Twizere ko urupfu rw’Ambasaderi w’Ubutaliyani muri Congo rutazamera nk’urupfu rwa perezida Habyarimana Juvénal na Ntaryamira Cyprien w’Uburundi!

Ambasaderi w'Ubutaliyani n'ushinzwe umutekano we bombi biciwe hafi y'i Goma

Kuwa mbere taliki ya 22/02/2021 saa yine n’iminota 15 ku isaha y’i Goma nicyo gihe Ambasaderi w’igihugu cy’Ubutaliyani muri Congo Bwana Luca Attanasio ufite imyaka 43 y’amavuko n’ushinzwe umutekano we  Bwana Vittorio Lacovacci ufite imyaka 30 y’amavuko nawe ukomoka mu gihugu cy’Ubutaliyani ndetse n’umushoferi wa PAM w’umucongomani bishwe. Kuwa kabili taliki ya 23/02/2021, igihugu cy’Ubutaliyani cyohereje ikipe igizwe n’impuguke kabuhariwe muri Congo kugirango zikore anketi yo kumenya abagizi ba nabi bakoze ubwo bwicanyi.

Ku mugoroba wo kuwa gatatu taliki ya 24/02/2021, Ministeri y’ubutegetsi bw’igihugu cya Congo yashyize ahagaragara itangazo rihagarika ku mirimo ye Bwana BULAKALI MULULUNGANYA Aristide  ku mwanya yari afite wo kuba Umuyobozi wungirije mu biro bya ministre w’ubutegetsi bw’igihugu cya Congo bitewe n’uko yatanze itangazo mu izina rya ministre w’ubutegetsi bw’igihugu cya Congo rivuga ko umutwe wa FDLR ariwo uri inyuma y’ubwicanyi bwahitanye Ambasaderi w’igihugu cy’Ubutaliyani.

Ambasaderi w’Ubutaliyani n’ushinzwe umutekano we biciwe mu mudugudu witwa Kanyamahoro, hafi y’umupaka w’u Rwanda na Congo, aho biciwe hari metero 20 gusa ngo ugere ku kigo cya gisilikare cy’ingabo za Congo kiri muri ako karere! Umushoferi wari utwaye imodoka niwe wabanje kuraswa n’abantu bambaye imyenda ya gisilikare y’ingabo za Congo, nyuma basohora mu modoka ambasaderi n’ushinzwe umutekano we babakurura babajyana mu bihuru. Abashinzwe kurinda pariki bumvise urusaku rw’amasasu barashe umushoferi baratabara,  abo bagizi ba nabi bababonye bahise barasa ambasaderi n’ushinzwe umutekano we.

Amakuru menshi yatanzwe n’abaturage yagiye agaragaza ko Ambasaderi n’abo bari kumwe bishwe n’abantu bavuye mu Rwanda bakaba barahunze basubira mu Rwanda , ndetse hifashishijwe telefoni zigendanwa abaturage bafashe amashusho y’abo bicanyi. Amakuru yanyuze ku mbuga nkoranyambaga zihurirwaho n’abacongomani benshi yemeza ko Ambasaderi w’Ubutaliyani yishwe n’ingabo za FPR (RDF). Bamwe mu barinzi ba pariki b’abacongomani batashatse kuvuga amazina yabo nabo bemeza ko Ambasaderi w’Ubutaliyani yishwe n’inkotanyi kugirango ba mukerarugendo basura pariki y’ibirunga ku ruhande rwa Congo bacike muri ako karere ahubwo bajye bajya mu Rwanda kuko ariho bazajya bumva ko bafite umutekano.

Madame Colette Braeckman wandika mu kinyamakuru “Le soir” cyo mu Bubiligi we atunga agatoki James Kabarebe mu kugira uruhare mu rupfu rw’Ambasaderi w’Ubutaliyani. Impamvu Braeckman atanga akaba ari uko Ambasaderi Luca Attanasio yari inshuti magara ya Dr. Mukwege , bombi bakaba barasabagako Loni ishyiraho urukiko rwo kuburanisha abakoze ibyaha by’ubwicanyi muri Congo bavugwa muri raporo Mapping. Madame Braeckman akaba avugako Kabarebe yatangaje ko abantu bose bafite icyo gitekerezo cyo gushyiraho urwo rukiko azabica!

Bwana Faustin Twagiramungu, umuyobozi w’ishyaka rya RDI-Rwanda Rwiza yashyize ku rubuga rwe rwa twitter ubutumwa bwerekana ko urupfu rw’Ambasaderi w’Ubutaliyani rumeze neza nk’urupfu ba mukerarugendo b’abanyamerika bishwemo, yagize ati: “Kwicira ambasaderi w’Ubutaliyani hafi ya Goma, ni amahano yakozwe n’abashaka kwigarurira kariya karere ka RDC. Nimwibuke ba mukerarugendo 8 biciwe i Buindi, harimo abanyamerika 3, induru zikavuga ngo ni FDLR yabishe. Nyuma urukiko rw’i washington rusanga baribeshye ahubwo ari FPR yabishe“.

Mu isesengura ryakozwe na Bwana James Munyandinda wabaye umusilikare wa FPR igihe kirekire na Pascal Manirakiza warokotse ubwicanyi bwa FPR, berekana ko Ambasaderi w’Ubutaliyani yishwe n’ingabo za Kagame (RDF). Ikibazo twakwibaza ni iki: None se ko bitangiye kugaragara ko uriya Ambasaderi w’Ubutaliyani yishwe na FPR-Kagame, urupfu rwe narwo ruzaba impfabusa nk’uko byagenze ku rupfu rwa perezida Habyarimana Juvénal na Cyprien Ntaryamira? Ibihe biri imbere nibyo bizaduha igisubizo.

Kanda kuri iyi nteruro wumve ku buryo bwimbitse isesengura ku rupfu rw’ambasaderi w’Ubutaliyani: Radio TV-UBUMWE: Iyicwa ry’Ambasaderi w’Ubutaliyani.

Subscribe
Notify of
guest
1 Comment
Oldest
Newest Most Voted
Inline Feedbacks
View all comments
kalsisa
kalsisa
25 February 2021 15 h 32 min

FPR irakina n’umuriro. Kuki bahita batangaza ko aro FDLR yishe ambassadeur nta anketi yakozwe?Kuba uriya ambassadeur yarasuraga Mukwege cyane i Panzi ni ikibazo kuri Kabarebe na FPR ye. Gusa kuki nta escort yari afite? kuki ubutegetsi butari bubizi?