Ubufaransa: Kurikira uko amatora ari kugenda isaha ku yindi kuri iki cyumweru taliki ya 24/04/2022

Kuri iki cyumweru taliki ya 24/04/2022 Abafaransa bazindukiye mu matora ya nyuma y’umukuru w’igihugu hagati ya Emmanuel Macron urangije manda y’imyaka 5 ayobora Ubufaransa  na Madame Marine Le Pen uyobora ishyaka rya « Rassemblement National ». Zimwe mu ntara z’igihugu cy’Ubufaransa (France Outre-Mer) ziri hirya no hino ku isi zarangije itora ry’umukuru w’igihugu ndetse n’amajwi yarangije kubarurwa muri izo ntara;  ariko Itegeko rigenga amatora mu Bufaransa ribuza ibinyamakuru biri ku butaka bwabyo gutangaza amazwi yavuye mu matora mbere y’isaha ya saa mbiri z’umugoroba ku isaha y’i Paris.

Nubwo bimeze gutyo ariko, ibinyamakuru byo mu mahanga ntabwo birebwa n’iryo tegeko kandi n’imbuga nkoranyambaga nazo ntizirebwa n’iryo tegeko bityo amajwi yabonetse aho barangije gutora arimo atangazwa muri ibyo binyamakuru mpuzamahanga n’imbuga nkoranyambaga. « Veritasinfo » ikaba igiye kubagezaho amwe mu makuru ifitiye gihamya ari kuva mu itora ry’umukuru w’igihugu mu Bufaransa. Fungura iyi paji kenshi urebe amakuru mashya kuri ayo matora!

PEREZIDA W’UBUFARANSA EMMANUEL MACRON YONGEYE GUTORERWA INDI MANDA Y’IMYAKA 5 AKABA YAGIZE AMAJWI 58,2%

19:45

Amakuru menshi atangwa n’ibinyamakuru mpuzamahanga aratangazako Emmanuel Macron afite amajwi ari hagati ya 57,3% – 58,5% naho Marine Le Pen akaba afite amajwi ari hagati ya 41,5% – 42,7%. Bityo Abafaransa bakaba bahaye Emmanuel Macron indi manda y’imyaka 5 yo kuba umukuru w’igihugu cy’Ubufaransa ari nayo manda ye ya nyuma.

17:58

Kugera ku isaha ya saa kumi n’imwe z’umugoroba ku isaha y’i Paris, itora rya perezida wa Repubulika mu Bufaransa ryari rimaze kwitabirwa n’abatora ku kigereranyo cya 63,23%! Ku isaha nk’iyo mu mwaka w’2017 iryo tora ryari rimaze kwitabirwa ku kigereranyo cya 65%!

15:37

Izindi ntara z’Ubufaransa nazo zirangije kubarura amajwi yavuye mu matora nk’uko bitangazwa n’imbuga nkoranyambaga n’ibinyamakuru byo mu mahanga:

Saint -Pierre et Miquélon: EM (49,31%), MLP (50,69%)

Polynésie Française: EM (51,81%) MLP (48,19%)

14:08

Marine Le Pen uhanganye na Emmanuel Macron amaze gutora mu biro by’itora biri i « Hénin -Beaumont » biri mu karere akomokamo

13:57

Bwana François Hollande wigeze kuba umukuru w’igihugu cy’Ubufaransa yatoreye i Tulle (Corrèze). Hollande akaba yarahamagariye Abafaransa gutora Emmanuel Macron wari ministre w’imari muri guverinema ye!

13:45

Perezida Emmanuel Macron uhatanira manda ya kabiri yo kuyobora Ubufaransa amaze gutora kuri iki cyumweru taliki ya 24/04/2022, akaba yatoreye mu biro by’itora biri i Touquet (Pas-de-Calais) byo mu karere avukamo.

13:25

Zimwe mu  ntara zigize Ubufaransa ziri kuyindi migabane y’isi (France Outre-mer) zarangije amatora ndetse no kubarura amajwi ziragaragaza ko Marine Le Pen ari imbere cyane ya Emmanuel Macron mu majwi nk’uko bitangazwa n’imbuga z’amahanga.

Guadeloupe: MLP (69,60%); EM (30,40%)

Martinique: MLP ( 60,87%);  EM (39,13%)

Guyane : MLP (60,70%) ; EM (39,30%)

12:47:

Miliyoni 48,7 z’abaturage b’Abafaransa nizo zemerewe gutora umukuru w’igihugu cy’Ubufaransa kuri iyi taliki ya 24/04/2022. Ibinyamakuru byo mu Bufaransa byatangaje ko Ministeri y’Ubutegetsi bw’igihugu yo mu Bufaransa yatangaje ko kugeza ku isaha ya saa sita z’amanywa ku isaha y »i Paris ( mu Bufaransa), itora ry’umukuru w’igihugu ryari rimaze kwitabirwa kukigereranyo cya 26,41%, uyu mubare ukaba uri hejuru y’uko iri tora ryitabiriwe kuri iyo saha mu mwaka w’2017 kuko icyo gihe ikigereranyo cy’abari bamaze gutora cyari ku mubare wa 25,48%.