Rwanda-UE: Aho FPR na Kagame bambariye inkindi, batangiye kuhambarira incocero!

Gucuruza jenoside byazamuye Paul Kagame bimugeza mu nama y'ibihugu 7 bikize ku isi! Aha yari mu nama ya G7 i Paris mu Bufaransa mu 2019

Byavuzwe kenshi ko leta ya FPR-Kagame icuruza jenoside y’Abanyarwanda yise iy’Abatutsi, ikanayikoresha nk’intwaro kirimbuzi yo gucecekesha abayinenga; agatsiko ka FPR-Kagame ko kakaba kavuga ko abavuga ibyo baba bapfobya jenoside! Igitangaje ni uko kuri uyu wa kane taliki ya 11/02/2021, inteko ishingamategeko y’ubumwe bw’Uburayi  yari isanzwe izwiho kurata ibigwi bya Kagame, nayo agatsiko ka FPR-Kagame kavuze « ipfobya jenoside » bitewe ni uko yatinyutse kunenga ubutegetsi bw’agatsiko ka Kagame! Niba ibihugu by’Iburayi n’Amerika (USA) bisanzwe bizwi ko aribyo agatsiko ka FPR-Kagame gacuruzaho jenoside,  nabyo bishyizwe ku rutonde rw’abayipfobya, agatsiko ka FPR kazakura he irindi soko kajya gucuruzamo iyo jenoside? Ese aho iyahigaga ntiyaba yarahiye ijanja abantu ntibarabukwe? Kagame n’inkotanyi bavugwaga ibigwi n’Amerika (USA) n’Uburayi ko ari intwari zahagaritse jenoside, ubu noneho nibo ibyo bihugu biri kwita abicanyi n’ibyihebe bikomeje kurimbura imbaga mu karere k’ibiyaga bigari!

Igihe ministre w’ubutabera wa leta y’agatsiko Bwana Busingye yari imbere y’akanama ka Loni gashinzwe uburenganzira bw’ikiremwamuntu, yifatiye ku gahanga ibihugu byavuzeko u Rwanda rutubahiriza uburenganzira bw’ikiremwamuntu, abagize ako kanama bahise bafata umwanzuro w’uko hagomba gukorwa iperereza ku Rwanda kugirango hasuzumwe niba ibyo Ministre Busingye avuga ari ukuri. Busingye abonye ko icyemezo cyo kohereza abagenzuzi mu Rwanda kigiye gufatwa yahise ahindura imvugo yemera ko mu Rwanda ibintu byacitse, ko ikiremwamuntu kibangamiwe cyane ! Ku myanzuro 50 yerekeranye n’iyubahirizwa ry’uburenganzira bwa muntu leta y’agatsiko ka FPR  yari yahawe n’ako kanama mu mwaka w’2017 yagombaga gushyira mu bikorwa, basanze nta mwanzuro n’umwe iyo leta yubahirije ahubwo  basanga yarasubiye inyuma cyane bituma ako kanama kayiha noneho imyanzuro 168 igomba gushyira mu bikorwa!

Ibi bikaba byerekana uburyo leta y’agatsiko ka FPR igenda irushaho gusubira inyuma no kongera ibikorwa by’ubugizi bwa nabi uko imyaka igenda yiyongera! Aba badepite ba leta y’agatsiko ka Kagame nabo batangiye gutera hejuru abadepite b’inteko ishingamategeko y’ibihugu by’Uburayi, bayishinja ibinyoma no gupfobya jenoside; ntimuzatangare nimubona mu minsi iri imbere, abadepite ba leta y’agatsiko bavuze ko ibyo inteko ishingamategeko y’Uburayi yavuze babyemeye, kugirango mu Rwanda hatoherezwa impuguke zo gukora iperereza ku marorerwa y’ubwicanyi inkotanyi zikora buri munsi kimwe n’uko ako gatsiko gashobora kwisubiraho bitewe n’uko kaba kagiye gufatirwa ibihano! Niba ari abagabo, twizereko batazahindura imvugo nka Busingye!

Paul Kagame yakirwa muri Canada aho yari yitabiriye inama y’ibihugu 7 bikize ku isi (G7) mu mwaka w’2018

Nkuko bitangazwa n’urubuga rwa« BBC Gahuza », inteko ishingamategeko y’u Rwanda ivuga ko yamaganye icyemezo cy’inteko ishingamategeko y’Ubumwe bw’Uburayi (EU/UE) kijyanye na Paul Rusesabagina ; abadepite b’u Rwanda bakaba bemeza ko icyemezo cy’inteko ishingamategeko y’Uburayi « cyuzuyemo ibinyoma no kwirengagiza nkana ukuri« . Mu nama rusange yabaye ku mugoroba wo ku wa gatanu hifashishijwe ikoranabuhanga, abadepite b’u Rwanda banavuze ko ibyemejwe n’abadepite ba EU birimo « kwinjira mu budahangarwa bw’igihugu no mu nzego z’ubutegetsi bwa Leta y’u Rwanda, guhakana no gupfobya Jenoside yakorewe Abatutsi mu 1994« . Inteko y’u Rwanda umutwe wa sena na wo wamaganye umwanzuro w’inteko ya EU kuri Rusesabagina, wiyemeza ko inteko izasuzuma icyo « kibazo ikageza imyanzuro ku Nteko y’Ubumwe bw’i Burayi« .

