanyi zakoze kandi zikomeje gukorera Abanyarwanda ndetse n’abaturage b’akarere k’ibiyaga bigari. Mu gihe amahanga azakura amaboko ku butegetsi bw’igitugu cy’Inkotanyi bishobora gutanga icyuho gikomeye kubanyepolitiki bari hanze y’igihugu barwanya ingoma ya FPR. Guhangana n’amahanga bishobora gukururira Kagame na FPR ibihano bikakaye mu rwego rw’ubukungu, ububanyi n’amahanga ndetse n’ubutabera. Imiryango mpuzamahanga irengera uburenganzira bwa muntu nk’ Amnisty International na HRW bishobora kuboneraho urwaho rwo kugeza Kagame na FPR mu nkiko cyane ko n’ikibazo cy’urupfu rwa Kizito Mihigo rutaribagirana (Iyi nzira ya Kabiri niyo Kagame yahisemo, umva amajwi hasi)!

Abacurabwenge ba FPR nibo bagomba gushaka inzira bazanyuramo kugirango bashobore kwikura mu kibazo cya Rusesabagina! Mu byukuri Rusesabagina arababaye, ariko akababaro ke gashobora guturukamo umuti wo gukiza Abanyarwanda benshi ubutegetsi bw’abicanyi b’Inkotanyi. Buri wese ashobora kwikorera isesengura rye, ariko twe dusanga Rusesabagina yarabereye Inkotanyi nk’igufa ryaheze mu muhogo, zikaba zarananiwe kurimira cyangwa ngo ziricire.

Icyo twakwifuriza Abanyarwanda ni ugukomeza kunga ubumwe kuko ariyo ntwaro ikomeye cyane izatuma bagera kuburenganzira bwabo busesuye!

Veritasinfo.

10 Comments

  1. Biragaragara ko wowe kagibwami uri umukozi w,inkotanyi z,angaje ngo uje uzirwanira kuri enterinete nyamara uribesha kuko ntamunyarwanda utari kugerwaho n,akarengane k,inkotanyi haba gushimutwa ,kwicwa,gusenyerwa ,kurandurirwa imyaka ,gucunagurizwa mituweri…murimake ninde utazishima nibirukana inkotanyi mu rwanda?

  2. Kalisa,ko uvuga imusoro y’abanyarwanda,uwawe waba urimo,igihe cyose muzumva mu mitekerereze yanyu harimo urwango ntaho bizabageza, imbunda ibataye kuwamazi mukubitiwe ahereba inzega none mwahisemo gusebya igihugu nandi mahanga ashima. Mbese ra, ko narubagamo,mwe nibihe mwari mwaragezeho?

  3. Kajyibwami arandangije.Aho mu kinigi abatutsi mwatemye mwabavanye he ko ntabahaba? ugiye kumera nka babandi bafite imirambo 1.600.000 mu nzibutso! babakuye he ? Naho za ambassades zikoresha imisoro yábanyarwanda, ambassade muri SA, muri Zimbabwe, muri Zambiya, muri Mozambique, muri Angola,ayo mafaranga aturuka he? ariko societe TOTAL ishobora kuba ibagoboka namwe mukohereza abana bú Rwanda kujya gupfira ibindi bihugu.Harya buriya ingirwa badepite baba babishyizeho umukono ?mukomeze mwinywere amata shenge,mwari mwarabaye ingalisi.

