Rwanda:«Nta gaciro naha imvugo ya Biruta,Kagame ntambaraga afite zo guhangana n’Amerika, azarekura Rusesabagina» (Faustin Twagiramungu)

Kuwa kane taliki ya 11/08/2022, umunyamabanga wa Leta ushinzwe ububanyi n’Amahanga w’Amerika Bwana Antony Blinken yasoje uruzinduko yakoreye mu Rwanda. Muri urwo ruzinduko Blinken yaganiriye n’abayobozi b’u Rwanda ibyerekeranye n’ikibazo cy’umutwe wa M23 uterwa inkunga n’u Rwanda ukaba ukomeje guteza umutekano mucye mu burasirazuba bwa Congo. Antony Blinken kandi yavuze ku kibazo cya demokarasi n’uburenganzira bwa muntu bitubahirizwa mu Rwanda, akaba yarasigiye umukoro Paul Kagame wo gutekereza ku cyemezo agomba gufata cyo kurekura Paul Rusesabagina amazi atararenga inkombe!

Kuri uwo munsi, mu kiganiro yagiranye n’abanyamakuru, Bwana Antony Blinken yavuzeko yaganiriye na Kagame ku kibazo cy’urubanza rwa Paul Rusesabagina, Blinken yagize ati :«twagaragaje neza ibiduhangayikishije kubyerekeranye n’iburana n’ikatirwa rya Paul Rusesabagina, by’umwihariko kuba nta cyizere ko yaba yaraburanye mu buryo buzira kubogama; turakomeza gusaba guverinema kwita kubyo arengerwa n’amategeko muri iki kibazo, igashyiraho uburyo bwo kwirinda ibidakenewe byagiturukaho mu bihe biri imbere. Nagize amahirwe yo kubiganiraho na perezida Kagame muri iki gitondo, ntabwo ndibuvuge ingingo kuyindi kubyo twavuze ariko tuzakomeza kubiganiraho. Nagize kandi n’amahirwe yo kuganira n’umuryango wa Paul Rusesabagina mu minsi mike ishize nabo tuzakomeza kuvugana».

Imbere y’abanyamakuru, Vincent Biruta yakuriye inzira ku murima Antony Blinken , avugako Paul Rusesabagina yarangije kuburana agahamwa n’icyaha bityo akaba agomba gufungwa, Biruta yagize ati:«Paul Rusesabagina yarafashwe, acirwa urubanza mu buryo bwubahirije amategeko, kuri twebwe rero urubanza rwararangiye, rwaraciwe burundu…rero gutekereza ko hari igitutu kizatuma Umunyarwanda azabyuka mu gitondo akumva ngo hari umuntu wafunguwe kubera igitutu cy’amahanga, ntabiriho!». Carine Kanimba umukobwa wa Paul Rusesabagina avuga ko byanze bikunze ikibazo cy’ifungwa ry’umubyeyi we u Rwanda ruzagishakira umuti ukaboneka kuko ntaho ruzagihungira!

Bwana Faustin Twagiramungu asanga ntagaciro yaha imvugo ya Biruta kuko atazi umwanzuro Kagame azafata nyuma yo kugirana ibiganiro n’Amerika ku ifungurwa rya Rusesabagina; ibyo akaba abihera ku mvugo ya Bwana Antony Blinken wavuze ko ikibazo cya Rusesabagina yakivuganye na Kagame kandi bakaba bazakomeza kukivugana! Twagiramungu asanga kandi nta mbaraga u Rwanda rufite zo guhangana n’Amerika, akaba abona byanze bikunze Kagame azafungura Paul Rusesabagina! Ku kibazo cy’uko Amerika itemera inyito ya génocide yakorewe Abatutsi, Twagiramungu asanga Amerika ifite ukuri kuko nta mwanzuro wanditswe wafashwe na ONU wemera iyo nyito. Twagiramungu akaba asanga kandi iyo nyito yumvikanishako hapfuye Abatutsi bonyine ndetse igahishira n’ubwicanyi bw’Abahutu n’Abatutsi bwakozwe na Kagame, ubwo bwicanyi bwose Amerika ikaba ibuzi.

Twagiramungu kandi yemeza ko kuva mu mwaka w’1990 ubwo FPR yateraga u Rwanda, Paul Kagame yishe umubare munini w’abatutsi kurusha Abatutsi bishwe n’Abahutu!

Kanda aha ufungure ikiganiro cyose Faustin Twagiramungu yatanze kuruzinduko rw’Antony Blinken i Kigali.

Veritasinfo.