Rwanda : Ese wowe Kagame uzava ku butegetsi ryari ko ushaje nka twe ? (Faustin Twagiramungu).

9 février 2022 Veritas Kinyarwanda 0

Ejo Taliki 08/02/2022 ubwo Perezida Kagame yaramaze kwakira indahiro z’abayobozi, nkibisanzwe yafashe ijambo yivuga ibigwi. Avuga uburyo ingabo ze zagiye muri Repuburika yo muri Afurika yo hagati (RCA), no muri Mozambique aho zirwana gicanshuro. Birababaje kubona Ingabo z’uRwanda zicuruzwa! Ubwo tuzabwirwa aho ayo mafaranga abikwa!

Hanyuma ariko, Kagame aza no kwadukira abatavuga rumwe n’ubutegetsi bwe; harimo abo yafunze, nyuma ngo akaza kubafungura, ariko asa n’ubabaye bitewe n’uko bataguye muri Gereza, nkuko yiciyemo, Kizito_Mihigo ! Ntiyagarukiye aho, n’agasuzuguro kenshi yavuze ko ngo: « hari abamurwanya bari hanze ariko bashaje. Ibyo we yita ngo; Gusaza_Bangara ! Kandi ko bazagwa ishyanga! » Harya ntabandi azi baguye mubuhungiro, buriya nabo twavugako bari baragiye Kwangara ? Biratangaje!

Kuriwe abona ko abo basaza bamurwanya banjwa, batazapfa bayoboye u Rwanda! Yego, mu kinyarwanda baca umugani ugira uti: «bavuga ibigoramye imihoro ikarakara »! Ariko hari na bavuga bati: « Kurenga si Uguhinguka ». Harya Kagame nyuma yimyaka 65 amaze, arashaka kuzamara imyaka ingahe ku ngoma –y’umwakagara ngo abise umuhungu we Cyomoro ? Uretse ko bidashobora kubaho muri Repuburika, kandi akaba yaratangiye kotota abeshyako ngo hari urubyiruko rushakako yongera kwiyamamaza mu mwaka w’2024, nyamara se byahe, byokajya!

Abo avuga ko bashaje bakorera hanze:

*Twagiramungu Faustin ahabwa igikombe mu gihugu cy’Ubutaliyani cyo kuba umunyepolitiki mwiza.*

Harimo nanjye Muzehe Twagiramungu_Faustin watsinze amatora yo mu mwaka w’2003, Iyo ntore Kagame igahitamo kunyiba amajwi ! Nashatse kugaruka mu mwaka w’2013, umfungira amayira. Yewe ntabwo ari ukubera ubukuru gusa bwatumye umbuza gutaha, ahubwo ni ubwoba umfitiye! Kuko uretse kwica ashoboye, ubundi ntushobora guhanganisha ibitekerezo muri politiki! Harya Padiri_Nahimana wafungiye ku kibuga cy’indege i Nairobi mu mwaka w’2017, we yarafite ubuhe busembwa ko wumva twe dushaje? Nahimana ubwe nabo bari kumwe, wowe Kagame ko ushaje kubaruta wangiye iki ko bataha?

Harya uzasimburwa umaze gupfa? Knadi ngo witwara nk’umwami! Cyakora gusaza si ikibazo! Na Perezida Biden wa USA ntacyo abaye.Yewe na Perezida Reagan nti yari umusore, yatowe ashaje arayobora. Naho gusazira mu mahanga, dufite igihugu, ni ikibazo pe! Wigeze kuvugako nta muntu ufitiye umwenda harya? None se izompunzi wifuriza kugwa ishyanga buriya ntamwenda uzigomba? Amasezerano ya Arusha yari ayo gucyura IMPUNZI, aho kuzicyura wafashe ubutegetsi ku ngufu; wica abaperezida b’ibihugu bibiri ( u Rwanda n’ Uburundi), ukoma imabarutso ya génocide mu Rwanda, usahura u Rwanda, yewe usahura na ZAÏRE, ariyo RD -Congo numvise wigamba ko ushaka kongera gutezamo intambara!

*Umwami Kigeli V Ndahindurwa yatabarutse ari mu gihugu cya USA*

Harya umaze gufata u Rwanda ni kuki wowe Kagame utacyuye Mubyara wawe Kigeli V Ndahindurwa waguye ishyanga yangara, agacyurwa mu Rwanda ari umugogo? Ukanga no kujya ku mushyingur ! Nawe se tuvugeko wamuhoye ko yari ashaje? Njye ndinkawe sinakwirirwa mvuga kukibazo cy’Impunzi, rwose! None ngo mwacyuye IMPUNZI ? Ntasoni! Mwaje kwifatira iminyago, izina ribakwiye ni ukwitwa « ABAGANDARWANDA », ibyo ntimwabihakana kuko mwavuye mu ngabo za Uganda UPDF kandi « Uburere buruta Ubuvuke »! Ubu u Rwanda murutegeka nka koloni. Ariko ayubusa TUZARUBOHOZA NK’ABANYARWANDA. Byanga bikunda !

Faustin TWAGIRAMUNGU

Umuyobozi wa RDI –Rwanda Rwiza.