  4. Au regard des dires de Kagame relativement à l’Affaire Rusesabagina, celui-ci lance un défi à ses maîtres. Autrement dit, un obligé lance un défi à ses maîtres. Se pose alors la question de savoir si le Président Américain, le Premier Ministre Britannique, le Président Français, le Premier Ministre Belge, la Chancelière allemande, le Premier Ministre Canadien, protecteurs notoires de Kagame vont-ils relever le défi lancé par leur obligé.
    L’Union Européenne a adopté une résolution à caractère obligatoire pour les Etats membres sur le cas Rusesabagina. Il a demandé à Kagame de libérer immédiatement ce dernier. Il s’agit d’une sommation. Il a enjoint la Commission Européenne d’exécuter la décision. C’est-à-dire exécuter les mesures précisées dans sa résolution.
    Cette résolution est, apparemment, un signal fort contre de Kagame. Pour celui-ci, cette résolution est un vulgaire papier auquel il ne peut accorder une quelconque valeur.
    Question: Dès lors que la résolution de l’UE a un caractère obligatoire et exécutoire, celle-ci (UE) va-t-elle sanctionner Kagame et ses obligés directement impliqués dans le kidnapping de Rusesabagina et son refus d’exécuter les mesures adoptées?
    Le ton de certaines autorités belges est trop pauvre de sorte que les Rwandais qui ont écouté leurs déclarations peuvent raisonnablement penser que leur pays a deux catégories de citoyens, les véritables Belges d’un côté et les sous-Belges c’est-à-dire les naturalisés d’autre part. Autrement dit, la naturalisation ne confère pas les mêmes droits aux naturalisés que ceux de véritables Belges ou les Belges historiques sont les seuls bénéficiaires de plein droit des droits et obligations envers le Belgique. Les naturalisés belges, eux, ont seulement les obligations envers la Belgique. Leurs droits envers la Belgique, leur pays, sont à géométrie variable.
    Attendons pour voir si les naturalisés belges sont véritables Belges et que par conséquent, ils ont les mêmes droits et obligations que ceux des Belges historiques.
    Aussi, concernant le Rwanda dirigé par Kagame, pour les autorités Belges, seuls les naturalisés Belges d’origine rwandaise ont-ils des droits et obligations sui generis ou spécifiques?
    D’emblée, la France n’exécutera pas la résolution du Parlement Européen. Tel est la dire d’un dignitaire du régime sur cette résolution. Macron a, semble-t-il, rassuré son ami. Il en est de même de la Chancelière allemande et du Premier Ministre britannique dont le pays n’est plus membre de l’UE et conséquemment, n’est pas soumis à cette résolution ou toute autre mesure adoptée par l’Union Européenne.

  5. Kajyibwami unkuyemo pee! Ngo muri kwinywera amata!!!None se impuruza n’imiborogo abavandimwe bacu bari mu Rwanda batugezaho ko inzara ibamaze ni ukubeshya? None se abo bahutu babashutse bakabata mu mashyamba nibo bari no kunyereza Abanyarwanda bari imbere mu gihugu? Abo bahutu se nibo bari gutwikisha amashanyarazi abagore mu myanya y’ibanga? Icyakora ingoma ngome ya FPR izasiga umugani mu Rwanda peee!! Mwe yahaye amata mukomeze mwinywere ntimuzahe abo bahutu babashutse mugatema abatutsi ngo murarwanya Inkotanyi!!! Ni gute umuntu mukuru bamushuka akica umuntu koko?

  6. Nonese Kalisa,kugira Ambassades nyinshi ni ikibazo cg kubera igihugu cyagura amarembo murashira. Reka nkubwire, mwaradushutse twirara mu bavandimwe urwanda rutemba imibirogo, muduta mu mashyamba mwurira indege mujya za burayi nta nuwagarutse kureba uwo mwasize mu nkambi,none turatahutse igihugu kiduhaye byose,abana banywa amata iwacu ntawayanyweye, turireze dusabye imbabazi turazihabwa,ababyeyi bacu barubakiwe uzaze hano mu kinigi urebe. None muracyakomeje inyigisho zanyu zo gusenya,burya sibuno abanyarwanda ryaciye akenge. Mushakishe indi mirimo mureke ayo mateshwa.

  7. Politiki yínkotanyi yo kubeshya,kwiyemera,guhuguza,kwiharira imitungo yose yígihugu, muri macye Apartheid mu Rwanda igihe cyayo cyararangiye.Ibinyujije muri Crystal ventures imitungo yígihugu barayimaze, bageze náho bajya gushora imali muri Congo basize Rwanda,Nta misoro bajya bishyura,bafite za ambassades uruhuri bajya kuzinganya na USA.Ntibizoroha!!!

Poster un Commentaire

Votre adresse de messagerie ne sera pas publiée.