Ukraine: Iyicwa rya Gén.Major Vladimir Frolov w’Uburusiya no gutangiza ibitero simusiga mu burasirazuba.

Ingabo z’Uburusiya zirimo kurasa ibice bitandukanye muri Ukraine zikoresheje indege n’imbunda zirasa imizinga ; [ndlr : leta ya Ukraine ikaba yatangaje ko ibitero simusiga by’Uburusiya byo gufata igice cyose cya Donbass byatangiye kuri uyu wa mbere]. Ibyo bikaba bibaye mu gihe abasirikare ba Ukraine bagikomeje kurwana ku gace gasigaye k’umujyi wa Mariupol.

Mu buryo butunguranye umujyi wa Lviv uri mu burengerazuba bwa Ukraine, kugeza ubu wari ahantu hatarashweho bikomeye n’ingabo z’Uburusiya, none kuwa mbere warashweho ibisasu. Maj. Gen Vladimir Frolov wari umugaba wungirije w’umutwe wa 8 w’ingabo z’Uburusiya yashyinguwe kuwa gatandatu nyuma yo kugwa ku rugamba muri Ukraine.

Mu kumushyingura i St Petersburg, Vladimir Frolov yongeye kwitwa intwari nyuma y’uko aguye mu mirwano mu gace ka Donbass mu burasirazuba bwa Ukraine. Uyu ni undi musirikare mu bakomeye mu ngabo z’Uburusiya uguye mu bitero muri Ukraine, ibitero Perezida Vladimir Putin aheruka kuvuga ko birimo kugenda uko byateganyijwe.

Mu itangazo ryatanzwe na Alexander Beglov guverineri wa St Petersbourg, yavuze ko Gen Vladimir Frolov «yatanze ubuzima bwe kugira ngo abana, abagore, n’abashaje i Donbass batazongera kumva za bombe ziturika ». Uburusiya buvuga ko muri ako gace Ukraine ihakora ibikorwa byo kwibasira abavuga ururimi rw’ikirusiya, ibyo Ukraine ikaba ibihakana.

Mu mpera z’ukwezi kwa gatatu, abategetsi bo mu Burayi bw’iburengerazuba bavuze ko kugeza icyo gihe Uburusiya bwari bumaze gutakaza abasirikare barindwi bo ku rwego rwa jenerali. Uburusiya ntibwigeze bwemeza uwo mubare.

Abatuye Luhansk basabwe guhunga bigishoboka

Umubare w’aba jenerali b’Uburusiya bamaze kwicwa na Ukraine ukomeje kwiyongera.

Nyuma yo gutsindwa hafi y’umurwa mukuru Kyiv, Uburusiya bwashyize imbaraga mu gufata uduce twa Luhansk na Donetsk tugize akarere ka Donabas mu burasirazuba. Nubwo imirwano yeruye isa n’itaratangira, ibisasu by’Uburusiya birasirwa kure bikomeje kwitura ku bice bitandukanye by’aka gace. [Ndlr : Ku mugoroba wo kuri uyu wa mbere taliki ya 18/05/2022, abategetsi ba Ukraine baremeza ko urugamba rukomeye cyane rwo kwigarurira akarerere kose ka Donbass bikozwe n’Uburusiya rwatangiye].

Ingabo z’impande zombi ubu zirahanganye ku rugamba rushobora gusobanura ibintu muri iyi ntambara. Abatuye mu mujyi wa Sievierodonetsk – ugenzurwa na leta ya Kyiv muri Donbass -bari kwiga uburyo bagomba kubaho bifashishije ibyashenywe n’intambara. Hagati aho abatuye mu gace ka Luhansk, naho mu burasirazuba, basabwe guhunga vuba bigishoboka, nk’uko ibiro ntaramakuru UNIAN bya Ukraine bibivuga.

Umukuru wa Luhansk Sergei Gaidai yasubiyemo avuga ati: «Mu cyumweru gitaha bishobora kugorana. Iyi ishobora kuba inshuro ya nyuma tubashije kubakiza.» Mbere y’iyi ntambara, Perezida Putin yatangaje ko Luhansk na Donetsk ari leta zigenga zemewe n’Uburusiya. Ingabo za Ukraine muri aka gace zimaze igihe zitegura intambara ikomeye yo kurwanya ibitero by’Uburusiya.

Bwa mbere, abahunguka baruse abahunga Ukraine

Ku nshuro ya mbere kuva iyi ntambara itangiye, abahunguka batashye muri Ukraine ari benshi bava muri Pologne bari kurusha abahunga Ukraine. Umubare w’abahunguka – baba abaje gusura ababo cyangwa abatahutse mu ngo zabo – ukomeje kugenda wiyongera. Abashinzwe imipaka ya Pologne berekanye ko kuwa gatandatu gusa abagera ku 22,000 basubiye muri Ukraine mu gihe abagera ku 19,200 bayihunze.

Bamwe bagaruka kureba imiryango yabo, wenda by’iminsi micyeya, kandi bakaguma hafi y’umupaka mbere yo gusubira mu buhungiro. Abandi barimo gutahuka bagasubira iwabo, nubwo baburiwe n’abategetsi nk’umukuru wa Kyiv Vitali Klitschko ko kugaruka muri uyu mujyi bigiteye impungenge.

Amakamyo y’Uburusiya yirukanywe Iburayi

Umurongo w’amakamyo yo mu Burusiya na Beralus agerageza gusohoka mu Burayi anyuze ku mupaka wa Beralus na Pologne

(EU) mbere y’itariki ntarengwa kubera ibihano. Itariki ntarengwa yo kuwa gatandatu yageze hari imirongo igera kuri 80km y’imodoka zihagaze harimo izimaze amasaha 33 zitagenda. EU yaciye amakamyo yo mu Burusiya na Belarus ku butaka bwayo – uretse atwaye imiti, cyangwa petrol – kuhinjira cyangwa no kuhaguma.

Iki ni kimwe mu bihano byafatiwe Uburusiya kubera ibitero kuri Ukraine.  Amashusho ya Drones yatangajwe n’ibiro ntaramakuru Reuters yerekanye iyo mirongo miremire mbere y’uko igihe ntarengwa kigera. EU hamwe n’ibindi bihugu by’iburengerazuba byafatiye ibihano Uburusiya n’inshuti yabwo Belarus. Ibi bihugu nabyo byarasubije bifata ibihano nk’ibyo.

Inkuru ya BBC Gahuza