Kubyerekeranye n’imyanzuro yafashwe n’inkeko y’Uburayi ku kibazo cya Paul Rusesabagina, Umwanzuro w’Intumwa za rubanda mu nteko ishingamategeko y’Uburayi ugira uti : « Inteko nshingamategeko y’Umuryango w’Ubumwe bw’Uburayi iramagana ifatwa n’ifungwa rya Paul Rusesabagina, kuko ridakurikije amategeko« . Mu mwanzuro wayo yashyize ahagaragara kuwa kane w’iki cyumweru, iyo nteko yasabye ko Rusesabagina yahita arekurwa. Uwo mwanzuro w’abadepite bagize inteko nshingamategeko y’Ubumwe bw’Uburayi ukubiye mu ngingo zigera ku 10, hagendewe kuri raporo z’imiryango mpuzamahanga ku Rwanda, uwo mwanzuro ukaba utangira ugaragaza uburyo mu Rwanda uburenganzira bwa muntu butubahirizwa.

Muri raporo n’ibyegeranyo byagendeweho harimo iy’umuryango mpuzamahanga uharanira uburenganzira bwa muntu, nka Human Right Watch itunga agatoki ishyaka riri ku butegetsi rya FPR-Inkotanyi ku kuba ritoteza abo rifata nk’abanenga Guverinoma y’u Rwanda. Ibyo bigashingirwa k’uburyo abanyepolitiki bakomeye bari mu banenga ubutegetsi, ndetse n’abanyamakuru batabwa muri yombi cyangwa se baterwa ubwoba, haba imbere mu gihugu no hanze yacyo. Mu zindi raporo kandi zigarukwaho n’aba badepite b’Ubumwe bw’Uburayi, harimo iy’ikigo cya « Freedom House« , (cyo muri Amerika) igaragaza ko kuva muw’2014 kugeza ubu, ubutegetsi bw’u Rwanda bumaze kwibasira abatavuga rumwe nabwo bari mu bihugu by’amahanga bigera kuri 7.

Uko kwibasira abatavuga rumwe na leta ya Kigali iyo raporo ivuga ko gukoranwa amayeri menshi, arimo: kubagenza binyuze mu bikorwa by’ubutasi bwifashishije murandasi cyangwa se interneti. Harimo kandi kwibasira no gutera ubwoba abagize imiryango yabo iri imbere mu gihugu, kubakorera iyicarubozo hagamijwe kubakuramo amakuru, yewe no ku bica. Abo badepite b’Ubumwe bw’Uburayi bagize bati:

Dushingiye ku kuba Rusesabagina ubwo yari umuyobozi wa Hotel Des Milles Collines i Kigali mu gihe cya Jenoside mu 1994 yararokoye abagera ku 1268 mu batutsi n’abahutu batari bashyigikiye ubwicanyi bahigwaga ngo bicwe, akaza no kubiherwa igihembo n’uwari Perezida w’Amerika, George W. Bush; dushingiye kandi ku kuba nyuma yo kugerageza kumwica mu w’1996 yarahunze akaza guhabwa ubuhunzi n’igihugu cy’Ububiligi mbere y’uko ahabwa ubwenegihugu bwabwo bimugira umuturage w’Umuryango w’Ubumwe bw’Uburayi, ndetse no kuba ari umuturage wemewe wa Leta Zunze ubumwe z’Amerika;

Dushingiye kandi ku buryo we ubwe yivugiye ko ingendo ze zose zagenzurwaga n’abakorera ubutegetsi bw’u Rwanda, ndetse n’uko leta y’u Rwanda yamuteye ubwoba nyuma yo kunenga uburyo bw’imitegekere bw’igitugu bwa Perezida Kagame; Tugendeye no ku buryo ku itariki ya 27 y’ukwezi kwa 8 muw’2020, Paul Rusesabagina yavanywe i Dubai akajyanwa i Kigali ku gahato mu buryo butazwi akaza kugaragazwa ku biro by’urwego rushinzwe ubugenzacyaha kuwa 31 y’uko kwezi, nyamara mu gihe uburyo bwo gufata no kohereza mu kindi gihugu ukurikiranyweho icyaha bugomba gukorwa binyuze mu nzira zabugenewe kandi bigakorerwa mu rukiko rudafite aho rubogamiye;

