Rwanda: USA yagemuriye Madame Munyenyezi Béatrice urupfu rw’abicanyi ba FPR-Inkotanyi!!

Ku mugoroba wo kuri uyu wa gatanu taliki ya 16/04/2021 nibwo igihugu cy’igihangange ku Isi cya leta zunze ubumwe z’Amerika (USA) cyagemuriye Madame Munyenyezi Béatrice abicanyi ba FPR Inkotanyi; icyo gihugu kikaba cyabikoze  kibizi neza kandi kibishaka ko kimugemuriye urupfu! Iki gikorwa cyo gushyira mu maboko y’abicanyi b’inkotanyi Madame Munyenyezi Béatrice gikozwe n’igihugu nka leta zunze ubumwe z’Amerika (USA) giteye urujijo mu Banyarwanda benshi bari bazi ko iki gihugu cyubahiriza uburenzira bw’ikiremwa-muntu mu rwego rwo hejuru! Ibi bikaba byerekana ko inkunga icyo gihugu gikomeje guha abicanyi ba FPR Inkotanyi itigeze isubira inyuma!

Madame Munyenyezi Béatrice yagejejwe i Kigali agemuwe n’abakozi 2 bo mu rwego rushinzwe abinjira n’abasohoka bo mu gihugu cya leta Zunze ubumwe z’Amerika bahise bamushyikikiriza abicanyi bo muri RIB ku kibuga cy’indege cya Kanombe, maze abo bicanyi ba RIB bahita bamushyiramo amapingu  maze bajya ku mufungira i Remera mu kasho Kizito Mihigo yiciwemo. Madame Munyenyezi Béatrice agemuriwe inkotanyi nyuma y’imyaka 10 y’igifungo yari arangije muri USA aho yahamwe n’icyaha cyo kubeshya kugirango abone ubwenegihugu bw’Amerika.

Mu mwaka w’1994, Madame Munyenyezi Béatrice yari umunyeshuri muri kaminuza y’u Rwanda i Butare ariko abicanyi b’inkotanyi bakaba bamushinja icyaha cyo gutegura umugambi wo gutegura jenoside, ibyo bakabishingira kukuba yarashakanye n’Arsène Shalom Ntahobari wakatiwe icyaha cyo gufungwa burungu n’urukiko mpuzamahanga mpanabyaha rw’Arusha (TPIR) ku cyaha cyo kugira uruhare muri jenoside yabaye mu Rwanda. Uyu Shalom Ntahobari akaba ari umuhungu wa Pauline Nyiramasuhuko wabaye ministre muri leta ya Habyarimana nawe wakatiwe n’urwo rukiko.

Mu mwaka w’1994 ubwo Inkotanyi zabohozaga igihugu, Madame Munyenyezi Béatrice ubu ufite imyaka 51 yahungiye mu gihugu cya Leta zunze Ubumwe z’Amerika. Bitewe n’uko yari ahunze urupfu rw’inkotanyi kandi azi neza ko umuryango we wahigwaga n’inkotanyi;  byabaye ngombwa ko abeshya inzego z’abinjira n’abasohoka muri Amerika kugirango ashobora guhabwa ubwenegihugu bwayo, nyuma icyo kinyoma kikaba cyaramuviriyemo gufungwa imyaka 10 no kwamburwa ubwenegihugu yari amaze guhabwa.

Hashize ukwezi igihugu cya USA gikoze raporo y’amapaji 38 akubiyemo ibikorwa bibi cyane bihungabanya uburenganzira bwa muntu bikorwa n’abicanyi bale ta ya Kigali, igihugu cya USA nicyo kivuga ko Bwana Paul Rusesabagina yashimuswe na Leta ya Paul Kagame.  igitangaje ni ukubona igihugu cy’igihangange cy’Amerika (USA) gifata Madame Béatrice Munyenyezi cyari kimaze gufunga imyaka 10 kikamugemurira abicanyi b’inkotanyi kugirango yicwe kandi kizi neza ko nta kindi kimutegereje uretse kwicwa urubozo! Ese nyuma y’ibi,  amasomo ya demokarasi, kurengera uburenganzira bwa muntu … atangwa n’Amerika (USA), Abanyarwanda bashobora kuyaha agaciro?

Buri wese agomba kwibaza kandi akisubiza kuri iki kibazo , gusa icyo twabwirwa Abanyarwanda bari imbere mu gihugu ni uko batagomba kwizera na gato ko imbaraga zizabacungura zizava hanze , bo ubwabo nibo bagomba kwibyaramo imbaraga bakigobotora abicanyi b’inkotanyi babagose naho ibihugu by’amahanga byarabatanze bibagurana amabuye y’agaciro ya Congo.  Abo bicanyi n’ibisambo b’inkotanyi nta wundi uzabakura mu nzira uretse Abanyarwanda bose bagomba guhagurukira rimwe bagasezerera abo bicanyi, ntabwo Amerika izabatabara

Twihanganishije umuryango wa Madame Munyenyezi Béatrice.

Veritasinfo

Veritas

One Comment

  1. Le Rwanda a été cédé aux USA. Les Rwandais sont étrangers dans le pays de leurs ancêtres. Il n’y a rien d’étonnant que cette Rwandaise, Madame Munyenyezi Béatrice soit exépédiée aux employés des USA, gestionnaires de leur propriété.

Leave a Reply