Rwanda : Sobanukirwa ubugome bukabije inkotanyi zakoresheje mu kwica impunzi zari mu nkambi i Kibeho taliki ya 22 Mata 1995.

Ubwicanyi bw'Inkotanyi i Kibeho ntibwatoranyaga abana n'abagore!

[Ndlr: Kimwe mu bibazo bikomeye cyane Kagame na FPR bafite ni “Ukwibuka urupfu bishe kandi bakomeje kwica abanyarwanda” bo mu moko yose. Icyo kibazo gikomereye Inkotanyi nanicyo gituma zikomeza gukora amahano y’ubwicanyi kuko zitekereza ko zishobora kuzica abantu bose bazi amahano zakoze kandi zikomeje gukora! Zirarushywa n’ubusa nta muntu ushobora kwica abantu bose ngo abamare! Nubwo bimeze gutyo ariko, inkotanyi zakomeje kwifashisha iterabwoba nk’agapfukamunwa ko gucecekesha abanyarwanda ngo batavuga amahano yazo ariko nabyo ntibyakunze! Kibeho yonyine icira inkotanyi urubanza naho urupfu rwa Kizito Mihigo rukazihozaho “Ikidodo”! Twihanganishije abanyarwanda babuze ababo mu bwicanyi inkoramaraso z’inkotanyi zakoreye i Kibeho tukaba tubatuye iyi ndirimbo ya Mutagatifu Kizito Mihigo  yise “Hataka Nyirubukorewemo”; turashimira kandi uyu munyarwanda waduhaye ubuhamya bugaragaza neza uko ba Rukarabankaba b’inkotanyi bishe impunzi zari mu nkambi y’i Kibeho].

Ubuhamya bw’uwarokotse ubwicanyi bwakozwe n’inkotanyi i Kibeho taliki ya 22/04/1995!

I Kibeho, ku italiki nk’iyi ya 22 Mata 1995, mu gitondo, buri wese yabyutse muri Burende ye (akazu gato kubatswe na shitingi) maze mbona mu nkambi abantu bose bacitse intege, nta muntu n’umwe unyeganyega nk’uko byari bisanzwe; maze nkebutse hakurya ku gasozi kitwa “Kuwarurayi“,  mbona Kimaranzara (izina twitaga amakamyo yatugemuriraga ibiribwa)  baziparitse mu ikoni rihari, maze turashoberwa (dore ko uwo munsi Komini yacu ya Mbazi yari bufate ibyo kurya).

Bahereye (inkotanyi) muri komini Nshiri bahuka mu baturage barakubita, barabahinda babahuza n’abari mu nkambi ya Munini, maze bose barabahinda babahuza n’abari mu nkambi ya Ndago, barakomeza barabahinda hamwe n’abaturage bari batuye muri utwo duce no mu nkengero zatwo, bose barabazana baduhuriza hamwe ku kibuga cy’urwunge rw’amashuri ya Kibeho; nibutseko n’abaturage bo mu Bisibyahuye nabo babahinze bakabahuza n’abari mu nkambi ya Rwamiko, bose babazana i Kibeho. Twari duhagaze twegeranye umubiri ku mubiri, maze muma saa sita hatambuka indege ya kajugujugu y’umweru yanditseho UN, maze twese turangamira ikirere dukoma mumashyi menshi tugirango ni indege ije kudutabara.

Iyo kajugujugu yajugunye udupapuro hasi maze turadusama, hari handitseho ngo “ushaka gutaha, atahe iwabo n’amaharo“. I yo kajugujugu igitambuka twahise tunyagirwa n’urubura rwa masasu atagira ingano hafi nk’amasaha 2 inkotanyi ziturasaho, imirambo yari myinshi n’imivo y’amaraso iri gutemba. Nyuma y’ayo masaha agera kuri abiri turaswa, mbona abantu barokotse, bamwe batoye umurongo hafi y’ikigo cya MINUAR batangira gusakwa ngo batahe. Abari bahari bibuka inzu yariri mu mahuriro y’ imihanda mu ikoni riza i Kibeho, irindi rigana indago ngo iyo nzo yari iy’umukonsiye, muziko ariyo yari yarahindutse ibagiro bapangamo abo bishe batoranyijwe murabo bemeye gutaha kandi abo ntibabazwe.

Abasilikare bakomoka mu gihugu cya Australia bari muri MUNIAR i Kibeho bagerageje gukiza abantu bacye babahungiyeho.

Namaze mu nkambi iminsi igera ku 10 nyuma y’aho bayisenyeye, byose narabibonye n’amaso yanjye kugera k’umunota wanyuma. Uko navuyemo nabyo ni ubundi buhamya. Ni imyiteguro yo gusenya inkambi twarayibonye, bacukura ibyobo ariko ntitwamenya impamvu yabyo tutazi ko aribyo bashaka kuzadushyiramo. Nsubiye inyuma gato nakongeraho ko bigeze nko k’umunsi wa 4 inkambi ishenywe, batuzanyemo abasore b’inkorokoro, baza bitwaje imihoro, ariko impunzi zarokotse  zirabivumbura maze uwo munsi hagwa imvura nyinshi cyane abantu bitwikira amashitingi, tukakajya tubwirana (impunzi) ko nta mpunzi igomba gufata umuhoro kugirango tumenye kwitandukanya n’abo bishi bari batujemo ko ahubwo tugomba kwirwanaho dukoresheje imyase y’inkwi  yari mu nkambi.

Nyuma bamwe baje kutwihishamo bafite imipanga, twagiye kubona tukajya tubona umuntu arasimbutse n’umupanga ashaka gutema umuntu, ubwo impunzi zikaba zamubonye zikamukubita imyase zikamutsinda ho. Iryo joro abantu bari bameze nk’abatewe n’amashitani kuko baraye basakuza cyane maze mu gitondo cya kare bamwe mubo bari batuzanyemo barokotse imyase yimpunzi basimbukira mu gace karimo abasirikari b’inkotanyi biruka babasanga. Uwo munsi habaye ibintu bidasanzwe kuko noneho abasirikare baratwegereye baturasa neza batwegereye kabisa! Hari imbunda yari imeze nk’uruhombo rw’amazi yariri hafi y’imisarane  munsi y’amashuri; iyo mbunda yaratwumvishije, iyindi  mbunda nini cyane yari iteretse ku gasozi kitwa  “Sinayi”kari haruguru y’ikigo cya Miniwari (MINUAR), iyo nayo yakubitaga ibibombe biremereye mu mpunzi maze ukabona ibintu bivanze n’ibice by’abantu mu kirere biguruka. Yewe urwo twabonye si urwo kubarwa.

Imana ihe iruhuko ridashira izo nzirakarengane zahatikiriye.

Subscribe
Notify of
guest
0 Comments
Inline Feedbacks
View all comments