Dushingiye ku kuba Rusesabagina ubu afungiye mu Rwanda akurikiranyweho ibyaha bifitanye isano n’iterabwoba, akaba yarimwe uburenganzira ku bwunganizi yihitiyemo, ndetse inyandiko zose zimufasha gutegura urubanza zikaba zarafatiriwe ku itariki ya 23 y’ukwa 12 muw’2020 bikozwe n’umuyobozi wa Gereza ya Mageragere; Dushingiye ku kuba umuryango we uhangayikishijwe n’ubuzima bwe butameze neza kuko yigeze kurwara kanseri kandi akaba afite ubundi burwayi bumusaba gufata imiti yabugenewe, nyamara imiti umuryango wamwoherereje binyuze muri ambasade y’Ububiligi ikaba itaramugejejweho, ahubwo akaba ahabwa imiti yandikiwe n’umuganga w’umunyarwanda atazi ibiyikubiyemo; Dushingiye kandi ku kuba umukobwa wa Rusesabagina n’izindi nshuti ze bahozwa ku nkeke n’umuntu wiyita umucungagereza w’aho se afungiye, ubasaba gutanga amafaranga kugira ngo amutorokeshe;

Uwo mwanzuro ugira uti:

Icya mbere,Turamagana twivuye inyuma ishimutwa, ibazwa n’ifungwa ridakurikije amategeko bya Rusesabagina, ndetse tugasaba ko ahita arekurwa.

Icya kabiri, Inteko nshingamategeko y’Ubumwe bw’Uburayi irahamagarira ubutegetsi bw’u Rwanda kugaragaza ubushake mu iperereza ryigenga kandi riciye mu mucyo mu kugaragaza uburyo Paul Rusesabagina yafashwemo n’uko yagejejwe i Kigali.

Icya gatatu, Inteko kandi irahamagarira abategetsi b’u Rwanda guha Rusesabagina uburenganzira bwo kuburanira mu ruhame iburanishwa rigakorerwa mu rukiko rubifitiye ububasha, rwigenga, rutabogamye kandi rwubahiriza amahame mpuzamahanga y’uburenganzira bwa muntu.

Icya kane, inteko nshingamategeko y’ubumwe bw’uburayi itewe impungenge n’ubuzima bwa Paul Rusesabagina. Ikaba ihagamagarira leta y‘u Rwanda gukora ibishoboka akabona ubuvuzi buboneye. Kumureka agafata imiti yari asanzwe ahabwa; ndetse leta ikanareka ubuzima bwe bugakurikiranwa n’umuganga uri mu Bubiligi, nk’uko byasabwe na Minisitiri w’Ububanyi n’amahanga w’Ububiligi ku itariki ya 4 y’uku kwezi kwa 2.

Mu zindi ngingo zigera kuri esheshatu z’uyu mushinga w’umwanzuro, izi ntumwa za Rubanda zihuriye mu bihugu bw’umuryango w’Ubumwe bw’i Burayi ziributsamo ko ubutegetsi bw’u Rwanda bwananiwe gukora amaperereza yigenga ku rupfu rutavugwaho rumwe rw’umuhanzi Kizito Mihigo waguye mu kasho ya polisi mu ntangiriro za 2020. Zigasaba ubutegetsi bw’u Rwanda gukora amaperereza atabogamye ku birego byerekeye imfu z’abakekwaho ibyaha bicwa batagejejwe mu butabera, izibera mu zindi za kasho, ndetse n’ishimutwa, ababikurikiranweho bakagezwa mu butabera.

Zikanasaba leta y’u Rwanda kwemeza amasezerano mpuzamahanga yo kurwanya ishimutwa ry’abantu cyo kimwe n’amasezerano ya Roma kugira ngo rube umunyamuryango w’urukiko mpuzamahanga mpanabyaha, cyo kimwe no kwemerera akanama ka LONI gashinzwe kurwanya iyicarubozo n’ibindi byaha bitesha agaciro ikiremwa muntu gusubukura uruzinduko rwako mu Rwanda. Mu mwanzuro bemeje, aba badepite kandi barasaba Umuryango w’Ubumwe bw’Uburayi kugira icyo ukoze mu maguru mashya mu kugenzura niba inzira ziteganywa n’amategeko zarubahirijwe mu itabwa muri yombi rya Rusesabagina, ndetse no kugenzura ko uburenganzira bwe bwubahirizwa mu nzego zose nk’umuturage w’uyu muryango.

Bagasoza basaba Prezida w’iyi nteko kugeza iyi myanzuro yose ku nama nkuru ndetse na Komisiyo y’Ubumwe bw’Uburayi, cyo kimwe no ku bashinzwe ububanyi n’amahanga muri uyu muryango, abanyamuryango bose bawo, Umunyamabanga mukuru wa LONI, inzego zirimo umuryango w’Ubumwe bw’Afurika, uw’ibihugu byo mu burasirazuba bw’Afurika, abunganizi ba Paul Rusesabagina ndetse na Perezida w’u Rwanda.

Source: europarl.europa.eu

1 Comment

  1. abantu murwanya u Rwanda twabwenge mufise ivyo ngo EU iragiriza u Rwanda!!!!
    ntagihugu kiriko gitera imbere batavuga ngo nta droit de l’homme
    en Chine, cuba, Russie, SA, … none mwebwe ntasoni
    hora yarabanyaye Kagame !ivya wawundi mu Burundi haaaaaa

Poster un Commentaire

Votre adresse de messagerie ne sera pas publiée.